Read Papantla Totonac Huesnan 8 Bible Online

Huesnan 8 - Papantla Totonac bible

Huesnan 8

¹E ora ei e hombernan di Efrain a bisa Gideon: "Ta kiko e kos ku bo a hasi ku nos aki di keda sin yama nos ora bo a bai bringa kontra Madian?" I nan a pleita masha hopi mes kune.

²Ma el a bisa nan: "Awor ta kiko mi a hasi kompara ku boso? E pikimentu di wendruif ku a ked'atras den kunuku di Efrain no ta miho ku e kosecha di wendruif di Abiezer?

³Dios a entrega e lidernan di Madian, Oreb i Zeeb, den boso man; i kiko mi por a hasi kompara ku boso?" Anto nan rabia kontra dje a baha ora ku el a bisa esei.

⁴E ora ei Gideon i e tres shen hombernan ku tabata huntu kune a yega na Jordan i a krusa bai na e otro banda, kansa i tog persiguiendo ainda.

⁵I el a bisa e hombernan di Sukot: "Pa fabor, duna e hendenan ku ta siguimi pan, pasobra nan ta kansa, i mi ta persiguiendo Zeba i Zalmuna, e reinan di Madian."

⁶I e lidernan di Sukot a bisa: "Akaso e mannan di Zeba i Zalmuna ta den bo man kaba, ku nos mester duna bo ehersito pan?"

⁷I Gideon a bisa: "Bon anto, ora SENOR entrega Zeba i Zalmuna den mi man, e ora ei lo mi suta boso kurpa ku sumpina di mondi i ku bringamosa."

⁸I for di einan el a bai Peniel, i a papia e mesun kos ku nan; i e hombernan di Peniel a kontest'e meskos ku e hombernan di Sukot a kontesta.

⁹Asina el a papia tambe ku e hombernan di Peniel, bisando: "Ora mi bolbe sano i salvo, lo mi basha e toren aki abou."

¹⁰Awor Zeba i Zalmuna tabata na Karkor, i nan ehersito huntu ku nan, mas o menos diesinku mil homber, tur esnan ku a resta di henter e ehersito di e yu hombernan di oriente; pasobra esnan ku a muri tabata shent'i binti mil homber ku tabata saka spada.

¹¹I Gideon a kohe e kaminda di esnan ku tabata biba den tent pariba di Noba i Jogbeha, i a ataka e kampamentu ora ku e kampamentu no tabata spera esaki.

¹²Ora Zeba i Zalmuna a hui, el a persigui nan i a kaptura e dos reinan di Madian, Zeba i Zalmuna, i a plama henter e ehersito for di otro.

¹³E ora ei Gideon, yu homber di Joas, a bolbe for di bataya, for di e subida di Heres.

¹⁴I el a kaptura un hoben di Sukot i a interogu'e. E ora ei e hoben a skirbi nomber di e prensnan di Sukot i su ansianonan p'e, setent'i shete homber.

¹⁵I el a bai serka e hombernan di Sukot i a bisa: "Ata Zeba i Zalmuna, pa motibu di kendenan boso a probokami, bisando: 'Akaso e mannan di Zeba i Zalmuna ta den bo man kaba, ku nos mester duna pan na bo hombernan ku ta kansa?'"

¹⁶I el a kohe e ansianonan di e stat, i sumpina di mondi i bringamosa, i a kastiga e hombernan di Sukot ku nan.

¹⁷I el a basha e toren di Peniel abou i a mata e hombernan di e stat.

¹⁸E ora ei el a bisa Zeba i Zalmuna: "Ki sorto di hende e hombernan ku boso a mata na Tabor tabata?" I nan a bisa: "Nan tabata manera abo, kada un di nan tabata parse yu di rei."

¹⁹I el a bisa: "Nan tabata mi rumannan, e yu hombernan di mi mama. Manera SENOR ta biba, si boso a laga nan biba, lo mi no a mata boso."

²⁰Anto el a bisa Jeter, su primogenito: "Lanta, mata nan." Ma e hoben no a saka su spada, pasobra e tabatin miedu, komo ku e tabata mucha ainda.

²¹E ora ei Zeba i Zalmuna a bisa: "Lanta abo mes i mata nos; pasobra manera e homber ta, asina su forsa ta." Asina Gideon a lanta i a mata Zeba i Zalmuna, i a kohe e adornonan di luneta ku tabatin na nek di nan kamelnan.

²²Anto e hombernan di Israel a bisa Gideon: "Goberna riba nos, tantu abo komo bo yu homber i bo nietu, pasobra bo a libra nos for di man di Madian."

²³Ma Gideon a bisa nan: "Ami lo no goberna riba boso, ni mi yu homber lo no goberna riba boso; SENOR lo goberna riba boso."

²⁴I Gideon a bisa nan: "Mi ta pidi boso pa kada un di boso dunami un renchi di orea for di su botin." Pasobra nan tabata ismaelita, nan tabatin renchi di orea di oro bisti.

²⁵I nan a bisa: "Ku muchu gustu nos ta dunabo nan." I nan a habri un mantel, i kada un di nan a tira un renchi di orea for di su botin riba dje.

²⁶I peso di e renchinan di orea di oro ku el a pidi tabata mil shete shen siklo di oro, sin konta e adornonan di luneta, e koyarnan i e mantelnan di purpura ku e reinan di Madian tabatin bisti, i sin konta e kadenanan ku tabatin na nek di nan kamelnan.

²⁷I kune Gideon a traha un efod i a pone esaki den su stat, Ofra. I henter Israel a prostitui su mes dor di ador'e ayanan, asina ku esaki a bira un trampa pa Gideon i su kas.

²⁸Asina Madian a wordu someti dilanti di e yunan di Israel, i nan no a lanta kabes mas. I e tera tabatin kuarenta ana di sosiegu den e dianan di Gideon.

²⁹Despues Jerobaal, yu homber di Joas, a bai biba den su mes kas.

³⁰Awor Gideon tabatin setenta yu homber ku tabata su desendientenan direkto, pasobra e tabatin hopi esposa.

³¹I su konkubina ku tabata biba na Sikem tambe a hana un yu homber p'e, i el a yam'e Abimelek.

³²I Gideon, yu homber di Joas, a muri na un edat avansa, i a wordu dera den e tumba di su tata Joas, na Ofra di e abiezeritanan.

³³I a sosode ku asina Gideon a muri, e yunan di Israel a bolbe prostitui nan mes dor di sigui tras di e Baalnan i a hasi Baal-berit nan dios.

³⁴Asina e yunan di Israel no a korda riba SENOR nan Dios, Kende a libra nan for di man di tur nan enemigunan na tur banda;

³⁵ni nan no a mustra karino na e kas di Jerobaal (esta, Gideon), konforme tur e bon ku el a hasi pa Israel.