Read Papantla Totonac Huesnan 19 Bible Online

Huesnan 19 - Papantla Totonac bible

Huesnan 19

¹Awor a sosode den e dianan ei, tempu ku no tabatin rei na Israel, ku tabatin un levita ta keda te leu aya den e serunan di Efrain, kende a tuma un konkubina pa su mes for di Betlehem na Juda.

²Ma su konkubina a bira infiel na dje i a bai lagu'e i a bai kas di su tata na Betlehem na Juda, i a keda ayanan pa un periodo di kuater luna.

³Anto su esposo a lanta i a bai su tras pa papia karinosamente kune pa tres'e bek, i a hiba huntu kune su sirbido i un par di buriku. Asina e mucha muhe a tres'e den kas di su tata, i ora e mucha muhe su tata a mir'e, el a keda kontentu di topa kune.

⁴I su suegro, e mucha muhe su tata, no a lagu'e bai; i el a keda tres dia serka dje. Asina nan a kome i bebe i a hospeda ayanan.

⁵Awor a sosode ku riba e di kuater dia nan a lanta mainta tempran, i el a prepara pa bai; i e mucha muhe su tata a bisa su yerno: "Fortalese bo kurpa ku pida pan, i despues bo por bai."

⁶Asina nan dos a sinta i a kome i bebe huntu; i e mucha muhe su tata a bisa e homber: "Pa fabor, keda pasa nochi i laga bo kurason ta kontentu."

⁷I ora ku e homber a lanta pa bai tog, su suegro a keda rogu'e te ku el a bolbe pasa nochi ayanan.

⁸I riba e di sinku dia el a lanta pa bai mainta tempran, i e mucha muhe su tata a bisa: "Pa fabor, fortalese bo kurpa i warda te atardi"; asina nan dos a kome.

⁹Ora ku e homber a lanta pa bai huntu ku su konkubina i su sirbido, su suegro, e mucha muhe su tata, a bis'e: "Mira, ya nochi ta bai sera; pa fabor, keda pasa nochi. Mira, ya dia a pasa; keda pasa nochi akinan pa bo kurason ta kontentu. Anto manan bo por lanta tempran pa bo biaha bai kas."

¹⁰Ma e homber no tabata kier a keda pasa nochi; asina el a lanta bai i a yega na un luga enfrente di Jebus, (esta, Jerusalem). I huntu kune e tabatin un par di buriku siya; su konkubina tambe tabata huntu kune.

¹¹Ora nan tabata serka di Jebus, i nochi tabata kasi sera, e sirbido a bisa su shon: "Pa fabor, ban, i laga nos bira bai den e stat aki di e jebuseonan i keda pasa nochi ayanan."

¹²Sinembargo, su shon a bis'e: "Nos lo no bira bai den un stat di stranhero, kendenan no ta di e yunan di Israel; ma nos lo sigui bai te na Gabaa."

¹³I el a bisa su sirbido: "Ban, i laga nos bai na un di e luganan aki; i nos lo keda pasa nochi na Gabaa of na Rama."

¹⁴Asina nan a sigui nan kaminda i solo a drenta ora nan tabata serka di Gabaa, ku ta pertenese na Benj amin.

¹⁵I aya nan a bira pa drenta i hospeda na Gabaa. Ora nan a drenta, nan a kai sinta riba plenchi di e stat, pasobra ningun hende no a tuma nan den nan kas pa pasa nochi.

¹⁶I mira, anochi un homber bieu tabata bin di kunuku for di su trabou. Awor e homber tabata di e serunan di Efrain, i e tabata keda na Gabaa, ma e hendenan di e luga tabata benjaminita.

¹⁷I el a hisa kara i a mira e biahero riba plenchi di e stat; i e homber bieu a bisa: "Unda bo ta bai, i for di unda bo ta bin?"

¹⁸I el a bis'e: "Nos ta pasando di Betlehem na Juda pa bai te leu aya den e serunan di Efrain, pasobra ta di ayanan mi ta, i mi a bai Betlehem na Juda. Ma awor mi ta na kaminda pa kas, i ningun hende no ta risibimi den su kas.

¹⁹Tog tin tantu yerba seku komo kuminda di bestia pa nos burikunan, i tambe pan i bina pa mi, pa bo sirbiente i pa e hoben ku ta huntu ku bo sirbidonan; no tin falta di nada."

²⁰I e homber bieu a bisa: "Pas sea ku bo. Laga ami perkura pa tur bo nesesidatnan, ma no pasa nochi riba e plenchi."

²¹Asina el a tum'e den su kas i a duna e burikunan kuminda. I nan a laba nan pia i a kome i bebe.

²²Mientras ku nan tabata pasa kontentu, mira, e hombernan di e stat, sierto hombernan perverso, a rondona e kas i tabata bati riba porta; i nan a papia ku dono di e kas, e homber bieu, bisando: "E homber ku a bin den bo kas, tres'e pafo pa nos tene relashon kune."

²³E ora ei e homber, dono di e kas, a sali bai serka nan i a bisa nan: "No, mi shonnan, pa fabor, no komete e maldat aki; awor ku e homber aki a bin den mi kas, no hasi e kos skandaloso aki.

²⁴Ata mi yu muhe birgen i e homber su konkubina. Pa fabor, lagami trese nan pafo pa boso viola nan i hasi kiko ku boso kier ku nan. Ma no hasi un kos skandaloso asina ku e homber aki."

²⁵Ma e hombernan no kier a tende di dje; pesei e homber a gara su konkubina i a tres'e pafo serka nan. I nan a viol'e i maltrat'e henter anochi te mainta, i a lagu'e bai ora dia tabata habri.

²⁶I ora dia a kuminsa habri, e muhe a bin i a kai na porta di e homber su kas, kaminda su shon tabata, te ora tabata di dia kla.

²⁷Ora su shon a lanta mainta i a habri e portanan di kas i a sali pa sigui su kaminda, mira, su konkubina tabata drum! na porta di e kas, ku su mannan riba e drempel.

²⁸I e homber a bis'e: "Lant'ariba i laga nos ban," ma su konkubina no a kontesta. E ora ei el a pon'e riba e buriku, i e homber a kohe kaminda pa kas.

²⁹Ora ku el a drenta su kas, el a kohe un kuchu, kohe su konkubina i a kort'e na diesdos pida, miembro pa miembro, i a mand'e den henter e teritorio di Israel.

³⁰I a sosode ku tur hende ku a mira esaki a bisa: "Nunka un kos asina no a pasa, ni a wordu mira for di dia ku e yunan di Israel a sali for di tera di Egipto te dia djawe. Pensa esaki bon, tuma konseho i papia!"