Read Papantla Totonac Huesnan 2 Bible Online

Huesnan 2 - Papantla Totonac bible

Huesnan 2

¹Awor e Angel di SENOR a bai di Gilgal pa Bokim. I El a bisa: "Mi a saka boso for di Egipto i a hiba boso na e tera ku Mi a hura di duna boso tatanan, i Mi a bisa: 'Nunka lo Mi no kibra Mi aliansa ku boso,

²i pa loke ta boso, boso no mag sera ningun aliansa ku e habitantenan di e tera aki; boso mester basha nan altarnan abou.' Ma boso no a obedeseMi; kon boso por a hasi un kos asina?

³Pesei Mi a bisa tambe: 'Lo Mi no kore ku nan for di boso dilanti; ma nan lo bira manera sumpina den boso kustia, i nan diosnan lo ta un trampa pa boso.'"

⁴I a sosode ku ora e Angel di SENOR a papia e palabranan aki ku tur e yunan di Israel, e pueblo a halsa bos i a yora.

⁵Pesei nan a yama e luga ei Bokim; i aya nan a ofrese sakrifisio na SENOR.

⁶Ora Josue a laga e pueblo bai, e yunan di Israel a bai, kada un na su erensia, pa podera di e tera.

⁷I e pueblo a sirbi SENOR tur e dianan di Josue, i tur e dianan di e ansianonan ku a biba mas ku Josue, ku a mira henter e gran obra di SENOR ku El a hasi pa Israel.

⁸I Josue, yu homber di Nun, e sirbido di SENOR, a muri na edat di shent'i dies ana.

⁹I nan a der'e den e teritorio di su erensia na Timnat-heres, den e serunan di Efrain, panort di Seru Gaas.

¹⁰I henter e generashon ei tambe a wordu reuni ku nan tatanan; i a lanta un otro generashon despues di nan ku no tabata konose SENOR, ni e obra ku El a hasi pa Israel.

¹¹Anto e yunan di Israel a hasi maldat den bista di SENOR i a sirbi e Baalnan;

¹²i nan a bandona SENOR, e Dios di nan tatanan, Kende a saka nan for di tera di Egipto; i nan a sigui otro diosnan, e diosnan di e pueblonan ku tabata ront di nan, i a buig pa nan; asina nan a proboka SENOR na rabia.

¹³I nan a bandona SENOR i a sirbi Baal i Astarot.

¹⁴I e rabia di SENOR a kima kontra Israel, i El a entrega nan den man di sakeadonan ku a plunder nan; i El a bende nan ku nan enemigunan ront di nan, asina ku nan no por a para mas dilanti di nan enemigunan.

¹⁵Unda ku nan a bai, e man di SENOR tabata kontra nan pa maldat, manera SENOR a papia i manera SENOR a hura na nan, asina ku nan tabata den gran angustia.

¹⁶E ora ei SENOR a lanta huesnan ku a libra nan for di man di esnan ku tabata plunder nan.

¹⁷I tog nan no a tende di nan huesnan, pasobra nan tabata prostitui nan mes dor di sigui tras di otro diosnan i buig pa nan. Masha lihe nan a kita for di e kaminda ku nan tatanan a kana, esta, e kaminda di obedensia na e mandamentunan di SENOR; nan no a hasi manera nan tatanan.

¹⁸I ora SENOR a lanta huesnan pa nan, SENOR tabata ku e hues i tabata libra nan for di man di nan enemigunan tur e dianan di e hues; pasobra SENOR a hana duele di nan dor di nan kehamentu pa motibu di esnan ku tabata oprimi i afligi nan.

¹⁹Ma tabata sosode ku asina e hues muri, nan tabata bira bek i aktua mas korupto ainda ku nan tatanan, dor di sigui otro diosnan pa sirbi nan i buig pa nan; nan no a laga nan praktikanan ni nan maneranan kaprichoso.

²⁰Asina e rabia di SENOR a kima kontra Israel i El a bisa: "Pasobra e nashon aki a transgresa Mi aliansa ku Mi a ordena nan tatanan, i no a skucha Mi bos,

²¹Ami tampoko lo no kore mas for di nan dilanti ningun di e nashonnan ku Josue a laga ora ku el a muri,

²²pa Mi pone Israel na prueba ku nan, si nan lo warda e kaminda di SENOR pa kana den dje manera nan tatanan a hasi, si of no."

²³Asina SENOR a permit! e nashonnan ei keda, sin kore ku nan mesora; i E no a entrega nan den man di Josue.