Read Papantla Totonac 2 Pedro 2 Bible Online

2 Pedro 2 - Papantla Totonac bible

2 Pedro 2

¹Ma profetanan falsu tambe a lanta meimei di e pueblo, meskos ku lo tin tambe sinadonan falsu meimei di boso, kendenan lo introdusi na skondi herehianan destruktivo, asta nengando e Shon ku a kumpra nan, tresiendo destrukshon repentino riba nan mes.

²I hopi lo sigui nan sensualidat, i pa nan motibu e kaminda di berdat lo wordu blasfema;

³i den nan golosidat pa plaka nan lo eksplota boso ku palabranan di engano; nan huisio ta reserva pa nan for di hopi tempu kaba, i nan destrukshon no ta na sono.

⁴Pasobra si Dios no a spar angelnan ora nan a peka, ma a tira nan den fiernu i a kondena nan na posnan di skuridat, pa wordu reserva pa huisio,

⁵i no a spar e mundu antiguo, ma a preserva Noe, un predikado di hustisia, huntu ku shete otro persona mas, ora ku El a trese un diluvio riba e mundu di e impionan;

⁶i si El a kondena e statnan Sodoma i Gomora pa destrukshon dor di hasi nan bira shinishi, hasiendo nan un ehempel pa esnan ku despues lo a biba den impiedat;

⁷i si El a reskata Lot, e homber hustu, oprimi pa motibu di e kondukta sensual di hombernan malbado,

⁸(pasobra pa motibu di loke el a mira i tende, e homber hustu ei, bibando meimei di nan, a sinti su alma hustu tormenta dia aden dia afo ku nan echonan malbado),

⁹anto Senor sa tambe kon pa reskata e santunan for di tentashon, i kon pa tene e inhustunan bou di kastigu pa e dia di huisio,

¹⁰i spesialmente esnan ku ta sigui e karni den su deseonan korupto i ta despresia outoridat. Tribi, kabesura, nan no ta tembla ora nan ta papia malu di mahestatnan angelikal,

¹¹mientras ku angelnan, kualnan ta mas grandi den forsa i poder, no ta trese huisio di maldishon kontra nan dilanti di Senor.

¹²Ma esakinan, manera bestia ku no por rasona, nasi komo kriaturanan ku instinto pa wordu kaptura i mata, papiando malu di kosnan ku nan no tin konosementu di dje, lo wordu destrui tambe den e destrukshon di e kriaturanan ei.

¹³Nan lo risibi e pago di inhustisia. Nan ta konsidera esaki komo plaser pa festeha di dia kla. Nan ta manchanan i defektonan ku ta festeha den nan enganonan, ora nan ta parandia ku boso,

¹⁴ku wowo yen di adulterio i ku nunka ta stop di hasi pika; sedusiendo almanan inkonstante, teniendo un kurason entrena den golosidat, yunan maldishona.

¹⁵Dor di bandona e kaminda korekto, nan a dwal i a sigui e kaminda di Balaam, yu homber di Beor, kende tabata stima e pago di inhustisia,

¹⁶ma el a risibi un reprendementu pa su mes transgreshon; pasobra un buriku mudo, papiando ku bos di hende, a frena e profeta su lokura.

¹⁷Esakinan ta fuentenan sin awa, i neblina hiba dor di un tempestat, pa kualnan e skuridat di mas profundo a wordu reserva.

¹⁸Pasobra ku palabranan arogante i bano nan ta tenta pa medio di deseonan karnal, pa medio di sensualidat, esnan ku apenas ta skapa di esnan ku ta biba den eror,

¹⁹i ta priminti nan libertat mientras ku nan mes ta esklabu di korupshon; pasobra dor di loke un hende ta wordu vensi, dor di esaki e ta wordu esklabisa tambe.

²⁰Pasobra si despues ku nan a skapa di e kontaminashonnan di mundu pa medio di e konosementu di e Senor i Salbador Jesu-Cristo, nan bolbe wordu envolvi den nan i wordu vensi, e ultimo estado a bira pio pa nan ku esun di prome.

²¹Pasobra lo tabata miho pa nan si nan no a konose e kaminda di hustisia, ku despues di a konose esaki, nan bira bai for di e mandamentu santu ku a wordu entrega na nan.

²²A sosode ku nan konforme e proverbio berdadero: "Un kacho ta bolbe na su mes saka," i "Un porko, despues di a wordu bana, ta bolbe bai lora den lodo."