Read Papantla Totonac Judas 1 Bible Online

Judas 1 - Papantla Totonac bible

Judas 1

¹Judas, un sirbido di Jesu-Cristo, i ruman di Santiago, Na esnan ku ta e yamanan, stimanan den Dios Tata, i konserva pa Jesu-Cristo:

²Ku miserikordia i pas i amor sea multiplika na boso.

³Rumannan stima, mientras ku mi tabata hasi tur esfuerso pa skirbi boso di nos salbashon komun, mi a sinti e nesesidat di skirbi boso i spierta boso pa lucha seriamente pa e fe ku un bes i pa semper a wordu entrega na e santunan.

⁴Pasobra sierto personanan a sluip drenta sin ku ningun hende a ripara, esta, esnan ku for di hopi tempu kaba a wordu destina pa e kondenashon aki, hendenan impio, kendenan ta kambia e grasia di nos Dios den libertinahe i ta nenga nos uniko Maestro i Senor, Jesu-Cristo.

⁵Awor, apesar ku ya boso sa tur kos un bes i pa semper, mi kier rekorda boso ku ounke un tempu Senor a salba un pueblo for di tera di Egipto, despues El a destrui esnan ku no a kere.

⁶I angelnan ku no a warda nan mes posishon, ma a bandona nan propio luga di biba, El a tene na kadena eterno den skuridat pa e huisio di e gran dia.

⁷Meskos ku Sodoma i Gomora i e statnan ront di nan, ku na e mesun manera ku esakinan a entrega nan mes na fornikashon i a bai tras di pashonnan ku ta kontra naturalesa, a wordu poni komo un ehempel, dor di sufri e kastigu di kandela eterno.

⁸Tog di e mesun manera e hendenan aki, dor di sonamentu tambe, ta kontamina e karni i ta rechasa outoridat, i ta blasfema mahestatnan angelikal.

⁹Ma e arkangel Miguel, ora ku e tabata pleita ku diabel i tabata diskuti tokante di e kurpa di Moises, no a tribi pronunsia un huisio di maldishon kontra dje, ma a bisa: "SENOR reprendebo."

¹⁰Ma e hombernan aki ta papia malu di tur loke nan no ta komprende; i e kosnan ku dor di instinto nan sa di dje, manera bestia ku no por rasona, den e kosnan aki nan ta korumpi nan mes.

¹¹Ai di nan! Pasobra nan a sigui e kaminda di Kain, i pa ganashi nan a kore bai den e eror di Balaam, i a perese den e rebelion di Kore.

¹²E hombernan aki ta manchanan na boso fiestanan di amor, ora nan ta fiesta huntu ku boso sin miedu, perkurando pa nan mes; nubianan sin awa, hiba pa bientunan, palunan di herfst sin fruta, dos biaha morto, ranka ku rais ku tur;

¹³olanan brutu di laman ku ta saka nan mes berguensa manda ariba manera skuma; streanan ku ta dwal, pa kualnan e skuridat profundo a wordu reserva pa semper.

¹⁴I tokante di esakinan Enok tambe, den e di shete generashon for di Adam, a profetisa, bisando: "Mira, Senor a bin ku hopi miles di Su santunan,

¹⁵pa ehekuta huisio kontra tur, i pa kondena tur e hendenan impio pa tur nan echonan di impiedat ku nan a komete den impiedat, i pa tur e kosnan duru ku pekadonan impio a papia kontra djé."

¹⁶Esakinan ta murmuradonan ku ta gusta keha, ku ta sigui tras di nan mes pashonnan; nan ta papia ku arogansia, i ta labia hende pa nan saka probecho.

¹⁷Ma boso, rumannan stima, mester korda e palabranan ku a wordu papia di antemano dor di e apostelnan di nos Senor Jesu-Cristo,

¹⁸ku nan tabata bisa boso: "Den e ultimo tempu lo tin bofonadonan ku ta sigui tras di nan mes pashonnan perverso."

¹⁹Esakinan ta esnan ku ta kousa divishon, hendenan sensual, ku no tin e Spiritu.

²⁰Ma boso, rumannan stima, edifikando boso mes den boso santisimo fe, hasiendo orashon den Spiritu Santu,

²¹konserva boso mes den e amor di Dios, sperando ku gran antisipashon e miserikordia di nos Senor Jesu-Cristo pa bida eterno.

²²I tene miserikordia di algun ku tin duda;

²³salba otronan, rankando nan for di e kandela; i di otronan, tene miserikordia ku temor, aboresiendo asta e pana kontamina dor di e karni.

²⁴Awor na Esun ku ta poderoso pa warda boso di trompeka, i pa hasi boso para sin kulpa den e presensia di Su gloria ku gran alegria,

²⁵na e uniko Dios nos Salbador, pa medio di Jesu-Cristo nos Senor, sea gloria, mahestat, dominio i outoridat, prome ku tur tempu i awor i pa semper. Amen.