Read Papantla Totonac Huesnan 6 Bible Online

Huesnan 6 - Papantla Totonac bible

Huesnan 6

¹E ora ei e yunan di Israel a hasi loke tabata malu den bista di SENOR; i SENOR a entrega nan shete ana den man di Madian.

²I e poder di Madian a prevalese kontra Israel. Pa motibu di Madian e yunan di Israel a traha pa nan mes e kuebanan den e serunan, e spelonknan i e luganan fortifika.

³Pasobra ta ora ku Israel a kaba di sembra, e madianitanan tabata bin ku e amalekitanan i ku e yu hombernan di oriente i tabata lanta kontra nan.

⁴Asina nan tabata kampa den nan teritorio i tabata destrui e kosecha di e tera te na Gaza, sin laga nada di kome na Israel, ni karne, ni buey, ni buriku.

⁵Pasobra nan tabata bin ku nan bestianan di kria i nan tentnan, i nan tabata bin manera un multitut di tirakochi, asina hopi ku no por a konta nan ni nan kamelnan; i nan tabata bin den e tera pa destruie.

⁶Asina Israel a bira masha pober mes pa motibu di Madian, i e yunan di Israel a sklama na SENOR.

⁷Awor a sosode ku ora e yunan di Israel a sklama na SENOR pa motibu di Madian,

⁸SENOR a manda un profeta serka e yunan di Israel, i el a bisa nan: "Asina SENOR, e Dios di Israel, ta bisa: 'Ta Ami a saka boso for di Egipto i a saka boso for di e kas di sklabitut.

⁹I Mi a libra boso for di man di e egipsionan i for di man di tur boso opresornan, i a kore ku nan for di boso dilanti i a duna boso nan tera,

¹⁰i Mi a bisa boso: "Ami ta SENOR boso Dios; no teme e diosnan di e amoreonan, den kende nan tera boso ta biba. Ma boso no a obedeseMi.

¹¹E ora ei e Angel di SENOR a bin i a sinta bou di e palu di eik na Ofra, ku tabata pertenese na Joas e abiezerita, mientras ku su yu homber Gideon tabata bati trigo den e baki-di-pers-wendruif, pa skonde esaki pa e madianitanan.

¹²I e Angel di SENOR a parese na dje i a bis'e: "SENOR ta ku bo, O guerero balente."

¹³E ora ei Gideon a bis'e: "O mi senor, si SENOR ta ku nos, pakiko anto tur esaki a pasa ku nos? I unda tur Su milagernan ta, ku nos tatanan a konta nos di dje, bisando: 'No ta SENOR a saka nos for di Egipto?' Ma awor SENOR a bandona nos i a entrega nos den man di Madian."

¹⁴I SENOR a wak e i a bisa: "Bai den e forsa aki ku bo tin i libra Israel for di man di Madian. No ta Ami a mandabo?"

¹⁵I el a bis'E: "O SENOR, kon lo mi libra Israel? Mira, mi famia ta esun di mas menos den Manases, i ami ta esun di mas chikitu den e kas di mi tata."

¹⁶Ma SENOR a bis'e: "Siguramente lo Mi ta ku bo, i lo bo derota Madian komo si fuera ta un homber so."

¹⁷Asina Gideon a bis'E: "Si awor mi a hana grasia den Bo bista, mustrami un senal anto ku ta Abo ta papia ku mi.

¹⁸Pa fabor, no bai for di aki prome ku mi bin bek serka Bo i trese mi ofrenda pone Bo dilanti." I El a bisa: "Mi ta warda te ora bo bolbe."

¹⁹E ora ei Gideon a bai paden i a prepara un yu di kabritu i pan sin zurdeg ku un efa di harina; el a pone e karni den un makutu i e buyon den un wea, i a hiba nan p'E bou di e palu di eik i a presenta nan.

²⁰I e Angel di Dios a bis'e: "Kohe e karni i e pan sin zurdeg i pone nan riba e baranka aki, i basha e buyon." I asina el a hasi.

²¹E ora ei e Angel di SENOR a saka punta di e garoti ku E tabatin den Su man i a mishi ku e karni i e pan sin zurdeg; i kandela a sali for di e baranka i a kima e karni i e pan sin zurdeg kompletamente. Despues e Angel di SENOR a disparse for di su bista.

²²Ora Gideon a mira ku tabata e Angel di SENOR, el a bisa: "Ai, SENOR Dios! Pasobra awor mi a mira e Angel di SENOR kara-kara."

²³I SENOR a bis'e: "Pas sea ku bo, no tene miedu; lo bo no muri."

²⁴E ora ei Gideon a traha un altar ayanan pa SENOR i a yam'e SENOR ta Pas. Te dia djawe ainda e ta na Ofra di e abiezeritanan.

²⁵Awor a sosode ku e mesun anochi ei SENOR a bis'e: "Kohe e toro di bo tata, esta, e di dos toro di shete ana, i basha e altar di Baal ku ta pertenese na bo tata, abou, i kap e imagen di Asera, ku tin banda di dje, bash'abou;

²⁶i traha un altar pa SENOR bo Dios riba top di e forti aki na e luga stipula, i kohe e di dos toro i ofrese un ofrenda kima ku e palu di e Asera ku lo bo kap bash'abou."

²⁷E ora ei Gideon a tuma dies homber di su sirbidonan i a hasi manera SENOR a papia kune; i pasobra e tabatin masha miedu di e famia di su tata i di e hombernan di e stat pa hasi esaki den dia, el a hasie anochi.

²⁸Ora ku e hombernan di e stat a lanta mainta tempran, mira, nan a hana e altar di Baal basha abou i e imagen di Asera, ku tabatin banda di dje, gekap basha abou, i ku e di dos toro a wordu ofresi riba e altar ku a wordu traha.

²⁹I nan a bisa otro: "Ta ken a hasi e kos aki?" I ora nan a investiga i a puntra, nan a bisa: "Ta Gideon, yu homber di Joas, a hasi e kos aki."

³⁰E ora ei e hombernan di e stat a bisa Joas: "Trese bo yu homber pa e muri, pasobra el a basha e altar di Baal abou i di berdat el a kap e imagen di Asera, ku tabatin banda di dje, bash'abou."

³¹Ma Joas a bisa tur esnan ku tabata huntu kune: "Ta defende boso kier defende Baal, of ta libra boso kier libr'e? Ken ku defend'e lo wordu mata prome ku manan mainta. Si e ta un dios, lagu'e defende su mes, awor ku un hende a basha su altar abou."

³²Pesei riba e dia ei el a yama Gideon "Jerobaal", ku ta nifika: "Laga Baal defende su mes kontra dje," pasobra el a basha su altar abou.

³³Awor tur e madianitanan i e amalekitanan i e yu hombernan di oriente a reuni; i nan a krusa pasa i a kampa den e vaye di Jezreel.

³⁴Anto e Spiritu di SENOR a bin riba Gideon; i el a supla trompet, i e abiezeritanan a wordu yama huntu pa siguie.

³⁵I el a manda mensaheronan den henter Manases, i nan tambe a wordu yama huntu pa siguie; i el a manda mensaheronan na Aser, Zabulon i Neftali, i nan a bin pa kontra ku nan.

³⁶E ora ei Gideon a bisa Dios: "Si ta libra Bo kier libra Israel pa medio di mi, manera Bo a bisa,

³⁷mira, mi ta pone lana di karne riba e plenchi-di-bati-mainshi. Si tin serena riba e lana so, i henter e suela keda seku, e ora ei lo mi sa ku Bo kier libra Israel pa medio di mi, manera Bo a bisa."

³⁸I asina a sosode. Ora ku el a lanta mainta tempran i a trose e lana, el a trose e serena saka for di e lana, un komchi yen di awa.

³⁹E ora ei Gideon a bisa Dios: "No laga Bo rabia kima kontra mi, i lagami papia un biaha so mas; pa fabor, lagami hasi un test un biaha mas ku e lana; laga e lana so keda seku awor, i laga tin serena riba henter e suela."

⁴⁰I Dios a hasi asina e anochi ei; pasobra e lana so tabata seku, i tabatin serena riba henter e suela.