Read Papantla Totonac Huesnan 16 Bible Online

Huesnan 16 - Papantla Totonac bible

Huesnan 16

¹Awor Samson a bai Gaza i a mira un prostituta ayanan, i a drumi kune.

²Ora nan a konta e gazeonan, bisando: "Samson a bin aki," nan a rondona e luga i a skonde ward'e henter anochi na e porta di stat. I nan a keda ketu henter anochi, bisando: "Laga nos warda te ora dia habri; e ora ei nos lo mat'e."

³Awor Samson a drumi te mei anochi, i mei anochi el a lanta i a kohe e portanan di stat i e dos balkinan tene, i a ranka nan saka nan ku tranka ku tur; anto el a pone nan riba su skouder i a karga nan hiba riba kabes di e seru ku ta keda enfrente di Hebron.

⁴Despues di esaki a sosode ku el a stima un muhe den e vaye di Sorek, kende su nomber tabata Dalila.

⁵I e prensnan di e filisteonan a bin serka dje i a bis'e: "Papia dushi-dushi ku Samson, i mira unda su forsa grandi ta sinta, i kon nos por podera di dje pa nos mar'e pa domin'e. E ora ei kada un di nos lo dunabo mil un shen pida plata."

⁶Asina Dalila a bisa Samson: "Pa fabor, kontami unda bo forsa grandi ta sinta, i kon bo por wordu mara pa dominabo."

⁷I Samson a bis'e: "Si nan marami ku shete rama berde, ku no a seka ainda, e ora ei lo mi bira debil i lo ta manera kualkier otro homber."

⁸E ora ei e prensnan di e filisteonan a trese shete rama berde p'e, ku no a seka ainda, i el a mar'e ku nan.

⁹Awor e tabatin hombernan skondi ta warda den un kamber paden. I el a bis'e: "E filisteonan ta riba bo, Samson!" Ma Samson a kibra e ramanan manera un drachi di hilu seliga ta kibra ora ku e bin den kontakto ku kandela. Asina su forsa no a wordu deskubri.

¹⁰E ora ei Dalila a bisa Samson: "Mira, ta gana bo a ganami i ta mentira bo a kontami; awor, pa fabor, kontami kon bo por wordu mara."

¹¹I Samson a bis'e: "Si nan marami duru ku kabuya nobo, ku no a wordu uza ainda, e ora ei lo mi bira debil i lo mi ta manera kualkier otro homber."

¹²Asina Dalila a kohe kabuya nobo i a mar'e ku nan i a bis'e: "E filisteonan ta riba bo, Samson!" Pasobra e hombernan tabata skonde warda den e kamber paden. Ma el a kibra e kabuyanan kita nan for di su brasanan manera ta kibra hilu.

¹³E ora ei Dalila a bisa Samson: "Te awor aki ta gana bo a ganami i ta mentira bo a kontami; awor kontami kon bo por wordu mara." I Samson a bis'e: "Si bo wef e shete loknan di mi kabei huntu ku e tela, i ten'e ku un speilu, e ora ei lo mi bira debil i lo mi ta manera kualkier otro homber."

¹⁴Asina, mientras ku e tabata drumi, Dalila a kohe e shete loknan di su kabei i a wef nan den e tela. I el a ten'e ku e speilu i a bis'e: "E filisteonan ta riba bo, Samson!" Ma el a lanta for di sono i a ranka e speilu di e aparato-pa-wef-tela sak'e huntu ku e tela.

¹⁵E ora ei Dalila a bis'e: "Kon bo por bisa: 'Mi ta stimabo,' mientras ku bo kurason no ta ku mi? Ta gana bo a ganami tur e tres biahanan aki, i bo no a kontami unda bo forsa grandi ta sinta."

¹⁶I a sosode ku dor ku Dalila tabata pone preshon riba dje tur dia ku su palabranan i tabata rogu'e, Samson a fada pa muri.

¹⁷Asina Samson a kont'e tur loke tabata riba su kurason i a bis'e: "Nunka nabaha no a pasa riba mi kabes, pasobra mi tabata un nazareo pa Dios for di den barika di mi mama. Si mi wordu feita, e ora ei mi forsa lo bai lagami i lo mi bira debil i lo ta meskos ku kualkier otro homber."

¹⁸Ora Dalila a mira ku el a kont'e tur loke tabata riba su kurason, el a manda yama e prensnan di e filisteonan, bisando: "Bin un biaha mas, pasobra el a kontami tur loke ta riba su kurason." Anto e prensnan di e filisteonan a bin serka dje, i a trese e plaka den nan man.

¹⁹I Dalila a hasie drumi riba su rudianan, i a manda yama un homber i a lagu'e feita e shete loknan di su kabei kit'afo. E ora ei Dalila a kuminsa domin'e, i Samson su forsa a bai lagu'e.

²⁰I Dalila a bisa: "E filisteonan ta riba bo, Samson!" I el a lanta for di sono i a bisa: "Lo mi sali bai manera otro biahanan, i libra mi mes." Ma e no tabata sa ku SENOR a bai for di dje.

²¹E ora ei e filisteonan a gar'e i a saka su wowonan; i nan a hib'e Gaza i a mar'e ku kadenanan di brons, i e tabata mulado di mainshi den prizon.

²²I e kabei di su kabes a kuminsa krese atrobe despues ku esaki a wordu feita.

²³Awor e prensnan di e filisteonan a reuni pa ofrese un gran sakrifisio na nan dios Dagon, i pa regosiha, pasobra nan a bisa: "Nos dios a entrega Samson, nos enemigu, den nos man."

²⁴Ora ku e hendenan a mir'e, nan a alaba nan dios, pasobra nan a bisa: "Nos dios a entrega nos enemigu den nos man, e destruktor di nos pais, kende a mata hopi di nos."

²⁵I a sosode ku ora nan kurason tabata kontentu, nan a bisa: "Yama Samson, pa e diberti nos." Asina nan a manda yama Samson for di prizon, i el a diberti nan. I nan a pon'e para meimei di e pilarnan.

²⁶E ora ei Samson a bisa e mucha homber ku tabata tene su man: "Lagami fula e pilarnan ku ta sostene e kas, pa mi len kontra nan."

²⁷Awor e kas tabata yen di homber i muhe, i tur e prensnan di e filisteonan tabat'ei. I mas o menos tres mil homber i muhe tabata riba dak ta wak, mientras ku Samson tabata diberti nan.

²⁸Anto Samson a sklama na SENOR i a bisa: "O Senor DIOS, pa fabor, korda riba mi i pa fabor, dunami forsa e biaha aki so, O Dios, pa mi tuma vengansa awor mes riba e filisteonan pa mi dos wowonan."

²⁹I Samson a kohe e dos pilarnan di meimei, ku ta sostene e kas, tene, i el a pusha su kurpa kontra nan, esun ku su man drechi i e otro ku su man robes.

³⁰I Samson a bisa: "Lagami muri huntu ku e filisteonan!" I el a dobla su kurpa ku tur su forsa, asina ku e kas a bash'abou riba e prensnan i riba henter e pueblo ku tabata den dje. Asina esnan ku el a mata na su morto tabata mas ku esnan ku el a mata durante di su bida.

³¹E ora ei su ruman hombernan i henter e kas di su tata a bin, a koh'e bai kune, i a der'e entre Zora i Estaol den e tumba di su tata Manoa. Asina el a huzga Israel binti ana.