Read Papantla Totonac 1 Juan 4 Bible Online

1 Juan 4 - Papantla Totonac bible

1 Juan 4

¹Stimanan, no kere tur spiritu, ma pone e spiritunan na prueba pa mira si nan ta bin di Dios, pasobra hopi profeta falsu a sali bai den mundu.

²Na esaki boso ta konose e Spiritu di Dios: tur spiritu ku ta konfesa ku Jesu-Cristo a bin den karni ta bin di Dios;

³i tur spiritu ku no ta konfesa Jesus no ta di Dios; i esaki ta e spiritu di e anti-cristo, di kual boso a tende ku e ta bin, i awor e ta den mundu kaba.

⁴Boso ta di Dios, yu chikitunan, i boso a vense nan; pasobra mas grandi ta Esun ku ta den boso ku esun ku ta den mundu.

⁵Nan ta di mundu; pesei nan ta papia di mundu, i mundu ta skucha nan.

⁶Nos ta di Dios; esun ku konose Dios ta skucha nos; esun ku no ta di Dios no ta skucha nos. Na esaki nos ta konose e spiritu di berdat i e spiritu di eror.

⁷Stimanan, laga nos stima otro, pasobra amor ta bin di Dios; i tur ku ta stima ta nasi di Dios i konose Dios.

⁸Esun ku no ta stima no konose Dios, pasobra Dios ta amor.

⁹Pa medio di esaki e amor di Dios a wordu manifesta den nos, ku Dios a manda Su Yu unigenito den mundu pa nos por a biba pa medio di djé.

¹⁰Den esaki amor ta konsisti, no ku ta nos a stima Dios, ma ku ta El a stima nos i a manda Su Yu pa ta e propisiashon pa nos pikanan.

¹¹Stimanan, si Dios a stima nos asina tantu, nos tambe mester stima otro.

¹²Ningun hende no a mira Dios nunka; si nos stima otro, Dios ta permanese den nos, i Su amor ta wordu hasi perfekto den nos.

¹³Pa medio di esaki nos sa ku nos ta permanese den djé i E den nos, pasobra El a duna nos di Su Spiritu.

¹⁴I nos a mira i ta duna testimonio, ku e Tata a manda e Yu pa E ta e Salbador di mundu.

¹⁵Ken ku konfesa ku Jesus ta e Yu di Dios, Dios ta permanese den dje, i e den Dios.

¹⁶I nos a konose i a kere e amor ku Dios tin pa nos. Dios ta amor, i esun ku ta permanese den amor ta permanese den Dios, i Dios ta permanese den dje.

¹⁷Pa medio di esaki amor a wordu perfekshona den nos, pa nos por tin konfiansa den e dia di huisio; pasobra manera E ta, asina tambe nos ta den e mundu aki.

¹⁸Amor no konose miedu; ma amor perfekto ta kore ku miedu, pasobra miedu tin di hasi ku kastigu, i esun ku tin miedu no a wordu hasi perfekto den amor.

¹⁹Nos ta stima, pasobra El a stima nos prome.

²⁰Si un hende bisa: "Mi ta stima Dios," i ta odia su ruman, e ta un ganado; pasobra esun ku no ta stima su ruman ku el a mira, no por stima Dios, Kende e no a mira.

²¹I e mandamentu aki nos tin di djé, ku esun ku ta stima Dios mester stima su ruman tambe.