Read Papantla Totonac Huesnan 21 Bible Online

Huesnan 21 - Papantla Totonac bible

Huesnan 21

¹Awor e hombernan di Israel a hura na Mizpa, bisando: "Ningun di nos lo no duna su yu muhe na Benjamin komo esposa."

²Asina e pueblo a bin Bet-el i a sinta ayanan dilanti di Dios te atardi, i a halsa nan bos i a yora amargamente.

³I nan a bisa: "O SENOR, Dios di Israel, pakiko e kos aki a pasa ku Israel, asina ku ta falta un tribu awe na Israel?"

⁴I a sosode ku su manise e pueblo a lanta tempran i a traha un altar ayanan, i a ofrese ofrendanan kima i ofrendanan di pas.

⁵Anto e yunan di Israel a bisa: "Ken di tur e tribunan di Israel no a bin den e asamblea serka SENOR?" Pasobra nan a hasi un gran huramentu tokante di esun ku no a bin serka SENOR na Mizpa, bisando: "Esei mester wordu mata sigur."

⁶I e yunan di Israel tabatin duele di nan ruman Benjamin, i nan a bisa: "Awe un tribu a wordu korta kita for di Israel.

⁷Kiko nos mester hasi pa hana esposa pa esnan ku a resta, awor ku nos a hura na SENOR pa no duna nan ningun di nos yu muhenan komo esposa?"

⁸I nan a bisa: "Kual di e tribunan di Israel no a bin serka SENOR na Mizpa?" I mira, ningun hende di Jabes-galaad no a bin pa e reunion na e kampamentu.

⁹Pasobra ora ku e pueblo a wordu konta, mira, ni un di e habitantenan di Jabes-galaad no tabata einan.

¹⁰I e kongregashon a manda diesdos mil di e guereronan balente ayanan, i a ordena nan, bisando: "Bai, i dal e habitantenan di Jabes-galaad ku filo di spada, tambe e muhenan i e mucha chikitunan.

¹¹I esaki ta loke boso mester hasi: boso mester destrui kompletamente tur homber, i tur muhe ku a yega di drumi ku homber."

¹²I nan a hana entre e habitantenan di Jabes-galaad kuater shen birgen hoben ku nunka a konose homber dor di drumi kune; i nan a trese nan na e kampamentu na Silo, ku ta keda na tera di Kanaan.

¹³Anto henter e kongregashon a manda rospondi i a papia ku e yu hombernan di Benj amin ku tabata na e baranka di Rimon, i a proklama pas na nan.

¹⁴I e ora ei Benjamin a bolbe, i nan a duna nan e muhenan ku nan a laga na bida for di e muhenan di Jabes-galaad; tog nan no tabata basta pa nan.

¹⁵I e pueblo tabatin duele di Benj amin, pasobra SENOR a trese un kiebra den e tribunan di Israel.

¹⁶E ora ei e ansianonan di e kongregashon a bisa: "Kiko nos lo hasi pa hana esposa pa esnan ku a resta? Pasobra e muhenan a wordu destrui for di Benjamin."

¹⁷I nan a bisa: "Mester tin un erensia pa e sobrebibientenan di Benjamin, pa un tribu no wordu kita for di den Israel.

¹⁸Ma nos no por duna nan esposanan for di nos yu muhenan." Pasobra e yunan di Israel a hura, bisando: "Maldishona ta esun ku duna Benjamin un esposa."

¹⁹Asina nan a bisa: "Mira, tur ana tin un fiesta di SENOR na Silo, ku ta keda panort di Bet-el, pariba di e kaminda grandi ku ta bai di Bet-el pa Sikem, i pasuit di Lebona."

²⁰I nan a ordena e yu hombernan di Benjamin, bisando: "Bai i skonde warda den e kunukunan di wendruif,

²¹i paga tino; i mira, ora ku e yu muhenan di Silo sali pa tuma parti den e baliamentu, boso sali for di e kunukunan di wendruif i kada un di boso kore kohe su esposa for di e yu muhenan di Silo, i bai tera di Benjamin.

²²I lo sosode ku si nan tatanan of nan ruman hombernan bin keha serka nos, nos lo bisa nan: 'Duna nos nan boluntariamente, pasobra nos no a tuma un esposa pa kada homber di Benjamin durante di bataya, ni boso no a duna boso yu muhenan na nan, sino awor boso lo tabata kulpabel.'"

²³I e yu hombernan di Benjamin a hasi asina, i a kohe esposa konforme nan kantidat for di esnan ku tabata balia, i a bai ku nan. I nan a bai i a bolbe na nan erensia, i a rekonstrui e statnan i a bai biba den nan.

²⁴I e yunan di Israel a bai for di einan e ora ei, kada homber serka su tribu i famia, i kada un di nan a sali for di einan bai pa su erensia.

²⁵Den e dianan ei no tabatin rei na Israel; kada ken tabata hasi loke tabata bon den su mes bista.