Read Papantla Totonac Huesnan 1 Bible Online

Huesnan 1 - Papantla Totonac bible

Huesnan 1

¹Awor a sosode ku despues di e morto di Josue e yunan di Israel a puntra SENOR, bisando: "Ken mester bai prome pa nos kontra e kananeonan, pa bringa kontra nan?"

²I SENOR a bisa: "Juda mester bai; mira, Mi a entrega e tera den su man."

³E ora ei Juda a bisa su ruman Simeon: "Ban ku mi den e teritorio ku a wordu duna na mi pa medio di lot, pa nos bringa kontra e kananeonan; anto ami tambe lo bai ku bo den e teritorio ku a wordu duna na bo pa medio di lot." Asina Simeon a bai kune.

⁴I Juda a subi bai, i SENOR a entrega e kananeonan i e ferezeonan den nan man; i nan a derota dies mil homber na Bezek.

⁵I nan a hana Adoni-bezek na Bezek i a bringa kontra dje, i nan a derota e kananeonan i e ferezeonan.

⁶Ma Adoni-bezek a hui; i nan a persiguie i a koh'e prezo, i a korta su duimnan i su dede grandinan di pia kit'afo.

⁷I Adoni-bezek a bisa: "Setenta rei ku nan duimnan i nan dede grandinan di pia korta afo tabatin kustumber di piki sobra di kuminda bou di mi mesa; manera mi a hasi, asina Dios a pagami." Asina nan a hib'e Jerusalem i el a muri ayanan.

⁸E ora ei e yu hombernan di Juda a bringa kontra Jerusalem i a kaptur'e; nan a dal e ku filo di spada i a pega e stat na kandela.

⁹I despues e yunan di Juda a baha bai bringa kontra e kananeonan ku tabata biba den e serunan, den Negev i den sabana.

¹⁰Asina Juda a bai kontra e kananeonan ku tabata biba na Hebron (awor nomber di Hebron antes tabata Kiriat-arba); i nan a mata Sesai i Ahiman i Talmai.

¹¹I for di ayanan el a bai kontra e habitantenan di Debir (awor nomber di Debir antes tabata Kiriat-sefer).

¹²I Kaleb a bisa: "Esun ku ataka Kiriat-sefer i kaptur'e, esei lo mi duna mi yu muhe Aksa komo esposa."

¹³I Otoniel, yu homber di Kenas, Kaleb su ruman homber mas chikitu, a kaptur'e; asina el a dun'e su yu muhe Aksa komo esposa.

¹⁴E ora ei a sosode ku ora Aksa a bin serka dje, el a konvens'e pa pidi su tata un kunuku. Anto Aksa a baha for di su buriku, i Kaleb a bis'e: "Kiko bo kier?"

¹⁵I Aksa a bis'e: "Dunami un bendishon; unabes ku bo a dunami tera di Negev, dunami tambe fuentenan di awa." Asina Kaleb a dun'e e fuentenan ariba i e fuentenan abou.

¹⁶I e desendientenan di e keneo, Moises su suegro, a bai for di e stat di palma, huntu ku e yu hombernan di Juda, na e desierto di Juda ku ta keda den suit di Arad; i nan a bai i a keda biba serka e pueblo.

¹⁷E ora ei Juda a bai ku su ruman Simeon, i nan a mata e kananeonan ku tabata biba na Sefat, i a destrui esaki kompletamente. Pesei e stat ei a wordu yama Horma.

¹⁸I Juda a kohe Gaza ku su teritorio, Askalon ku su teritorio i Ekron ku su teritorio.

¹⁹Awor SENOR tabata ku Juda, i nan a podera di e serunan; ma nan no por a kore ku e habitantenan di e vaye, pasobra nan tabatin garoshi di heru.

²⁰E ora ei nan a duna Hebron na Kaleb, manera Moises a priminti; i el a kore ku e tres yu hombernan di Anak for di ayanan.

²¹Ma e yu hombernan di Benjamin no a kore ku e jebuseonan ku tabata biba na Jerusalem; asina ku e jebuseonan a keda biba huntu ku e yu hombernan di Benjamin na Jerusalem te dia djawe.

²²Na e mesun manera kas di Jose a bai kontra Bet-el, i SENOR tabata ku nan.

²³I kas di Jose a spiona Bet-el (awor nomber di e stat antes tabata Luz).

²⁴I e spionnan a mira un homber ta sali for di e stat, i nan a bis'e: "Pa fabor, mustra nos e entrada pa e stat i nos lo tratabo bon."

²⁵Asina el a mustra nan e entrada pa e stat, i nan a dal e stat ku filo di spada; ma e homber i henter su famia nan a laga bai.

²⁶I e homber a bai den e tera di e heteonan i a traha un stat i a yam'e Luz, ku ta su nomber te dia djawe.

²⁷Ma Manases no a podera di Bet-sean ku su pueblitonan, ni di Taanak ku su pueblitonan, ni di e habitantenan di Dor ku su pueblitonan, ni di e habitantenan di Ibleam ku su pueblitonan, ni di e habitantenan di Meguido ku su pueblitonan, pasobra e kananeonan tabata determina pa keda biba den e tera ei.

²⁸I a sosode ku ora Israel a bira fuerte, nan a pone e kananeonan hasi trabou forsa, ma nan no a kore ku nan kompletamente.

²⁹Efrain tampoko no a kore ku e kananeonan ku tabata biba na Gezer; asina ku e kananeonan a keda biba na Gezer meimei di nan.

³⁰Zabulon no a kore ku e habitantenan di Kitron, ni ku e habitantenan di Naalal; asina ku e kananeonan a keda biba meimei di nan i mester a hasi trabou forsa.

³¹Aser no a kore ku e habitantenan di Ako, ni ku e habitantenan di Sidon, ni di Ahlab, ni di Akzib, ni di Helba, ni di Afek, ni di Rehob.

³²Asina e aseritanan tabata biba meimei di e kananeonan, e habitantenan di e tera; pasobra nan no a kore ku nan.

³³Neftali no a kore ku e habitantenan di Bet-semes, ni ku e habitantenan di Bet-anat, ma a keda biba meimei di e kananeonan, e habitantenan di e tera; i e habitantenan di Bet-semes i Bet-anat mester a hasi trabou forsa pa nan.

³⁴Anto e amoreonan a obliga e yu hombernan di Dan pa bai den e serunan, pasobra nan no a permit! nan baha bin den e vaye.

³⁵I e amoreonan tabata determina pa keda biba den Seru Heres, na Ajalon i na Saalbim; ma ora ku e poder di e kas di Jose a bira mas grandi, nan mester a hasi trabou forsa.

³⁶I e frontera di e amoreonan tabata kore for di e subida di Akrabim, for di Sela bai ariba.