Read Papantla Totonac Huesnan 11 Bible Online

Huesnan 11 - Papantla Totonac bible

Huesnan 11

¹Awor Jefte e galaadita tabata un guerero balente, ma e tabata yu di un prostituta. I Galaad tabata tata di Jefte.

²I Galaad su esposa a hana yu hombernan p'e; i ora ku e yu hombernan di su esposa a bira grandi, nan a kore ku Jefte i a bis'e: "Lo bo no tin erensia den kas di nos tata, pasobra bo ta yu di un otro muhe."

³Asina Jefte a hui bai for di su rumannan i a biba den tera di Tob; i hombernan perverso a uni ku Jefte i nan tabata sali kune.

⁴I a sosode ku despues di poko tempu e yu hombernan di Amon a bai bringa kontra Israel.

⁵I a sosode ku ora e yu hombernan di Amon tabata bringa kontra Israel, e ansianonan di Galaad a bai buska Jefte na tera di Tob;

⁶i nan a bisa Jefte: "Bin i sea nos hefe, pa nos bringa kontra e yu hombernan di Amon."

⁷E ora ei Jefte a bisa e ansianonan di Galaad: "Boso no tabata odiami i a kore ku mi for di e kas di mi tata? Pakiko anto boso a bin serka mi awor ku boso ta den problema?"

⁸I e ansianonan di Galaad a bisa Jefte: "Pa e motibu aki nos a bolbe serka bo awor, pa bo bai ku nos i bringa kontra e yu hombernan di Amon i bira kabesante di tur e habitantenan di Galaad."

⁹Asina Jefte a bisa e ansianonan di Galaad: "Si boso hibami bek pa bringa kontra e yu hombernan di Amon i SENOR entrega nan na mi, lo mi bira boso kabesante?"

¹⁰I e ansianonan di Galaad a bisa Jefte: "SENOR ta testigu entre nos; siguramente nos lo hasi manera bo a bisa."

¹¹E ora ei Jefte a bai ku e ansianonan di Galaad, i e pueblo a hasie kabesante i hefe riba nan; i Jefte a papia tur su palabranan dilanti di SENOR na Mizpa.

¹²Awor Jefte a manda mensaheronan serka e rei di e yu hombernan di Amon, bisando: "Ta kiko tin entre abo i ami, ku bo a bin pa bringa kontra mi tera?"

¹³I e rei di e yu hombernan di Amon a bisa e mensaheronan di Jefte: "Pasobra Israel a kohe mi tera tempu ku nan a bin for di Egipto, for di Arnon te na Jabok i Jordan. Pesei debolbe e teranan na pas awor."

¹⁴Ma Jefte a bolbe manda mensaheronan serka e rei di e yu hombernan di Amon,

¹⁵i nan a bis'e: "Asina Jefte ta bisa: 'Israel no a kohe tera di Moab ni tera di e yu hombernan di Amon.

¹⁶Pasobra ora nan a bin di Egipto, i Israel a pasa dor di desierto bai Laman Kora, yega Kades,

¹⁷Israel a manda mensaheronan serka rei di Edom, bisando: "Pa fabor, laga nos pasa dor di bo tera," ma rei di Edom no kier a skucha. I nan a manda rospondi pa rei di Moab tambe, ma el a nenga. Pesei Israel a keda Kades.

¹⁸'Anto nan a pasa dor di desierto i ront di tera di Edom i tera di Moab, i a yega banda pariba di tera di Moab, i nan a kampa na e otro banda di Arnon; ma nan no a drenta teritorio di Moab, pasobra Arnon tabata e frontera di Moab.

¹⁹'I Israel a manda mensaheronan serka Sehon, rei di e amoreonan, rei di Hesbon, i Israel a bis'e: "Pa fabor, laga nos pasa dor di bo tera bai nos luga."

²⁰Ma Sehon no tabata konfia Israel pa pasa dor di su teritorio; pesei Sehon a reuni tur su hendenan i a kampa na Jahaza, i a bringa kontra Israel.

²¹'I SENOR, e Dios di Israel, a entrega Sehon i henter su pueblo den man di Israel, i nan a derota nan; asina Israel a podera di henter e tera di e amoreonan, e habitantenan di e pais ei.

²²Asina nan a podera di henter e teritorio di e amoreonan, for di Arnon te na Jabok, i for di desierto te na Jordan.

²³'Siendo ku SENOR, e Dios di Israel, a kore ku e amoreonan for di dilanti di Su pueblo Israel, ta ki derecho abo tin awor pa podera di dje?

²⁴No t'asina ku bo ta podera di loke bo dios Kemos ta dunabo pa bo podera di dje? Na mes manera anto, tur loke SENOR nos Dios ta podera di dje nos dilanti, nos lo podera di dje.

²⁵I awor, akaso bo ta miho ku Balak, yu homber di Zipor, rei di Moab? El a yega di tin desunion ku Israel, of el a yega di bringa kontra nan?

²⁶Tres shen ana largu Israel tabata biba na Hesbon ku su pueblitonan i na Aroer ku su pueblitonan, i den tur e statnan ku ta keda na e oriyanan di Arnon. Pakiko bo no a rekobra nan durante di e tempu ei?

²⁷Pesei ami no a peka kontra bo, ma abo ta hasi malu ku mi dor di bringa kontra mi; ku SENOR, e Hues, huzga awe entre e yunan di Israel i e yu hombernan di Amon.'"

²⁸Ma e rei di e yu hombernan di Amon no a hasi kaso di e mensahe ku Jefte a manda p'e.

²⁹Awor e Spiritu di SENOR a bin riba Jefte, asina ku el a pasa dor di Galaad i Manases; despues el a pasa dor di Mizpa di Galaad, i for di Mizpa di Galaad el a sigui bai serka e yu hombernan di Amon.

³⁰I Jefte a hasi un promesa na SENOR i a bisa: "Si di berdat Bo entrega e yu hombernan di Amon den mi man,

³¹e ora ei kiko ku sali for di e portanan di mi kas pa kontrami ora mi bolbe na pas for di e yu hombernan di Amon, lo ta di SENOR, i lo mi ofrese esaki komo un ofrenda kima."

³²Asina Jefte a krusa bai serka e yu hombernan di Amon pa bringa kontra nan, i SENOR a entrega nan den su man.

³³I el a derota nan den un matansa masha grandi mes for di Aroer te na entrada di Minit, binti stat, i te na Abel-keramin. Asina e yu hombernan di Amon a keda someti na e yunan di Israel.

³⁴Ora Jefte a yega su kas na Mizpa, ata su yu muhe a sali pa kontr'e ku tamburein i ku baliamentu. Awor e tabata su uniko yu; fuera di dje e no tabatin ni yu homber ni yu muhe.

³⁵I a sosode ku ora ku el a mir'e, el a sker su pananan i a bisa: "Ai, mi yu! Bo a kibra mi kurason, i bo ta entre esnan ku ta hinkami den problema; pasobra mi a duna SENOR mi palabra, i mi no por hala esaki atras."

³⁶Anto el a bis'e: "Mi tata, bo a duna SENOR bo palabra; hasi ku mi manera bo a bisa, komo ku SENOR a tuma vengansa riba bo enemigunan, e yu hombernan di Amon."

³⁷I el a bisa su tata: "Hasi e kos aki pa mi; lagami dos luna mi so, pa mi bai den e serunan i yora pa motibu di mi birginidat, ami ku mi kompaneranan."

³⁸E ora ei su tata a bisa: "Bai numa." Asina el a mand'e bai pa dos luna; i el a bai ku su kompaneranan, i a yora den e serunan pa motibu di su birginidat.

³⁹I a sosode ku despues di dos luna el a bolbe serka su tata, kende a hasi kune konforme e promesa ku el a hasi; i nunka e no tabatin relashon ku homber. Asina esaki a bira un kustumber na Israel,

⁴⁰ku tur ana e yu muhenan di Israel tabata bai pa rekorda yu muhe di Jefte e galaadita pa kuater dia.