Read Papantla Totonac Huesnan 15 Bible Online

Huesnan 15 - Papantla Totonac bible

Huesnan 15

¹Ma despues di poko tempu, den tempu di kosecha di trigo, a sosode ku Samson a bai bishita su esposa ku un yu di kabritu, i a bisa: "Lo mi bai serka mi esposa den su kamber." Ma tata di su esposa no a lagu'e drenta.

²I su tata a bisa: "Mi a kere ku berdaderamente bo tabata odi'e masha hopi mes, pesei mi a dun'e na bo kompanero. Su ruman muhe mas chikitu no ta mas bunita kune? Pa fabor, tum'e na su luga."

³E ora ei Samson a bisa nan: "E biaha aki lo mi ta sin kulpa dilanti di e filisteonan, ora mi hasi nan dano."

⁴I Samson a bai i a kohe tres shen zoro; i el a kohe flambeu i a mara e zoronan na nan rabu, dos-dos huntu, i a pone un flambeu meimei di dos rabu.

⁵Ora ku el a pega e flambeunan na kandela, el a los e zoronan den e kunuku di trigo di e filisteonan, i asina a kima tantu e bohinan komo e trigo ku tabata den kunuku, huntu ku e kunukunan di wendruif i e hofinan di oleifi.

⁶E ora ei e filisteonan a bisa: "Ta ken a hasi esaki?" I nan a bisa: "Ta Samson, yerno di e timnateo, pasobra el a kohe su esposa dun'e na su kompanero." Asina e filisteonan a bin i a kima tantu e komo su tata ku kandela.

⁷I Samson a bisa nan: "Komo ku boso ta hasi asina, siguramente lo mi tuma vengansa riba boso, ma despues di esei lo mi stop."

⁸I el a mata nan sin miserikordia den un gran matansa; i el a bai biba den e spleit di e baranka di Etam.

⁹Anto e filisteonan a bai i a kampa na Juda, i a plama tur kaminda na Lehi.

¹⁰I e hombernan di Juda a bisa: "Pakiko boso a bin kontra nos?" I nan a bisa: "Nos a bin pa mara Samson, pa hasi kune manera el a hasi ku nos."

¹¹E ora ei tres mil homber di Juda a baha bai na e spleit di e baranka di Etam i a bisa Samson: "Bo no sa ku ta e filisteonan ta goberna riba nos? Ta kiko esaki ta anto ku bo a hasi ku nos?" I el a bisa nan: "Manera nan a hasi ku mi, asina mi a hasi ku nan."

¹²I nan a bis'e: "Nos a bin pa marabo, pa nos entregabo den man di e filisteonan." I Samson a bisa nan: "Hurami ku boso lo no matami."

¹³Asina nan a bis'e: "No, nos lo marabo i entregabo den nan man si; ma sigur-sigur nos lo no matabo." E ora ei nan a mar'e ku dos kabuya nobo i a sak'e for di e baranka.

¹⁴Ora ku el a yega Lehi, e filisteonan a bin kontr'e na gritamentu. I e Spiritu di SENOR a bin riba dje ku poder, asina ku e kabuyanan ku tabatin na su brasanan a bira manera lino kima ku kandela, i su kabuyanan a kai for di su mannan.

¹⁵I el a hana un kakumbein di buriku, ku no a seka ainda, i el a rek su man koh'e i a mata mil homber kune.

¹⁶E ora ei Samson a bisa: "Ku kakumbein di un buriku, monton riba monton, ku kakumbein di un buriku mi a mata mil homber."

¹⁷I a sosode ku ora el a kaba di papia, el a tira e kakumbein afo; i el a yama e luga ei Ramat-lehi.

¹⁸Anto el a hana hopi set, i el a sklama na SENOR i a bisa: "Bo a duna e gran liberashon aki pa medio di man di Bo sirbido, i awor mi mester muri di set i kai den man di hendenan insirkumsida?"

¹⁹Ma Dios a spleit e spelonk ku ta keda na Lehi, asina ku a sali awa for di dje. Ora ku el a bebe, su forsa a bolbe i el a rebiba. Pesei el a yam'e En-hakore, ku ta keda na Lehi te dia djawe.

²⁰Asina el a huzga Israel binti ana den e dianan di e filisteonan.