Read Papantla Totonac 2 Pedro 3 Bible Online

2 Pedro 3 - Papantla Totonac bible

2 Pedro 3

¹Awor stimanan, esaki ta e di dos karta ku mi ta skirbi boso, den kual mi ta anima boso mente sinsero pa medio di spiertamentu,

²pa boso keda korda e palabranan ku a wordu papia antes pa medio di e profetanan santu i e mandamentu di e Senor i Salbador, papia pa medio di boso apostelnan.

³Sabi esaki prome ku tur kos, ku den e ultimo dianan bofonadonan lo bin ku nan bofon, siguiendo nan mes pashonnan,

⁴i bisando: "Unda e promesa di Su binida ta? Pasobra desde ku e tatanan a muri, tur kos ta keda meskos ku nan tabata for di prinsipio di kreashon."

⁵Pasobra di nan mes boluntat nan no kier asepta e echo aki, ku pa medio di e palabra di Dios e shelunan a eksisti di hopi tempu pasa i e tera a wordu forma for di awa i pa medio di awa,

⁶dor di kual e mundu di e tempu ei a wordu destrui, siendo inunda ku awa.

⁷Ma e shelunan i e tera aktual pa medio di Su palabra ta wordu reserva pa kandela, warda pa e dia di huisio i destrukshon di hendenan impio.

⁸Ma no laga di ripara esun echo aki, stimanan, ku pa Senor un dia ta meskos ku mil ana, i mil ana meskos ku un dia.

⁹Senor no ta tarda ku Su promesa manera algun tin esaki pa tardansa, ma E tin pasenshi pa ku boso, i no kier pa ningun hende bai perdi, ma pa tur bin na repentimentu.

¹⁰Ma e dia di Senor lo bin manera un ladron, den kual e shelunan lo pasa bai ku un boroto inmenso, i e elementonan lo wordu destrui ku un kalor intenso, i e tera i su obranan lo wordu kima kompletamente.

¹¹Komo ku tur e kosnan aki lo wordu destrui di e manera aki, ki sorto di hende boso mester ta den un kondukta santu i deboto,

¹²sperando i purando e binida di e dia di Dios, pa kual motibu e shelunan lo wordu destrui dor di kimamentu, i e elementonan lo dirti di kalor intenso!

¹³Ma segun Su promesa nos ta sperando shelunan nobo i un tera nobo, den kual ta biba hustisia.

¹⁴Pesei, stimanan, komo ku boso ta spera e kosnan aki, sea diligente pa E hana boso den pas, sin mancha i sin kulpa,

¹⁵i konsidera e pasenshi di nos Senor komo salbashon, meskos ku nos ruman stima Pablo tambe, segun e sabiduria ku a wordu duna na dje, a skirbi boso,

¹⁶meskos tambe den tur su kartanan, papiando den nan di e kosnan aki, den kualnan tin algun kosnan ku ta difisil pa komprende, kualnan esnan ku no a wordu sina i e inkonstantenan ta trose, meskos ku nan ta hasi tambe ku e restu di e Skrituranan, pa nan mes destrukshon.

¹⁷Boso anto, stimanan, sabiendo esaki di antemano, tene kuidou, pa boso no wordu lastra hiba pa medio di e eror di hombernan malbado, i boso kai for di boso mes firmesa,

¹⁸ma krese den e grasia i konosementu di nos Senor i Salbador Jesu-Cristo. Na E sea e gloria, awor i te na e dia di eternidat. Amen.