Read Papantla Totonac Huesnan 9 Bible Online

Huesnan 9 - Papantla Totonac bible

Huesnan 9

¹I Abimelek, yu homber di Jerobaal, a bai Sikem serka e ruman hombernan di su mama, i a papia ku nan i ku henter e famia di kas di tata di su mama, bisando:

²"Papia awor pa tur e lidernan di Sikem tende: 'Kiko ta miho pa boso, pa setenta homber, tur e yu hombernan di Jerobaal, goberna riba boso, of pa un homber so goberna riba boso?' Korda ku mi ta boso wesu i boso karni."

³I e ruman hombernan di su mama a papia tur e palabranan aki na su fabor, pa tur e lidernan di Sikem tende; i nan tabatin e inklinashon pa sigui Abimelek, pasobra nan a bisa: "E ta nos ruman."

⁴I nan a dun'e setenta pida plata for di kas di Baal-berit, ku Abimelek a uza pa kontrata hombernan perverso i iresponsabel, i nan a siguie.

⁵Despues el a bai kas di su tata na Ofra i a mata su ruman hombernan, yunan di Jerobaal, setenta homber, riba un piedra. Ma Jotam, e yu homber di mas chikitu di Jerobaal, a skapa, pasobra el a bai skonde.

⁶I tur e hombernan di Sikem i henter Bet-milo a reuni, i nan a bai i a hasi Abimelek rei banda di e palu di eik di e pilar ku tabata keda na Sikem.

⁷Awor ora nan a bisa Jotam esaki, el a bai para riba kabes di Seru Gerizim i a grita na bos haltu. Asina el a bisa nan: "Skuchami, O hombernan di Sikem, pa Dios por skucha boso.

⁸Un dia e palunan a bai pa ungi un rei pa reina riba nan, i nan a bisa e palu di oleifi: 'Reina riba nos!'

⁹"Ma e palu di oleifi a bisa nan: 'Mi mester laga mi zeta ku kual Dios i hende ta wordu onra, i bai zwai ofer di e palunan?'

¹⁰"E ora ei e palunan a bisa e palu di figo: 'Bin abo, reina riba nos!'

¹¹"Ma e palu di figo a bisa nan: 'Mi mester laga mi dulsura i mi bon fruta, i bai zwai ofer di e palunan?'

¹²"E ora ei e palunan a bisa e mata di wendruif 'Bin abo, reina riba nos!'

¹³"Ma e mata di wendruif a bisa nan: 'Mi mester laga mi bina nobo, ku ta alegra Dios i hende, i bai zwai ofer di e palunan?'

¹⁴"Finalmente tur e palunan a bisa e mata di sumpina: 'Bin abo, reina riba nos!'

¹⁵"I e mata di sumpina a bisa e palunan: 'Si di berdat boso ta ungimi komo rei riba boso, bin tuma refugio den mi sombra; ma si no, ku kandela sali for di e mata di sumpina i kima e palunan di seda di Libano kompletamente.'

¹⁶"Pesei awor, si boso a aktua den berdat i ku integridat dor di hasi Abimelek rei, i si boso a trata Jerobaal i su kas bon, i a trat'e manera el a merese--

¹⁷pasobra mi tata a bringa pa boso i a riska su bida i a libra boso for di man di Madian,

¹⁸ma boso a lanta kontra kas di mi tata awe i a mata su yu hombernan, setenta homber, riba un piedra, i a hasi Abimelek, yu di su sirbiente, rei riba e hombernan di Sikem, pasobra e ta boso ruman--

¹⁹si boso a aktua anto den berdat i ku integridat ku Jerobaal i su kas awe, regosiha den Abimelek, i laga e tambe regosiha den boso.

²⁰Ma si no, laga kandela sali for di Abimelek i kima e hombernan di Sikem i Bet-milo kompletamente; i laga kandela sali for di e hombernan di Sikem i for di Bet-milo i kima Abimelek kompletamente."

²¹Anto Jotam a skapa i a hui bai Beer, i a keda ayanan pa motibu di su ruman homber Abimelek.

²²Awor Abimelek a goberna tres ana riba Israel.

²³Anto Dios a manda un spiritu malu entre Abimelek i e hombernan di Sikem; i e hombernan di Sikem a trata Abimelek ku traishon,

²⁴pa e violensia ku a wordu hasi na e setenta yu hombernan di Jerobaal por a bin, i pa nan sanger por a kai riba nan ruman homber Abimelek, kende a mata nan, i riba e hombernan di Sikem, kendenan a fortalese su mannan pa mata su ruman hombernan.

²⁵I e hombernan di Sikem a pone hombernan skonde pa atak'e riba e kabesnan di e serunan, i nan tabata roba tur hende ku tabata pasa banda di nan riba e kaminda; i esaki a wordu konta na Abimelek.

²⁶Awor Gaal, yu homber di Ebed, a bin ku su rumannan, i a krusa bin Sikem; i e hombernan di Sikem a pone nan konfiansa den dje.

²⁷I nan a bai den kunuku i a kosecha e wendruifnan di nan kunukunan i a trapa e wendruifnan, i a tene un fiesta; i nan a bai den kas di nan dios i a kome i bebe, i a maldishona Abimelek.

²⁸E ora ei Gaal, yu homber di Ebed, a bisa: "Ta ken ta Abimelek, i ta ken ta Sikem, ku nos mester sirbie? No ta yu di Jerobaal e ta, i no ta Zebul ta su ofisial? Sirbi e hombernan di Hamor, tata di Sikem; ma pakiko nos mester sirbi Abimelek?

²⁹Pesei, mara e pueblo aki por tabata bou di mi outoridat! E ora ei lo mi a kore ku Abimelek." I el a bisa Abimelek: "Oumenta bo ehersito i sali bin."

³⁰I ora Zebul, gobernado di e stat, a tende e palabranan di Gaal, yu homber di Ebed, su rabia a sende.

³¹I el a manda mensaheronan serka Abimelek ku engano, bisando: "Mira, Gaal, yu homber di Ebed, i su ruman hombernan, a bin Sikem; i mira, nan ta instiga e stat kontra bo.

³²Pesei anto, lanta anochi, abo i e hendenan ku ta huntu ku bo, i skonde warda den kunuku.

³³I lo sosode ku mainta, asina solo sali, bo mester lanta tempran i ataka e stat; i mira, ora e ku e hendenan ku ta huntu kune sali bin kontra bo, lo bo hasi ku nan tur loke bo por."

³⁴Asina Abimelek i tur e hendenan ku tabata huntu kune a lanta anochi, i a skonde warda kontra Sikem den kuater grupo.

³⁵Awor Gaal, yu homber di Ebed, a sali bai para den entrada di e porta di stat; i Abimelek i e hendenan ku tabata huntu kune a sali for di e luga di skonde.

³⁶I ora Gaal a mira e hendenan, el a bisa Zebul: "Mira, tin hende ta baha bin for di kabes di e serunan." Ma Zebul a bis'e: "Ta e sombra di e serunan bo ta mira pa hende."

³⁷I Gaal a bolbe papia i a bisa: "Mira, tin hende ta baha bin for di e parti mas haltu di e tera, i un grupo ta bin for di kaminda e palu di eik di e adivinadonan ta keda."

³⁸E ora ei Zebul a bis'e: "Unda bo gabamentu a keda awor, ora bo a bisa: 'Ta ken Abimelek ta ku nos mester sirbie?' No ta e hendenan ku bo a despresia esakinan ta? Sali awor i bringa ku nan!"

³⁹Asina Gaal a sali bai dilanti di e lidernan di Sikem i a bringa ku Abimelek.

⁴⁰I Abimelek a persiguie, i el a hui su dilanti; i hopi a kai herida te na entrada di e porta di stat.

⁴¹Anto Abimelek a keda na Aruma, ma Zebul a kore ku Gaal i su ruman hombernan, asina ku nan no por a keda Sikem.

⁴²Awor a sosode ku su manise e pueblo a sali bai den kunuku, i esaki a wordu partisipa na Abimelek.

⁴³Anto el a kohe su hendenan i a parti nan den tres grupo, i a skonde warda den kunuku; ora ku el a wak i a mira e pueblo ta sali for di e stat, el a ataka nan i a mata nan.

⁴⁴E ora ei Abimelek i e grupo ku tabata huntu kune a basha bai dilanti i a para den entrada di e porta di stat; e ora ei e dos otro gruponan a basha bai riba tur esnan ku tabata den kunuku i a mata nan.

⁴⁵I henter e dia ei Abimelek a bringa kontra e stat, i el a kaptura e stat i a mata e hendenan ku tabata den dje; despues el a basha e stat kompletamente abou i a stroi salu riba dje.

⁴⁶Ora tur e lidernan di e toren di Sikem a tende esaki, nan a bai den e kamber paden di e tempel di El-berit.

⁴⁷I a wordu partisipa na Abimelek ku tur e lidernan di e toren di Sikem tabata reuni huntu.

⁴⁸Asina Abimelek a subi bai na Seru Salmon, e ku tur e hendenan ku tabata huntu kune; i Abimelek a kohe un hacha den su man i a kap un rama for di e palunan, i a his'e pone riba su skouder. Kaba el a bisa e hombernan ku tabata huntu kune: "Loke boso a mirami hasi, pura hasi meskos."

⁴⁹I tur e hendenan tambe kada un a kap su rama i a sigui Abimelek, i a pone nan riba e kamber paden i a pega e kamber paden na kandela riba esnan ku tabata den dje, asina ku tur e hendenan di e toren di Sikem tambe a muri, mas o menos mil homber i muhe.

⁵⁰E ora ei Abimelek a bai Tebes, i el a kampa kontra Tebes, i a kaptur'e.

⁵¹Ma tabatin un toren fortifika den sentro di e stat, i tur e hombernan i muhenan, huntu ku tur e lidernan di e stat, a hui bai ayanan i a sera nan kurpa aden; i nan a subi riba dak di e toren.

⁵²Asina Abimelek a yega na e toren i a bringa kontra dje, i a yega te na entrada di e toren pa kim'e ku kandela.

⁵³Ma un muhe a tira un piedra di mulina riba Abimelek su kabes, i a kibra su kraneo.

⁵⁴E ora ei lihe-lihe el a yama e hoben, su kargado di arma, i a bis'e: "Saka bo spada i matami, pa nan no bisa di mi: 'Un muhe a mat'e.'" Asina e hoben a traspas'e ku spada, i el a muri.

⁵⁵I ora e hombernan di Israel a mira ku Abimelek tabata morto, kada un a bai su kas.

⁵⁶Asina Dios a paga e maldat di Abimelek, ku el a komete kontra su tata dor di mata su setenta ruman hombernan.

⁵⁷Tambe Dios a debolbe tur e maldat di e hombernan di Sikem riba nan mes kabes, i e maldishon di Jotam, yu homber di Jerobaal, a bin riba nan.