Read Papantla Totonac Revelashonnan 10 Bible Online

Revelashonnan 10 - Papantla Totonac bible

Revelashonnan 10

¹I mi a mira un otro angel fuerte ta baha for di shelu, bisti ku un nubia; i tabatin un regenbog riba su kabes, i su kara tabata manera solo, i su pianan tabata manera pilar di kandela;

²i e tabatin den su man un buki chikitu ku tabata habri. I el a pone su pia drechi riba laman i su pia robes riba tera;

³i el a grita duru, manera ora leon ta gruna; i ora ku el a kaba di grita, e shete tirunan di strena a laga nan bos zona.

⁴I ora ku e shete tirunan di strena a kaba di papia, mi tabata kla pa skirbi, ma mi a tende un bos for di shelu, bisando: "Seya e kosnan ku e shete tirunan di strena a bisa, i no skirbi nan."

⁵I e angel ku mi a mira para riba laman i riba tera a lanta su man drechi na shelu,

⁶i a hura pa Esun ku ta biba pa semper i semper, Kende a krea shelu i e kosnan ku tin den dje, tera i e kosnan ku tin den dje, laman i e kosnan ku tin den dje, ku lo no tin tardansa mas,

⁷ma den e dianan di e bos di e di shete angel, ora ku e ta kla pa toka, e misterio di Dios lo ta kumpli, manera El a anunsia na Su sirbidonan, e profetanan.

⁸I e bos ku mi a tende for di shelu, mi a bolbe tende ta papia ku mi, bisando: "Bai kohe e buki ku ta habri den man di e angel ku ta para riba laman i riba tera."

⁹I mi a bai serka e angel i a bis'e pa dunami e buki chikitu. I el a bisami: "Tum'e i kom'e; i e lo hasi bo stoma marga, ma den bo boka e lo ta dushi manera miel."

¹⁰I mi a tuma e buki chikitu for di e angel su man i a kom'e, i e tabata dushi manera miel den mi boka; i ora mi a kaba di kom'e, mi stoma a bira marga.

¹¹I nan a bisami: "Bo mester bolbe profetisa tokante di hopi pueblo i nashon i lenga i rei."