Read Papantla Totonac Huesnan 4 Bible Online

Huesnan 4 - Papantla Totonac bible

Huesnan 4

¹Anto e yunan di Israel a bolbe hasi maldat den bista di SENOR, despues di e morto di Aod.

²I SENOR a bende nan ku Jabin, rei di Kanaan, kende tabata reina na Hazor; i e komandante di su ehersito tabata Sisara, kende tabata biba na Haroset-goim.

³I e yunan di Israel a sklama na SENOR, pasobra e tabatin nuebe shen garoshi di heru, i el a oprimi e yunan di Israel severamente pa binti ana.

⁴Awor Debora, un profeta, esposa di Lapidot, tabata huzga Israel e tempu ei.

⁵I e tabatin kustumber di sinta bou di e palma di Debora entre Rama i Bet-el den e serunan di Efrain; i e yunan di Israel tabata bin serka dje pa huisio.

⁶Awor el a manda yama Barak, yu homber di Abinoam di Kedes-neftali, i a bis'e: "Mira, SENOR, e Dios di Israel, a duna ordu: 'Marcha bai Seru Tabor, i hiba huntu ku bo dies mil homber di e yu hombernan di Neftali i di e yu hombernan di Zabulon.

⁷I lo Mi hasi Sisara, komandante di e ehersito di Jabin, bin serka bo na Riu Kison ku su garoshinan i su trupanan, i lo Mi entregu'e den bo man.'"

⁸E ora ei Barak a bis'e: "Si bo bai ku mi, mi ta bai, ma si bo no bai ku mi, mi no ta bai."

⁹I el a bisa: "Siguramente mi ta bai ku bo; sinembargo, e onor di e biahe ku bo ta bai hasi lo no ta pa bo, pasobra SENOR lo bende Sisara ku un muhe." E ora ei Debora a lanta i a bai Kedes ku Barak.

¹⁰I Barak a manda yama Zabulon i Neftali pa bin Kedes, i dies mil homber a bai kune; Debora tambe a bai kune.

¹¹Awor Heber e keneo a separa su mes di e keneonan, di e yu hombernan di Hobab, suegro di Moises, i a lanta su tent te na e palu di eik na Zaanaim, ku ta keda serka di Kedes.

¹²Anto nan a konta Sisara ku Barak, yu homber di Abinoam, a subi bai Seru Tabor.

¹³I Sisara a reuni tur su garoshinan, nuebe shen garoshi di heru, i tur e hendenan ku tabata huntu kune, for di Haroset-goim te na Riu Kison.

¹⁴I Debora a bisa Barak: "Lanta! Pasobra esaki ta e dia ku SENOR a entrega Sisara den bo man; mira, SENOR a bai bo dilanti." Asina Barak a baha for di Seru Tabor ku dies mil homber su tras.

¹⁵I ku filo di spada SENOR a konfundi Sisara i tur su garoshinan i henter su ehersito dilanti di Barak, i Sisara a baha for di su garoshi i a hui bai na pia.

¹⁶Ma Barak a persigui e garoshinan i e ehersito te na Haroset-goim, i henter e ehersito di Sisara a muri pa medio di filo di spada; no a keda ni un.

¹⁷Awor Sisara a hui na pia bai na e tent di Jael, esposa di Heber e keneo, pasobra tabatin pas entre Jabin, rei di Hazor, i e kas di Heber e keneo.

¹⁸I Jael a sali pa kontra ku Sisara i a bis'e: "Bin, mi shon, drenta bin serka mi! No tene miedu." I el a drenta bai serka dje den e tent i Jael a tap'e ku un dekel.

¹⁹I el a bis'e: "Pa fabor, dunami un tiki awa pa bebe, pasobra mi tin set." Asina el a habri un saku di kueru ku tabatin lechi aden, i a dun'e bebe; despues el a tap'e.

²⁰I Sisara a bis'e: "Para den porta di e tent, i si kualkier hende bin informa serka bo i bisa: 'Tin hende aki?' bo mester bisa: 'No.'"

²¹Ma Jael, Heber su esposa, a kohe un staka di tent i a kohe un martiu den su man, i a bai ketu-ketu serka dje i a klaba e staka den su sinti; i esaki a pasa dor en dor bai den suela, pasobra e tabata morto na sono i masha kansa. Asina el a muri.

²²I mira, ora Barak tabata persigui Sisara, Jael a sali kontr'e i a bis'e: "Bin, i lo mi mustrabo e homber ku bo ta buska." I el a drenta bai paden kune, i mira, Sisara tabata drum! morto ku e staka di tent den su sinti.

²³Asina e dia ei Dios a hasi Jabin, rei di Kanaan, somete su mes dilanti di e yunan di Israel.

²⁴I man di e yunan di Israel tabata primi mas i mas pisa riba Jabin, rei di Kanaan, te ora nan a destrui Jabin, rei di Kanaan.