Read Papantla Totonac Huesnan 10 Bible Online

Huesnan 10 - Papantla Totonac bible

Huesnan 10

¹Awor despues ku Abimelek a muri, Tola, yu homber di Pua, yu di Dodo, un homber di Isakar, a lanta pa salba Israel; i e tabata biba na Samir den e serunan di Efrain.

²I el a huzga Israel bint'i tres ana. Anto el a muri i a wordu dera na Samir.

³I despues di dje Jair e galaadita a lanta, i a huzga Israel bint'i dos ana.

⁴I e tabatin trinta yu homber ku tabata kore riba trinta buriku, i nan tabatin trinta stat na tera di Galaad, ku ta wordu yama e statnan di Jair te dia djawe.

⁵I Jair a muri i a wordu dera na Kamon.

⁶Anto e yunan di Israel a bolbe hasi maldat den bista di SENOR i tabata sirbi e Baalnan i e Astarot, e diosnan di Siria, e diosnan di Sidon, e diosnan di Moab, e diosnan di e yu hombernan di Amon, i e diosnan di e filisteonan; asina nan a bandona SENOR i no a sirbié.

⁷I e rabia di SENOR a kima kontra Israel, i El a bende nan ku e filisteonan i ku e yu hombernan di Amon.

⁸I nan a afligi i a oprimi e yunan di Israel e ana ei; diesocho ana largu nan a afligi tur e yunan di Israel ku tabata na e otro banda di Jordan na Galaad, na tera di e amoreonan.

⁹I e yu hombernan di Amon a krusa Jordan pa bringa tambe kontra Juda, Benjamin i e kas di Efrain, asina ku Israel a wordu afligi grandemente.

¹⁰E ora ei e yunan di Israel a sklama na SENOR, bisando: "Nos a peka kontra Bo, pasobra di berdat nos a bandona nos Dios i a sirbi e Baalnan."

¹¹I SENOR a bisa e yunan di Israel: "No t'asina ku Mi a libra boso for di e egipsionan, e amoreonan, e yu hombernan di Amon i e filisteonan?

¹²Tambe ora ku e sidonionan, e amalekitanan i e maonitanan tabata oprimi boso, boso a sklama na Mi, i Mi a libra boso for di nan man.

¹³Tog boso a bandonaMi i a sirbi otro diosnan; pesei lo Mi no libra boso mas.

¹⁴Bai sklama na e diosnan ku boso a skohe; laga nan libra boso den tempu di boso angustia."

¹⁵I e yunan di Israel a bisa SENOR: "Nos a peka. Hasi ku nos manera Bo ta hana ta bon. Ma pa fabor, libra nos awe mes."

¹⁶Asina nan a kita e diosnan stranhero for di meimei di nan i a sirbi SENOR; i E no por a soporta e miseria di Israel mas.

¹⁷Anto e yu hombernan di Amon a wordu yama huntu i nan a kampa na Galaad. I e yunan di Israel a reuni i a kampa na Mizpa.

¹⁸I e pueblo, e lidernan di Galaad, a bisa otro: "Ken ta e homber ku lo kuminsa bringa kontra e yu hombernan di Amon? E lo bira kabesante di tur e habitantenan di Galaad."