Read Papantla Totonac 2 Pedro 1 Bible Online

2 Pedro 1 - Papantla Totonac bible

2 Pedro 1

¹Simon Pedro, un sirbido i apostel di Jesu-Cristo, Na esnan ku a risibi e mesun fe presioso ku nos pa medio di e hustisia di nos Dios i Salbador Jesu-Cristo.

²Grasia i pas sea multiplika na boso den e konosementu di Dios i di Jesus nos Senor;

³komo ku Su poder divino a duna nos tur kos ku ta pertenese na bida i santidat, dor di e konosementu berdadero di Esun ku a yama nos pa medio di Su mes gloria i ekselensia.

⁴Pasobra pa medio di esakinan El a duna nos Su promesanan presioso i maraviyoso, ku pa medio di nan boso por a bira partisipante den e naturalesa divino, ya ku boso a skapa for di e korupshon ku tin den mundu pa kousa di pashon.

⁵Awor pa e mesun motibu aki tambe, hasiendo tur diligensia, anadi na boso fe, birtut, i na boso birtut, konosementu;

⁶i na boso konosementu, dominio propio, i na boso dominio propio, perseveransia, i na boso perseveransia, santidat;

⁷i na boso santidat, karino fraternal, i na boso karino fraternal, amor.

⁸Pasobra si e kalidatnan aki ta den boso i ta oumentando, nan lo no laga boso keda inutil ni sin fruta den e konosementu berdadero di nos Senor Jesu-Cristo.

⁹Pasobra esun ku ta falta e kalidatnan aki ta siegu, of no ta mira leu, i a lubida e purifikashon di su pikanan di antes.

¹⁰Pesei, rumannan, sea ainda mas diligente pa ta sigur ku ta El a yama i a skohe boso; pasobra tanten ku boso ta praktika e kosnan aki, boso lo no trompeka nunka;

¹¹pasobra di e manera aki e entrada den e reino eterno di nos Senor i Salbador Jesu-Cristo lo wordu provee abundantemente na boso.

¹²Pesei semper lo mi ta kla pa rekorda boso e kosnan aki, maske boso sa di nan kaba, i a wordu stablesi den e berdat ku boso tin awor.

¹³I mi ta konsidera korekto, tanten ku mi ta den e tent aki, pa anima boso pa medio di spiertamentu,

¹⁴sabiendo ku pronto mi tin di kita mi tent terenal pone un banda, manera nos Senor Jesu-Cristo a hasimi komprende tambe.

¹⁵Ademas, lo mi hasi tur mi posibel pa, despues di mi morto, boso semper lo por rekorda e kosnan aki.

¹⁶Pasobra nos no a sigui fabulanan traha ku astusia ora nos a hasi konosi na boso e poder i binida di nos Senor Jesu-Cristo, ma nos tabata testigu ku a mira Su mahestat ku nos mes wowo.

¹⁷Pasobra ora ku El a risibi onor i gloria di Dios Tata, un bos manera esaki a wordu dirigi na djé dor di e Gloria Mahestuoso: "Esaki ta Mi Yu stima, den Kende Mi tin Mi goso"--

¹⁸i nos mes a tende e bos aki bin for di shelu, ora nos tabata huntu kuné riba e seru santu.

¹⁹I asina nos tin e palabra profetiko pa mas siguransa, na kual boso ta hasi bon di pone atenshon, komo na un lampi ku ta lusa den un luga skur, te ora dia habri i e strea di marduga sali den boso kurason.

²⁰Ma komprende esaki prome ku tur kos, ku ningun profesia di Skritura no ta un asunto di interpretashon personal,

²¹pasobra nunka profesia no a wordu duna pa medio di e boluntat di hende, ma hombernan santu di Dios a papia, inspira dor di Spiritu Santu.