Read Papantla Totonac Huesnan 14 Bible Online

Huesnan 14 - Papantla Totonac bible

Huesnan 14

¹Awor Samson a baha bai Timna i a mira un muhe na Timna, un di e yu muhenan di e filisteonan.

²Anto el a bin bek i a konta su tata i su mama: "Mi a mira un muhe na Timna, un di e yu muhenan di e filisteonan; pesei awor, busk'e pa mi komo esposa."

³E ora ei su tata i su mama a bis'e: "Ta ningun muhe no tin entre e yu muhenan di bo famianan, of entre henter nos pueblo, ku bo ta bai buska un esposa serka e filisteonan insirkumsida?" Ma Samson a bisa su tata: "Busk'e pa mi, pasobra t'e mi ta gusta."

⁴Ma su tata i mama no tabata sa ku esaki tabata di SENOR, pasobra E tabata buska un oportunidat kontra e filisteonan. Awor e tempu ei e filisteonan tabata goberna Israel.

⁵Anto Samson a baha bai Timna ku su tata i mama i a yega te na e kunukunan di wendruif di Timna; i mira, un leon chikitu a bin kontra dje ta gruna.

⁶I e Spiritu di SENOR a bin riba dje ku poder, asina ku el a sker e leon manera hende ta sker un yu di kabritu, ounke ku e no tabatin nada den su man; ma e no a konta su tata ni su mama kiko el a hasi.

⁷Anto el a baha bai papia ku e muhe; i Samson a gust'e.

⁸Ora ku el a bai bek despues pa tum'e, el a kita for di kaminda pa wak e kadaver di e leon; i mira, tabatin un neishi di abeha i miel den kurpa di e leon.

⁹Asina el a raspa e miel tum'e den su man i a sigui bai, mientras ku e tabata kome. Ora ku el a yega serka su tata i mama, el a duna nan un tiki, i nan a kome; ma e no a bisa nan ku el a raspa e miel sak'e for di den kurpa di e leon.

¹⁰Despues su tata a bai serka e muhe; i Samson a pone un fiesta ayanan, pasobra e yonkumannan tabatin kustumber di hasi esaki.

¹¹I a sosode ku ora nan a mir'e, nan a trese trinta kompanero pa keda serka dje.

¹²Anto Samson a bisa nan: "Awor lagami duna boso un charada; si di berdat boso saka e charada denter di e shete dianan di fiesta, i hana sa kiko e ta, e ora ei lo mi duna boso trinta pana-djabou di lino i trinta set di pana-pa-kambia.

¹³Ma si boso no por bisami, e ora ei boso mester dunami trinta pana-dj abou di lino i trinta set di pana-pa-kambia." I nan a bis'e: "Tira bo charada pa nos tende."

¹⁴Asina el a bisa nan: "For di e komedo a sali algu pa kome, i for di esun fuerte a sali algu dushi." Ma nan no por a saka e charada den tres dia.

¹⁵E ora ei a sosode ku riba e di kuater dia nan a bisa Samson su esposa: "Papia dushi-dushi ku bo esposo, lok e pa e bisa nos e charada, pa nos no kima abo i e kas di bo tata ku kandela. Ta pa hasi nos bira pober bo a invita nos, si of no?"

¹⁶I Samson su esposa a yora su dilanti i a bisa: "Ta odia so bo ta odiami, i bo no ta stimami; bo a duna e yunan di mi pueblo un charada i bo no a kontami kiko e ta." I el a bis'e: "Mira, mi no a konta ni mi tata ni mi mama, anto mi mester konta abo?"

¹⁷Ma Samson su esposa a yora shete dia su dilanti, mientras ku nan fiesta tabata dura. I a sosode ku riba e di shete dia Samson a kont'e, pasobra el a pone asina tantu preshon riba dje. E ora ei el a konta e yu hombernan di su pueblo e charada.

¹⁸Asina e hombernan di e stat a bisa Samson riba e di shete dia, prome ku solo a baha: "Kiko ta mas dushi ku miel? I kiko tin mas forsa ku un leon?" I el a bisa nan: "Si boso no a plug ku mi bishe, boso lo no a hana sa mi charada."

¹⁹E ora ei e Spiritu di SENOR a bin riba dje ku poder, i el a baha bai Askalon, i a mata trinta di nan hombernan i a kohe nan botin, i a duna e setnan di pana-pa-kambia na esnan ku a saka e charada. I su rabia a sende, i el a bai kas di su tata.

²⁰Ma Samson su esposa a wordu duna na su kompanero ku tabata su amigu.