Read Papantla Totonac Huesnan 3 Bible Online

Huesnan 3 - Papantla Totonac bible

Huesnan 3

¹Awor esakinan ta e nashonnan ku SENOR a laga pa pone Israel na prueba ku nan (esta, tur esnan ku no a eksperensia ni un di e gueranan di Kanaan;

²solamente pa e generashonnan di e yunan di Israel por sina bringa, esnan ku no a eksperensia esaki antes).

³E nashonnan aki ta: e sinku prensnan di e filisteonan i tur e kananeonan, e sidonionan, i e heveonan ku tabata biba den Seru Libano, for di Seru Baal-hermon te na Lebo-hamat.

⁴I nan tabata einan pa pone Israel na prueba, pa hana sa si nan lo a obedese e mandamentunan di SENOR, ku El a ordena nan tatanan pa medio di Moises.

⁵I e yunan di Israel tabata biba meimei di e kananeonan, e heteonan, e amoreonan, e ferezeonan, e heveonan i e jebuseonan;

⁶i nan a tuma nan yu muhenan pa nan mes komo esposa, i a duna nan mes yu muhenan na nan yu hombernan, i a sirbi nan diosnan.

⁷I e yunan di Israel a hasi loke tabata malu den bista di SENOR, i a lubida SENOR nan Dios, i a sirbi e Baalnan i e imagennan di Asera.

⁸E ora ei e rabia di SENOR a sende kontra Israel, asina ku El a bende nan ku Kusan-risataim, rei di Mesopotamia; i e yunan di Israel a sirbi Kusan-risataim ocho ana.

⁹I ora ku e yunan di Israel a sklama na SENOR, SENOR a lanta un libertador pa e yunan di Israel pa libra nan, esta, Otoniel, yu homber di Kenas, Kaleb su ruman homber mas chikitu.

¹⁰I e Spiritu di SENOR a bin riba dje, i el a huzga Israel. Ora ku el a sali bai guera, SENOR a entrega Kusan-risataim, rei di Mesopotamia, den su man, asina ku el a prevalese kontra Kusan-risataim.

¹¹E ora ei e tera tabatin sosiegu pa kuarenta ana. I Otoniel, yu homber di Kenas, a muri.

¹²Awor e yunan di Israel a bolbe hasi maldat den bista di SENOR. Pesei SENOR a duna Eglon, rei di Moab, forsa kontra Israel, pasobra nan a hasi maldat den bista di SENOR.

¹³I el a reuni e yu hombernan di Amon i di Amalek serka dje; i el a bai i a derota Israel, i nan a podera di e stat di palma.

¹⁴I e yunan di Israel a sirbi Eglon, rei di Moab, diesocho ana.

¹⁵Ma ora ku e yunan di Israel a sklama na SENOR, SENOR a lanta un libertador pa nan, esta, Aod, yu homber di Gera e benjaminita, un homber robesou. I e yunan di Israel a mand'e ku tributo serka Eglon, rei di Moab.

¹⁶I Aod a traha pa su mes un spada di dos filo, i un kodo largu; i el a mar'e na su bel di pia drechi, bou di su mantel.

¹⁷I el a presenta e tributo na Eglon, rei di Moab. Awor Eglon tabata un homber masha gordo mes.

¹⁸I a sosode ku ora el a kaba di presenta e tributo, el a bisa e hendenan ku a karga e tributo pa nan bai.

¹⁹Ma e mes a bira bin bek for di e idolonan ku tabata na Gilgal, i a bisa: "Mi tin un mensahe sekreto pa bo, O rei." I esaki a bisa: "Silensio." I tur esnan ku tabata sirbie a sali bai lagu'e.

²⁰I Aod a bin serka dje ora ku e tabata sinta su so den su kamber ariba, un kamber fresku. I Aod a bisa: "Mi tin un mensahe di Dios pa bo." I el a lanta for di su asiento.

²¹I Aod a saka su man robes, a kohe e spada for di bel di su pia drechi, i a hink'e den su barika.

²²E kabu tambe a drenta tras di e filo, i e vet a tapa e filo, pasobra e no a saka e spada for di su barika; i su sushi tabata sali afo.

²³E ora ei Aod a sali bai den e koredor, i su tras el a grendel e portanan di e kamber ariba.

²⁴Ora ku el a sali bai, e sirbidonan di Eglon a bin wak; i mira, e portanan di e kamber ariba tabata na grendel; i nan a bisa: "Ta su nesesidat e lo ta hasi den e kamber paden di e kas."

²⁵I nan a warda te nan a kuminsa ansha; ma mira, e no a habri e portanan di e kamber ariba. Pesei nan a kohe e yabi i a habri nan; i ata, nan shon tabata tira abou morto.

²⁶Awor Aod a hui mientras nan tabata tarda, i el a pasa e idolonan i a hui bai Seirat.

²⁷I a sosode ku ora el a yega, el a supla trompet den e serunan di Efrain; i e yunan di Israel a baha for di e serunan huntu kune, i e tabata bai nan dilanti.

²⁸I el a bisa nan: "Persigui nan, pasobra SENOR a entrega boso enemigunan, e moabitanan, den boso man." Asina nan a baha bai su tras i a okupa e luganan kaminda por a krusa Jordan enfrente di Moab, i no a permiti ningun hende krusa.

²⁹I e tempu ei nan a mata komo dies mil moabita, tur, hombernan robusto i balente, i ningun no a skapa.

³⁰Asina Moab a wordu someti e dia ei bou di man di Israel. I e tera tabatin sosiegu pa ochenta ana.

³¹I despues di dje a bin Samgar, yu homber di Anat, kende a mata seis shen filisteo ku un palu pa suta baka; i e tambe a salba Israel.