Read Papantla Totonac Huesnan 12 Bible Online

Huesnan 12 - Papantla Totonac bible

Huesnan 12

¹E ora ei e hombernan di Efrain a wordu yama huntu, i nan a krusa bai Zefon i a bisa Jefte: "Pakiko bo a krusa bai bringa kontra e yu hombernan di Amon sin yama nos pa bai ku bo? Nos lo kima bo kas ku bo aden."

²I Jefte a bisa nan: "Ami ku mi pueblo tabatin un konflikto grandi ku e yu hombernan di Amon; ora mi a yama boso, boso no a librami for di nan man.

³I ora mi a mira ku boso lo no a librami, mi a riska mi bida i a krusa bai kontra e yu hombernan di Amon, i SENOR a entrega nan den mi man. Pakiko anto boso a bin awe serka mi pa bringa kontra mi?"

⁴E ora ei Jefte a reuni tur e hombernan di Galaad i a bringa kontra Efrain; i e hombernan di Galaad a derota Efrain, pasobra nan a bisa: "Boso ta fugitivo di Efrain, O galaaditanan, meimei di Efrain i meimei di Manases."

⁵I e galaaditanan a kaptura e vadonan di Jordan enfrente di Efrain. I a sosode ku ki ora ku kualkier di e fugitivonan di Efrain bisa: "Lagami krusa," e hombernan di Galaad tabata bis'e: "Bo ta un efrateo?" Si e bisa: "No,"

⁶e ora ei nan tabata bis'e: "Bisa 'Shibolet' anto." I si e bisa "Sibolet", pasobra e no por a pronunsi'e korektamente, e ora ei nan tabata gar'e i mat'e na e vadonan di Jordan. Asina kuarent'i dos mil homber di Efrain a muri e tempu ei.

⁷I Jefte a huzga Israel seis ana. Anto Jefte e galaadita a muri i a wordu dera den un di e statnan di Galaad.

⁸Awor despues di dje Ibzan di Betlehem a huzga Israel.

⁹I e tabatin trinta yu homber, i trinta yu muhe ku el a kasa fuera di su famia, i el a trese trinta yu muhe di otro luga pa su yu hombernan. I el a huzga Israel shete ana.

¹⁰Anto Ibzan a muri i a wordu dera na Betlehem.

¹¹Awor Elon e zabulonita a huzga Israel despues di dje; i el a huzga Israel dies ana.

¹²Anto Elon e zabulonita a muri i a wordu dera na Ajalon na tera di Zabulon.

¹³Awor Abdon, yu homber di Hilel e piratonita, a huzga Israel despues di dje.

¹⁴I e tabatin kuarenta yu homber i trinta nietu, kendenan tabata kore riba setenta buriku; i el a huzga Israel ocho ana.

¹⁵Anto Abdon, yu homber di Hilel e piratonita, a muri i a wordu dera na Piraton na tera di Efrain, den e serunan di e amalekitanan.