Read Papantla Totonac 1 Juan 3 Bible Online

1 Juan 3 - Papantla Totonac bible

1 Juan 3

¹Mira ki un amor grandi e Tata a duna nos, ku nos por wordu yama yunan di Dios; i esei nos ta. Pesei mundu no konose nos, pasobra e no a konos'E.

²Stimanan, awor nos ta yunan di Dios, i ainda no a wordu revela kiko nos lo ta. Nos sa si ku ora E parese nos lo ta meskos kuné, pasobra nos lo mir'E manera E ta.

³I kada un ku tin e speransa aki den djé ta purifika su mes, meskos ku E ta puru.

⁴Ken ku praktika pika ta praktika kibramentu di lei tambe; i pika ta kibramentu di lei.

⁵I boso sa ku El a parese pa kita pika; i den djé no tin pika.

⁶Ni un hende ku ta permanese den djé no ta hasi pika; ni un hende ku ta hasi pika no a mir'E ni konos'E.

⁷Yu chikitunan, no laga ni un hende gana boso; esun ku ta praktika hustisia ta hustu, meskos ku E ta hustu;

⁸esun ku ta praktika pika ta di diabel; pasobra diabel a hasi pika for di prinsipio. E Yu di Dios a parese pa e proposito aki, pa E destrui e obranan di diabel.

⁹Ni un hende ku a nase di Dios no ta praktika pika, pasobra Su simia ta permanese den dje; i e no por hasi pika, pasobra el a nase di Dios.

¹⁰Na esaki e yunan di Dios i e yunan di diabel ta konosi: esun ku no ta praktika hustisia no ta di Dios, ni esun ku no ta stima su ruman.

¹¹Pasobra esaki ta e mensahe ku boso a tende for di prinsipio, ku nos mester stima otro;

¹²no manera Kain, kende tabata di e malbado, i a mata su ruman. I pa ki motibu el a mat'e? Pasobra su obranan tabata malu, i esnan di su ruman tabata hustu.

¹³No keda strana, rumannan, si mundu ta odia boso.

¹⁴Nos sa ku nos a pasa di morto pa bida, pasobra nos ta stima e rumannan. Esun ku no ta stima ta permanese den morto.

¹⁵Ken ku odia su ruman ta un matado; i boso sa ku ningun matado no tin bida eterno ta permanese den dje.

¹⁶Na esaki nos konose amor, ku El a entrega Su bida pa nos; i nos mester entrega nos bida pa e rumannan.

¹⁷Ma ken ku tin e biennan di mundu, i ta mira su ruman den nesesidat i ta sera su kurason p'e, ta kon e amor di Dios ta permanese den dje?

¹⁸Yu chikitunan, no laga nos stima ku palabra ni ku lenga, ma ku echo i berdat.

¹⁹Na esaki nos lo sa ku nos ta di e berdat, i lo sigura nos kurason dilanti di djé,

²⁰den kiko ku nos kurason kondena nos; pasobra Dios ta mas grandi ku nos kurason i sa tur kos.

²¹Stimanan, si nos kurason no ta kondena nos, nos tin konfiansa dilanti di Dios;

²²i kiko ku nos pidi nos ta risibi for di djé, pasobra nos ta warda Su mandamentunan i ta hasi e kosnan ku ta agradabel den Su bista.

²³I esaki ta Su mandamentu, pa nos kere den e nomber di Su Yu Jesu-Cristo, i stima otro, meskos ku El a ordena nos.

²⁴I esun ku warda Su mandamentunan ta permanese den djé, i E den dje. I na esaki nos sa ku E ta permanese den nos, pa medio di e Spiritu ku El a duna nos.