Read Papantla Totonac Huesnan 17 Bible Online

Huesnan 17 - Papantla Totonac bible

Huesnan 17

¹Awor tabatin un homber di e serunan di Efrain, kende su nomber tabata Mikaia.

²I el a bisa su mama: "E mil un shen pida plata ku a wordu horta for di bo, i tokante di kual mi a tendebo ta pronunsia un maldishon, mira, t'ami tin e plata; ta ami a koh'e." I su mama a bisa: "Ku SENOR bendishonabo, mi yu."

³E ora ei el a debolbe su mama e mil un shen pida plata, i su mama a bisa: "Mi ta dedika kompletamente e plata for di mi man na SENOR, pa mi yu traha un imagen graba i un imagen basha; pesei, mi ta debolbebo nan."

⁴Asina ta ku ora el a debolbe su mama e plata, su mama a kohe dos shen pida plata i a duna esakinan na un plate, kende a traha un imagen graba i un imagen basha ku nan, i nan tabata den kas di Mikaia.

⁵I e homber Mikaia tabatin un kas pa diosnan i el a traha un efod i terafinnan, i a konsagra un di su yu hombernan pa bira su saserdote.

⁶Den e dianan ei no tabatin rei na Israel; kada hende tabata hasi loke tabata bon den su mes bista.

⁷Awor tabatin un hoben for di Betlehem na Juda, di e famia di Juda, kende tabata un levita; i e tabata keda ayanan komo stranhero.

⁸Anto e homber a bai for di e stat, for di Betlehem na Juda, pa keda kaminda e por hana un luga; i riba su biahe el a yega na e serunan di Efrain na kas di Mikaia.

⁹Anto Mikaia a bis'e: "For di unda bo ta bin?" I el a bis'e: "Mi ta un levita for di Betlehem na Juda, i mi ta bai keda kaminda mi hana un luga."

¹⁰E ora ei Mikaia a bis'e: "Keda biba serka mi i sea un tata i un saserdote pa mi, i lo mi dunabo dies pida plata pa ana, un set di pana, i bo manteneshon." Asina e levita a keda.

¹¹I e levita a bai di akuerdo pa keda biba serka e homber; i e hoben a bira p'e manera un di su yu hombernan.

¹²Asina Mikaia a konsagra e levita, i e hoben a bira su saserdote i a keda biba den e kas di Mikaia.

¹³Anto Mikaia a bisa: "Awor mi sa ku SENOR lo prosperami, mirando ku mi tin un levita komo saserdote."