Read Papantla Totonac Huesnan 20 Bible Online

Huesnan 20 - Papantla Totonac bible

Huesnan 20

¹E ora ei tur e yunan di Israel for di Dan te Beerseba, inkluyendo tera di Galaad, a sali, i e kongregashon a reuni komo un solo homber dilanti di SENOR na Mizpa.

²I e hefenan di henter e pueblo, di tur e tribunan di Israel, a presenta nan mes na e reunion di e pueblo di Dios, kuater shen mil solda-na-pia, ku tabata saka spada.

³(Awor e yu hombernan di Benjamin a tende ku e yunan di Israel a subi bai Mizpa.) I e yunan di Israel a bisa: "Konta nos kon e maldat aki a tuma luga."

⁴I e levita, esposo di e muhe ku a wordu mata, a kontesta i a bisa: "Mi a bin ku mi konkubina pa pasa nochi na Gabaa, ku ta pertenese na Benjamin.

⁵Ma e hombernan di Gabaa a lanta kontra mi, i a rondona e kas den anochi pa mi motibu. Nan kier a matami; ma enbes di hasi esei, nan a viola mi konkubina asina ku el a muri.

⁶I mi a kohe mi konkubina i a kort'e na pida-pida, i a mand'e den henter tera di Israel su erensia, pasobra nan a komete un akto baho i skandaloso na Israel.

⁷Mira, boso tur, yunan di Israel, duna boso opinion i konseho aki."

⁸E ora ei henter e pueblo a lanta komo un solo homber i a bisa: "Ningun di nos lo no bai na su tent, ni ningun di nos lo no bolbe su kas.

⁹Ma awor esaki ta loke nos lo hasi ku Gabaa: nos lo bai kontra dje manera lot disidi.

¹⁰I nos lo tuma dies homber for di kada shen di tur e tribunan di Israel, i shen for di kada mil, i mil for di kada dies mil, pa perkura pa kuminda pa e pueblo, pa ora nan yega Gabaa di Benjamin, nan kastiga nan pa tur e aktonan skandaloso ku nan a komete na Israel."

¹¹Asina tur e hombernan di Israel a reuni kontra e stat, uni komo un solo homber.

¹²E ora ei e tribunan di Israel a manda hombernan dor di henter tribu di Benjamin, bisando: "Ta kiko e maldat aki ku a tuma luga meimei di boso ta?

¹³Pesei anto, entrega e hombernan, e hombernan perverso na Gabaa, pa nos mata nan i kita e maldat aki for di Israel." Ma e yu hombernan di Benjamin no kier a skucha bos di nan rumannan, e yunan di Israel.

¹⁴I e yu hombernan di Benjamin a bin huntu na Gabaa for di e statnan, pa bai bringa kontra e yunan di Israel.

¹⁵I riba e dia ei e yu hombernan di Benjamin for di e otro statnan a wordu konta: bint'i seis mil homber ku ta saka spada, fuera di e habitantenan di Gabaa ku a wordu konta, shete shen homber skohi.

¹⁶Entre tur e hendenan aki shete shen homber skohi tabata robesou; kada un di nan por a slenger un piedra tira riba un kabei, sin hera.

¹⁷E ora ei e hombernan di Israel, fuera di Benjamin, a wordu konta, kuater shen mil homber ku ta saka spada; tur esakinan tabata homber di guera.

¹⁸Awor e yunan di Israel a lanta bai Bet-el, i a pidi Dios konseho i a bisa: "Kual di nos mester bai prome pa bringa kontra e yu hombernan di Benjamin?" I SENOR a bisa: "Juda prome."

¹⁹Asina e yunan di Israel a lanta mainta, i a kampa kontra Gabaa.

²⁰I e hombernan di Israel a sali bai pa bringa kontra Benjamin, i na Gabaa e hombernan di Israel a pone nan mes den ordu di bataya kontra nan.

²¹E ora ei e yu hombernan di Benjamin a sali for di Gabaa, i a dal bint'i dos mil homber di Israel mata e dia ei.

²²Ma e pueblo, e hombernan di Israel, a tuma un kurashi i a pone nan mes den ordu di bataya atrobe na e luga kaminda nan a pone nan mes den ordu di bataya e prome dia.

²³I e yunan di Israel a bai yora dilanti di SENOR te atardi i a pidi SENOR konseho, bisando: "Nos mester bai bringa atrobe kontra e yu hombernan di mi ruman Benjamin?" I SENOR a bisa: "Sali bai kontra dje."

²⁴E ora ei e yunan di Israel a sali bai kontra e yu hombernan di Benjamin e di dos dia.

²⁵I Benjamin a sali riba e di dos dia bai kontra nan for di Gabaa, i a bolbe dal diesocho mil homber di e yunan di Israel mata; tur esakinan tabata saka spada.

²⁶E ora ei tur e yunan di Israel, i henter e pueblo, a subi bai Bet-el i tabata yora; asina nan a keda ayanan dilanti di SENOR i a yuna e dia ei te atardi. I nan a ofrese ofrendanan kima i ofrendanan di pas dilanti di SENOR.

²⁷I e yunan di Israel a konsulta ku SENOR (pasobra e arka di e aliansa di Dios tabata ayanan den e dianan ei,

²⁸i Finees, yu homber di Eleazar, yu homber di Aaron, tabata para su dilanti pa sirbi den e dianan ei), bisando: "Mi mester sali bai bringa atrobe kontra e yu hombernan di mi ruman Benjamin, of mi mester stop?" I SENOR a bisa: "Bai, pasobra manan Mi ta entrega nan den bo man."

²⁹Asina Israel a pone hombernan skonde pa ataka ront di Gabaa.

³⁰I e yunan di Israel a bai kontra e yu hombernan di Benjamin riba e di tres dia i a pone nan mes den ordu di bataya kontra Gabaa, manera otro biahanan.

³¹I e yu hombernan di Benjamin a sali bai kontra e pueblo i a wordu aleha for di e stat, i manera e otro biahanan, nan a kuminsa ataka i mata algun di e hendenan riba e kamindanan grandi, di kualnan un ta bai Bet-el i e otro Gabaa, i den kunuku, mas o menos trinta homber di Israel.

³²I e yu hombernan di Benjamin a bisa: "Nan ta keda derota nos dilanti, meskos ku e prome biaha." Ma e yunan di Israel a bisa: "Laga nos hui pa nos aleha nan for di e stat hiba nan na e kamindanan grandi."

³³E ora ei tur e hombernan di Israel a lanta for di nan luga, i a pone nan mes den ordu di bataya na Baal-tamar; i e hombernan di Israel ku a skonde pa ataka a bula sali for di nan luga, for di Mare-gabaa.

³⁴Ora dies mil homber skohi for di henter Israel a sali bin kontra Gabaa, e bataya a bira pisa; ma Benjamin no tabata sa ku desaster tabata tras di porta.

³⁵SENOR a derota Benjamin dilanti di Israel. I e yunan di Israel a mata bint'i sinku mil un shen homber di Benjamin e dia ei, tur esnan ku ta saka spada.

³⁶Asina e yu hombernan di Benjamin a mira ku nan a wordu derota. Ora ku e hombernan di Israel a laga Benjamin gana tereno, komo ku nan tabata konfia riba e hombernan ku a skonde pa ataka, kendenan nan a pone kontra Gabaa,

³⁷e hombernan ku a skonde pa ataka a pura bai kontra Gabaa; tambe e hombernan ku a skonde pa ataka a desplega i a derota henter e stat ku filo di spada.

³⁸Awor e senal, ku e hombernan di Israel i e hombernan ku a skonde pa ataka a palabra, tabata ku nan mester a hasi un nubia grandi di huma subi for di e stat.

³⁹Anto den e bataya e hombernan di Israel a bira bai. I Benjamin a kuminsa dal mas o menos trinta homber di Israel mata, pasobra nan a bisa: "Siguramente nan ta keda derota nos dilanti, manera den e prome bataya."

⁴⁰Ma ora ku e nubia di huma a kuminsa subi for di e stat, Benjamin a drai wak; i ata, henter e stat tabata na huma ku tabata subi bai te na shelu.

⁴¹E ora ei e hombernan di Israel a bira, i e hombernan di Benjamin a keda morto spanta; pasobra nan a mira ku desaster tabata tras di porta.

⁴²Pesei nan a hui pa e hombernan di Israel den direkshon di desierto, ma e bataya a alkansa nan, mientras ku esnan ku tabata sali for di e statnan tabata destrui nan einan mes.

⁴³Nan a rondona Benjamin, a persigui nan sin sosiegu i a kore pasa riba nan enfrente di Gabaa, den direkshon pariba.

⁴⁴Asina diesocho mil homber di Benjamin a kai; nan tur tabata guereronan balente.

⁴⁵E otronan a bira i a hui den direkshon di desierto bai na e baranka di Rimon, ma nan a kaptura sinku mil di nan riba e kamindanan grandi i a alkansa nan na Gidom, i a mata dos mil di nan.

⁴⁶Asina ta ku tur esnan di Benjamin ku a kai e dia ei tabata bint'i sinku mil homber ku ta saka spada; nan tur tabata guereronan balente.

⁴⁷Ma seis shen homber a bira i a hui den direkshon di desierto bai na e baranka di Rimon, i nan a keda kuater luna na e baranka di Rimon.

⁴⁸E ora ei e hombernan di Israel a bira bai bek kontra e yu hombernan di Benjamin, i a dal nan ku filo di spada, tantu henter e stat ku e bestianan, komo tur loke nan a hana; tambe tur e statnan ku nan a hana, nan a pega na kandela.