Read Papantla Totonac Huesnan 5 Bible Online

Huesnan 5 - Papantla Totonac bible

Huesnan 5

¹Anto e dia ei Debora i Barak, yu homber di Abinoam, a kanta, bisando:

²"Pasobra e lidernan a guia den Israel, pasobra e pueblo a ofrese su mes boluntariamente, bendishona SENOR!

³"Tende, O reinan; skucha, O gobernantenan! Ami--pa SENOR mi kier kanta, lo mi kanta alabansa na SENOR, e Dios di Israel.

⁴"SENOR, ora Bo tabata sali for di Seir, ora Bo tabata marcha for di e sabana di Edom, tera tabata tembla, e shelunan tambe tabata gotia, i e nubianan tabata gotia awa.

⁵E serunan tabata tembla den e presensia di SENOR, e Sinai aki, den e presensia di SENOR, e Dios di Israel.

⁶"Den e dianan di Samgar, yu homber di Anat, den e dianan di Jael, e kamindanan grandi a keda bandona, i biaheronan tabata pasa pa kamindanan yen di lorada.

⁷Bida di e kunukeronan a kaba, el a kaba na Israel, te ora ami, Debora, a lanta, te ora ami a lanta, un mama den Israel.

⁸Diosnan nobo a wordu skohi; e ora ei tabatin guera na porta. Ni un eskudo ni lansa no a wordu mira den kuarenta mil na Israel.

⁹Mi kurason ta ku e komandantenan di Israel, e boluntarionan meimei di e pueblo; bendishona SENOR!

¹⁰"Boso ku ta kore riba buriku blanku, boso ku ta sinta riba tapeit kostoso, i boso ku ta biaha riba kaminda, kanta!

¹¹Riba zonidu di esnan ku ta separa tounan na e luganan di bebe awa, aya nan lo bolbe konta e echonan hustu di SENOR, e echonan hustu pa Su kunukeronan na Israel. E ora ei e pueblo di SENOR a baha bai na e portanan di stat.

¹²Spierta, spierta, Debora! Spierta, spierta, kanta un kantika! Lanta, Barak, i bai ku bo katibunan, O yu homber di Abinoam.

¹³"E ora ei e sobrebibientenan a baha bin serka e nobelnan; e pueblo di SENOR a baha bin serka mi manera guereronan.

¹⁴For di Efrain esnan ku nan rais ta den Amalek a baha bin, siguiendo abo, Benjamin, ku bo pueblonan; for di Makir komandantenan a baha bin, i for di Zabulon esnan ku ta na mando.

¹⁵I e prensnan di Isakar tabata ku Debora; manera Isakar, asina Barak tabata tambe; su tras nan a kore bai den e vaye; den e famianan di Ruben tabatin gran resolushonnan di kurason.

¹⁶Pakiko bo a keda sinta meimei di e kuranan di karne, pa tende e tokamentu di fluit pa e tounan? Den e famianan di Ruben tabatin gran saminamentu di kurason.

¹⁷Galaad a keda na e otro banda di Jordan; i pakiko Dan a keda den barkunan? Aser a keda sinta kantu di laman, i a keda banda di su wafnan.

¹⁸Zabulon tabata un pueblo ku tabata riska su bida te na morto, i Neftali tambe, riba e luganan haltu di kunuku.

¹⁹"E reinan a bin, i nan a bringa; e ora ei e reinan di Kanaan a bringa na Taanak, banda di e awanan di Meguido; nan no a kohe ni un pida plata komo botin.

²⁰For di shelu e streanan tabata bringa, for di nan kurso nan tabata bringa kontra Sisara.

²¹Riu Kison a lastra nan bai kune, e riu antiguo, Riu Kison. O mi alma, sigui marcha ku forsa.

²²E ora ei e hufnan di kabai a resona masha duru mes, di e galop, e galop di su kabainan balente.

²³'Maldishona Meros,' e Angel di SENOR tabata bisa, 'Maldishona su habitantenan kompletamente; pasobra nan no a bin na yudansa di SENOR, na yudansa di SENOR kontra e guereronan.'

²⁴"Esun di mas bendishona di e muhenan ta Jael, esposa di Heber e keneo; esun di mas bendishona di e muhenan ku ta biba den tent.

²⁵Sisara a pidi awa i el a dun'e lechi; den un komchi kostoso el a trese lechi kuaha p'e.

²⁶El a rek su man kohe e staka di tent, i su man drechi pa kohe e martiu di trahado. E ora ei el a dal Sisara, el a kibra su kabes; el a plecha i bora su sinti.

²⁷Na su pianan el a sak, el a kai, el a keda ei bou; na su pianan el a sak, el a kai; kaminda el a sak, einan el a muri.

²⁸"Na bentana mama di Sisara tabata wak i lamenta, dor di e yalusinan e tabata wak: 'Di kon su garoshi ta tarda pa bin? Di kon e zonidu di huf di kabai di su garoshinan ta tarda?'

²⁹Su prensesnan di mas sabi tabata kontest'e, si, e tabata kontesta su mes:

³⁰'Ta hana nan no ta hana, ta parti nan no ta parti e botin? Un mucha muhe, dos mucha muhe pa kada guerero; pa Sisara un botin di pana di diferente kolo, un botin di pana borda, di diferente kolo, pana di kolo, borda na tur dos banda, pa garganta di e sakeado?'

³¹"Asina, laga tur Bo enemigunan perese, O SENOR; ma laga esnan ku ta stim'E ta manera solo ku ta sali den tur su forsa." I e tera tabatin sosiegu pa kuarenta ana.