Read Papantla Totonac Huesnan 13 Bible Online

Huesnan 13 - Papantla Totonac bible

Huesnan 13

¹Awor e yunan di Israel a bolbe hasi maldat den bista di SENOR, asina ku SENOR a entrega nan den man di e filisteonan pa kuarenta ana.

²I tabatin un homber di Zora, di e famia di e danitanan, ku tabata yama Manoa; i su esposa tabata steril i no a hana yu.

³Anto e Angel di SENOR a parese na e muhe, i a bis'e: "Mir'aki, bo ta steril i no a hana yu, ma lo bo konsebi i duna lus na un yu homber.

⁴Pesei anto, tene kuidou pa bo no bebe bina ni bibida sterki, ni kome nada impuru.

⁵Pasobra mira, lo bo konsebi i duna lus na un yu homber, i nabaha lo no pasa riba su kabes, pasobra e mucha lo ta un nazareo pa Dios for di den barika di su mama; i e lo kuminsa libra Israel for di man di e filisteonan."

⁶E ora ei e muhe a bin i a konta su esposo, bisando: "Un Homber di Dios a bin serka mi i Su aparensia tabata manera aparensia di e Angel di Dios, masha temibel. I mi no a puntr'E di unda El a bin, ni E no a bisami Su nomber.

⁷Ma El a bisami: 'Mira, lo bo konsebi i duna lus na un yu homber, i pesei lo bo no bebe bina ni bibida sterki, ni kome nada impuru, pasobra e mucha lo ta un nazareo pa Dios for di den barika di su mama te na e dia di su morto.'"

⁸Anto Manoa a suplika SENOR i a bisa: "O SENOR, pa fabor, laga e Homber di Dios ku Bo a manda bin serka nos atrobe, pa E sina nos kiko nos mester hasi pa e mucha ku mester nase."

⁹I Dios a skucha bos di Manoa; i e Angel di Dios a bolbe bin serka e muhe ora ku e tabata sinta den kunuku, ma su esposo Manoa no tabata huntu kune.

¹⁰Asina e muhe a kore bai lihe i a bisa su esposo: "Mira, e Homber ku a bin poko dia ei a parese na mi."

¹¹E ora ei Manoa a lanta i a sigui su esposa, i ora ku el a yega serka e Homber, el a bis'E: "Ta Abo ta e Homber ku a papia ku e muhe?" I El a bisa: "Si, ta Ami."

¹²I Manoa a bisa: "Awor ora Bo palabranan wordu kumpli, kon e mucha su manera di biba i su vokashon mester ta?"

¹³Asina e Angel di SENOR a bisa Manoa: "Laga e muhe paga atenshon na tur loke Mi a bisa.

¹⁴E no mester kome nada ku ta bin di mata di wendruif ni bebe bina ni bibida sterki, ni kome nada impuru; lagu'e hasi tur loke Mi a ordena."

¹⁵E ora ei Manoa a bisa e Angel di SENOR: "Pa fabor, permit! nos teneBo poko mas pa nos por prepara un yu di kabritu pa Bo."

¹⁶I e Angel di SENOR a bisa Manoa: "Maske bo teneMi poko mas, lo Mi no kome bo kuminda. Ma si bo prepara un ofrenda kima, bo mester ofrese esei na SENOR." Pasobra Manoa no tabata sa ku E tabata e Angel di SENOR.

¹⁷I Manoa a bisa e Angel di SENOR: "Kon Bo nomber ta, pa ora Bo palabranan wordu kumpli nos por dunaBo onor?"

¹⁸Ma e Angel di SENOR a bis'e: "Pakiko bo ta puntra Mi nomber, siendo ku esaki ta maraviyoso?"

¹⁹Asina Manoa a kohe e yu di kabritu ku e ofrenda di mainshi i riba e baranka el a ofrese esaki na SENOR; i El a hasi maraviyanan, mientras ku Manoa i su esposa tabata para wak.

²⁰Pasobra a sosode ku ora ku e flam a subi bai laira for di e altar, e Angel di SENOR a subi bai den e flam di e altar. Ora Manoa i su esposa a mira esaki, nan a tira nan kurpa abou ku nan kara te na suela.

²¹Awor e Angel di SENOR no a parese mas na Manoa ni na su esposa. E ora ei Manoa a bin komprende ku E tabata e Angel di SENOR.

²²Pesei Manoa a bisa su esposa: "Nos lo muri sigur, pasobra nos a mira Dios."

²³Ma su esposa a bis'e: "Si SENOR kier a mata nos, E lo no a asepta un ofrenda kima i un ofrenda di mainshi for di nos man, ni E lo no a mustra nos tur e kosnan aki, ni E lo no a laga nos tende kosnan asina awor aki."

²⁴Asina e muhe a duna lus na un yu homber i a yam'e Samson; i e mucha a bira grandi i SENOR a bendishon'e.

²⁵I e Spiritu di SENOR a kuminsa mov'e na Mahaneh-dan, entre Zora i Estaol.