Read Papantla Totonac Huesnan 7 Bible Online

Huesnan 7 - Papantla Totonac bible

Huesnan 7

¹E ora ei Jerobaal, (esta, Gideon) i henter e pueblo ku tabata huntu kune a lanta tempran i a kampa banda di e fuente di Harod; i e kampamentu di Madian tabata keda panort di nan, banda di e seru di More den e vaye.

²I SENOR a bisa Gideon: "E hendenan ku ta huntu ku bo ta muchu hopi pa Mi entrega Madian den nan man; pa Israel no gaba, bisando: 'Mi mes poder a librami.'

³Pesei anto, bin, proklama pa e hendenan tende, bisando: 'Ken ku tin miedu i ta tembla, lagu'e bolbe i bandona Seru Galaad.'" Asina bint'i dos mil hende a bolbe, ma dies mil a keda.

⁴E ora ei SENOR a bisa Gideon: "Ainda e hendenan ta muchu hopi; hiba nan na e awa i ayanan lo Mi test nan pa bo. Pesei lo t'asina ku esun di kual Mi bisabo: 'Esun aki lo bai ku bo,' e lo bai ku bo; ma tur esnan di kual Mi bisabo: 'Esun aki lo no bai ku bo,' e lo no bai."

⁵Asina el a hiba e pueblo na e awa. I SENOR a bisa Gideon: "Separa tur esnan ku ta bebe awa ku nan lenga, manera kacho ta hasi, for di tur esnan ku ta hinka rudia pa bebe awa."

⁶Awor e kantidat di esnan ku a bebe awa manera kacho, ku nan man na nan boka, tabata tres shen homber; ma tur e restu di e hendenan a hinka rudia pa bebe awa.

⁷I SENOR a bisa Gideon: "Ku e tres shen hombernan ku a bebe awa manera kacho ta hasi lo Mi libra boso, i lo Mi entrega e madianitanan den boso man; pesei, laga tur e otro hendenan bai, kada homber pa su kas."

⁸Asina e tres shen hombernan a kohe e provishonnan di e hendenan i nan trompetnan den nan man. I Gideon a manda tur e otro hombernan di Israel bai, kada un pa su tent, ma a keda ku e tres shen hombernan; i e kampamentu di Madian tabata den e vaye, bou di kaminda Gideon tabata.

⁹Awor e mesun anochi ei SENOR a bis'e: "Lanta, baha bai kontra e kampamentu, pasobra Mi a entregu'e den bo man.

¹⁰Ma si bo tin miedu di baha bai, anto bai na e kampamentu ku bo sirbido Pura,

¹¹i lo bo tende kiko nan ta bisa; i despues bo mannan lo wordu fortalesi pa bo baha bai kontra e kampamentu." Asina e ku su sirbido Pura a baha bai na e postnan pafo di e ehersito ku tabata den e kampamentu.

¹²Awor e madianitanan i e amalekitanan i tur e yu hombernan di oriente tabata drumi abou den e vaye, mes numeroso ku tirakochi; i nan kamelnan tabata asina hopi ku no por a konta nan; nan tabata mes numeroso ku e santu kantu di laman.

¹³Ora Gideon a yega, mira, un homber tabata konta su amigu un sono. I el a bisa: "Mira, mi tabatin un sono; un pan di puspas tabata lora bin den e kampamentu di Madian, i a yega na e tent i a golpia esaki di tal manera ku el a kai, i a bir'e bok'abou, asina ku e tent a kai plat abou."

¹⁴I su amigu a kontesta i a bisa: "Esaki no ta nada otro ku e spada di Gideon, yu di Joas, un homber di Israel; Dios a entrega Madian i henter e kampamentu den su man."

¹⁵I a sosode ku ora Gideon a tende e relato di e sono i su interpretashon, el a buig pa adora Dios. El a bolbe na e kampamentu di Israel i a bisa: "Lanta, pasobra SENOR a entrega e kampamentu di Madian den boso man."

¹⁶I el a parti e tres shen hombernan den tres grupo, i el a duna nan tur trompet i kanika bashi den nan man, ku flambeu den e kanikanan.

¹⁷I el a bisa nan: "Wak mi i hasi meskos. I mira, ora mi yega na rant di e kampamentu, hasi meskos ku mi.

¹⁸Ora ku ami, i tur esnan ku ta huntu ku mi, supla trompet, boso tambe supla trompet tur ront di e kampamentu, i bisa: 'Pa SENOR 1 pa Gideon.'"

¹⁹Asina Gideon, 1 e shen hombernan ku tabata huntu kune, a yega na rant di e kampamentu na kuminsamentu di e di dos warda, ora nan a kaba di kambia warda; i nan a supla e trompetnan i a dal e kanikanan, ku nan tabatin den nan man, kibra.

²⁰Ora ku e tres gruponan a supla e trompetnan i a kibra e kanikanan, nan a tene e flambeunan den nan man robes, i e trompetnan den nan man drechi kla pa supla, i a grita: "Un spada pa SENOR i pa Gideon!"

²¹I kada un tabata para na su luga ront di e kampamentu; i henter e ehersito tabata kore ta grita segun nan tabata hui.

²²I ora nan a supla e tres shen trompetnan, SENOR a pone spada di esun kontra e otro den henter e ehersito; i e ehersito a hui bai te na Bet-sita den direkshon di Zerera, te na e frontera di Abel-mehola, banda di Tabat.

²³I nan a manda yama e hombernan di Israel for di Neftali i Aser i henter Manases, i nan a persigui Madian.

²⁴I Gideon a manda mensaheronan den tur e serunan di Efrain, bisando: "Baha bin kontra Madian i podera di e awanan ku tin nan dilanti te na Bet-bara i Jordan." Asina nan a manda yama tur e hombernan di Efrain, i nan a podera di e awanan te na Bet-bara i Jordan.

²⁵I nan a kaptura e dos lidernan di Madian, Oreb i Zeeb; i nan a mata Oreb na e baranka di Oreb, i nan a mata Zeeb na e baki-di-pers-wendruif di Zeeb, ora ku nan tabata persigui Madian; i for di e otro banda di Jordan nan a trese e kabesnan di Oreb i Zeeb pa Gideon.