Read Papantla Totonac Huesnan 18 Bible Online

Huesnan 18 - Papantla Totonac bible

Huesnan 18

¹Den e dianan ei no tabatin rei na Israel; i den e dianan ei e tribu di e danitanan tabata buska un erensia pa nan mes pa biba aden, pasobra te na e dia ei un erensia no a wordu duna na nan pa medio di lot komo un poseshon meimei di e tribunan di Israel.

²Asina e yu hombernan di Dan a manda di nan famia sinku homber for di nan teritorio, hombernan balente for di Zora i Estaol, pa spiona e tera i pa investigu'e; i nan a bisa nan: "Bai investiga e tera." I nan a yega na e serunan di Efrain, na e kas di Mikaia, i a hospeda ayanan.

³Ora nan tabata serka di e kas di Mikaia, nan a rekonose bos di e hoben levita; i nan a bira bai ayanan i a bis'e: "Ta ken a tresebo akinan? I ta kiko bo ta hasi na e luga aki? I ta kiko bo tin aki?"

⁴I el a bisa nan: "Tal i tal kos Mikaia a hasi pa mi, i el a kontratami, i mi a bira su saserdote."

⁵I nan a bis'e: "Pa fabor, puntra Dios, pa nos sa si e kaminda ku nos ta kana aki lo trese prosperidat."

⁶I e saserdote a bisa nan: "Bai na pas; e kaminda ku boso ta sigui tin SENOR Su aprobashon."

⁷E ora ei e sinku hombernan a bai i a yega Lais i a mira ku e pueblo ku tabata ayanan tabata biba den siguridat, segun e kustumber di e sidonionan, ketu i masha trankil; pasobra no tabatin gobernante ta umiya nan ku nada den e tera, i nan tabata leu for di e sidonionan i nan no tabatin nada di hasi ku ningun hende.

⁸Ora nan a bolbe serka nan ruman hombernan na Zora i Estaol, nan ruman hombernan a bisa nan: "Ki notisia boso tin?"

⁹I nan a bisa: "Lanta i laga nos ban kontra nan; pasobra nos a mira e tera, i at'e ta hopi bon. I boso ta sinta ketu? No tarda pa bai, pa drenta podera di e tera.

¹⁰Ora boso drenta, boso lo hana un pueblo masha trankil ku un tera espasioso; pasobra Dios a entrega esaki den boso man, un luga kaminda no tin falta di nada ku tin riba mundu."

¹¹Anto for di e famia di e danitanan, for di Zora i for di Estaol, a sali seis shen homber, arma ku armanan di guera.

¹²I nan a bai i a kampa na Kiriat-jearim na Juda. Pesei nan ta yama e luga ei Mahaneh-dan te dia djawe; mira, e ta keda pabou di Kiriat-jearim.

¹³I for di einan nan a pasa bai na e serunan di Efrain i a yega na e kas di Mikaia.

¹⁴E ora ei e sinku hombernan ku a bai spiona e tera di Lais a kontesta i a bisa nan parientenan: "Boso sa ku den e kasnan aki tin un efod i terafinnan, i un imagen graba i un imagen basha? Pesei awor, pensa bon kiko boso mester hasi."

¹⁵I nan a bira bai einan i a yega na e kas di e hoben levita, na e kas di Mikaia, i a puntr'e kon ta bai kune.

¹⁶I e seis shen hombernan ku tabata di e yunan di Dan, arma ku nan armanan di guera, tabata para na entrada di e porta di stat.

¹⁷Awor e sinku hombernan ku a bai spiona e tera a bai i a drenta paden, i a kohe e imagen graba i e efod, e terafinnan i e imagen basha, mientras ku e saserdote tabata para na entrada di e porta di stat huntu ku e seis shen hombernan arma ku armanan di guera.

¹⁸I ora ku esakinan a drenta e kas di Mikaia i a kohe e imagen graba, e efod, e terafinnan i e imagen basha, e saserdote a bisa nan: "Ta kiko boso ta hasi?"

¹⁹I nan a bis'e: "Keda ketu, pone bo man riba bo boka i ban ku nos, i sea un tata i un saserdote pa nos. Kiko ta miho pa bo: di ta saserdote pa kas di un homber so, of di ta saserdote pa un tribu i pa un famia na Israel?"

²⁰I e saserdote su kurason a bira kontentu, i el a kohe e efod, e terafinnan i e imagen graba, i a bai huntu ku e pueblo.

²¹E ora ei nan a bira bai, i a pone e mucha chikitunan i e bestianan di kria i e kosnan di balor bai nan dilanti.

²²Ora nan a yega un distansia for di e kas di Mikaia, e hombernan ku tabata den e kasnan banda di Mikaia su kas a bin huntu i a alkansa e yu hombernan di Dan.

²³I nan a grita e yu hombernan di Dan, kendenan a drai bisa Mikaia: "Ta kiko ta pasa boso ku boso a bin huntu?"

²⁴I el a bisa: "Mi diosnan ku mi a traha, i tambe e saserdote, boso a kohe bai kune. I kiko ami a keda kune? Ta kon anto boso por bisami: 'Ta kiko ta pasabo?'"

²⁵I e yu hombernan di Dan a bis'e: "No laga nos tende bo bos mas, pa hombernan violento no atakabo i bo perde bo bida, huntu ku bida di e hendenan di bo kas."

²⁶Asina e yu hombernan di Dan a sigui nan kaminda; i ora Mikaia a mira ku nan tabata muchu fuerte p'e, el a bira bai su kas bek.

²⁷Anto nan a kohe loke Mikaia a traha, i e saserdote ku tabata pertenese na dje, i a yega Lais, serka un pueblo ketu i masha trankil, i a dal nan ku filo di spada; i nan a kima e stat ku kandela.

²⁸I no tabatin ningun hende pa libra nan, pasobra e stat tabata keda leu for di Sidon, i nan no tabatin nada di hasi ku ningun hende; i e stat tabata keda den e vaye serka di Bet-rehob. I nan a rekonstrui e stat i a bai biba aden.

²⁹I nan a yama e stat Dan, na nomber di nan tata Dan, kende a nase na Israel; ma antes nomber di e stat tabata Lais.

³⁰I e yu hombernan di Dan a lanta e imagen graba pa nan mes; i Jonatan, yu homber di Gerson, yu homber di Manases, e ku su yu hombernan, tabata saserdote pa e tribu di e danitanan te dia ku e tera a wordu hiba den koutiverio.

³¹Asina nan a lanta pa nan mes e imagen graba, ku Mikaia a traha, (i esaki a keda einan) tur e tempu ku e kas di Dios tabata na Silo.