Read Papantla Totonac 1 Juan 5 Bible Online

1 Juan 5 - Papantla Totonac bible

1 Juan 5

¹Ken ku ta kere ku Jesus ta e Cristo ta nasi di Dios; i ken ku ta stima e Tata ta stima e Yu nasi di djé.

²Pa medio di esaki nos sa ku nos ta stima e yunan di Dios, ora nos ta stima Dios i ta kumpli ku Su mandamentunan.

³Pasobra esaki ta e amor di Dios, ku nos ta warda Su mandamentunan; i Su mandamentunan no ta pisa.

⁴Pasobra tur loke ta nasi di Dios ta vense mundu; i esaki ta e viktoria ku a vense mundu--nos fe.

⁵I ta ken ta esun ku ta vense mundu, si no ta esun ku ta kere ku Jesus ta e Yu di Dios?

⁶Esaki ta Esun ku a bin pa medio di awa i sanger, Jesu-Cristo; no ku e awa so, ma ku e awa i ku e sanger.

⁷I ta e Spiritu ta Esun ku ta duna testimonio, pasobra e Spiritu ta e berdat.

⁸Pasobra tin tres ku ta duna testimonio, e Spiritu i e awa i e sanger; i e tresnan ta di un akuerdo.

⁹Si nos risibi e testimonio di hende, e testimonio di Dios ta mas grandi; pasobra e testimonio di Dios ta esaki, ku El a duna testimonio tokante di Su Yu.

¹⁰Esun ku kere den e Yu di Dios tin e testimonio den su mes; esun ku no ta kere Dios a hasié un ganado, pasobra e no a kere den e testimonio ku Dios a duna tokante di Su Yu.

¹¹I e testimonio ta esaki, ku Dios a duna nos bida eterno, i e bida aki ta den Su Yu.

¹²Esun ku tin e Yu tin e bida; esun ku no tin e Yu di Dios no tin e bida.

¹³E kosnan aki mi a skirbi boso ku ta kere den e nomber di e Yu di Dios, pa boso por sa ku boso tin bida eterno.

¹⁴I esaki ta e konfiansa ku nos tin Su dilanti, ku si nos pidi kualkier kos konforme Su boluntat, E ta tende nos.

¹⁵I si nos sa ku E ta tende nos den tur loke nos pidi, nos sa ku nos tin e petishonnan ku nos a pidi di djé.

¹⁶Si un hende mira su ruman ta komete un pika ku no ta hiba na morto, e mester pidi Dios, i Dios, pa su motibu, lo duna bida na esnan ku ta komete pika ku no ta hiba na morto. Tin un pika ku ta hiba na morto; mi no ta bisa ku e mester pidi pa esaki.

¹⁷Tur inhustisia ta pika, i tin un pika ku no ta hiba na morto.

¹⁸Nos sa ku ni un hende ku ta nasi di Dios no ta hasi pika; ma Esun ku a nase di Dios ta ward'e, i e malbado no ta mishi kune.

¹⁹Nos sa ku nos ta di Dios, i henter mundu ta bou di kontrol di e malbado.

²⁰I nos sa ku e Yu di Dios a bin, i a duna nos komprendementu, pa nos konose Esun ku ta berdadero, i nos ta den Esun ku ta berdadero, den Su Yu Jesu-Cristo. Esaki ta e Dios berdadero i bida eterno.

²¹Yu chikitunan, warda boso di ldolonan.