Read Papantla Totonac Revelashonnan 1 Bible Online

Revelashonnan 1 - Papantla Totonac bible

Revelashonnan 1

¹E Revelashon di Jesu-Cristo, ku Dios a dun'E pa mustra Su sirbidonan e kosnan ku mester sosode pronto; i El a manda esaki i a komunik'e pa medio di Su angel na Su sirbido Juan,

²kende a duna testimonio di e palabra di Dios i e testimonio di Jesu-Cristo, esta, tur loke el a mira.

³Bendishona ta esun ku lesa i esnan ku tende e palabranan di e profesia, i ku paga atenshon na e kosnan ku ta para skirbi den dje; pasobra e tempu ta serka.

⁴Juan, Na e shete iglesianan ku ta na Asia: Grasia sea ku boso i pas di Esun ku ta i ku tabata i ku lo bin, i di e shete Spiritunan ku ta dilanti di Su trono;

⁵i di Jesu-Cristo, e testigu fiel, e primogenito di e mortonan i e gobernante di e reinan di tera. Na Esun ku ta stima nos, i ku a libra nos di nos pikanan pa medio di Su sanger--

⁶i El a hasi nos bira un reino, saserdotenan pa Su Dios i Tata--na djé sea e gloria i e dominio pa semper i semper. Amen.

⁷Mira, E ta bin ku e nubianan, i tur wowo lo mir'E, tambe esnan ku a traspas'E; i tur e tribunan di tera lo lamenta pa Su motibu. Si. Amen.

⁸"Ami ta e Alfa i e Omega," Senor Dios ta bisa, "Esun ku ta i Esun ku tabata i Esun ku ta bin, e Todopoderoso."

⁹Ami, Juan, boso ruman i ko-partisipante den tribulashon, i den e reino i e pasenshi di Jesu-Cristo, tabata riba e isla ku yama Patmos, pa motibu di e palabra di Dios i e testimonio di Jesus.

¹⁰Riba e dia di Senor mi tabata den Spiritu, i mi a tende mi tras un bos duru manera e zonidu di trompet,

¹¹bisando: "Skirbi den un buki loke bo ta mira, i manda esaki pa e shete iglesianan: pa Efeso i pa Smirna i pa Pergamo i pa Tiatira i pa Sardis i pa Filadelfia i pa Laodisea."

¹²I mi a bira pa mira e bos ku tabata papia ku mi. I ora mi a bira mi a mira shete kandela di oro,

¹³i meimei di e kandelanan Un manera e Yu di Hende, bisti ku un pana ku tabata yega te na Su pia, i ku Su pechu faha ku un faha di oro.

¹⁴I Su kabes i Su kabei tabata blanku manera lana blanku, manera sneu; i Su wowonan tabata manera un flam di kandela;

¹⁵i Su pianan tabata manera brons lombra, despues ku esaki a wordu refina den fornu, i Su bos tabata manera e zonidu di hopi awanan.

¹⁶I den Su man drechi E tabatin shete strea teni; i for di Su boka a sali un spada skerpi di dos filo; i Su kara tabata manera solo, briyando ku tur su forsa.

¹⁷I ora mi a mir'E, mi a kai na Su pia manera un homber morto. I El a pone Su man drechi riba mi, bisando: "No tene miedu; Ami ta e Prome i e Ultimo,

¹⁸i Esun ku ta biba; i Mi tabata morto, i mira, Mi ta bibu pa semper, i Mi tin e yabinan di morto i di Hades.

¹⁹"Skirbi anto e kosnan ku bo a mira, i e kosnan ku ta, i e kosnan ku lo tuma luga despues di e kosnan aki.

²⁰Pa loke ta e misterio di e shete streanan ku bo a mira den Mi man drechi, i e shete kandelanan di oro: e shete streanan ta e angelnan di e shete iglesianan, i e shete kandelanan ta e shete iglesianan.