Read Papantla Totonac Revelashonnan 11 Bible Online

Revelashonnan 11 - Papantla Totonac bible

Revelashonnan 11

¹I un bara-di-midi manera un garoti a wordu duna na mi; i a wordu bisa na mi: "Lanta i midi e tempel di Dios i e altar i esnan ku ta adora den dje.

²I laga e plenchi ku ta pafo di e tempel ked'afo, i no midie, pasobra el a wordu duna na e nashonnan; i nan lo trapa e stat santu bou di nan pia, kuarent'i dos luna largu.

³I lo mi duna outoridat na mi dos testigunan, i nan lo profetisa pa 1.260 dia, bisti na pana-di-saku."

⁴Esakinan ta e dos palunan di oleifi i e dos kandelanan ku ta para dilanti di e Senor di tera.

⁵I si kualkier hende kier hasi nan dano, kandela ta sali for di nan boka i ta devora nan enemigunan; i si kualkier hende lo kier a hasi nan dano, na e manera aki e mester wordu mata.

⁶Esakinan tin e poder pa sera shelu, asina ku awa lo no yobe durante di e dianan ku nan ta profetisa; i nan tin poder riba e awanan pa hasi nan bira sanger, i pa suta tera ku tur sorto di plaga, ki ora ku nan ta desea.

⁷I ora nan a kaba di duna nan testimonio, e bestia ku ta sali for di e abismo lo hasi guera kontra nan, i lo vense nan i mata nan.

⁸I nan kurpanan morto lo keda tira riba e kaya di e gran stat, ku spiritualmente yama Sodoma i Egipto, kaminda tambe nan Senor a wordu krusifika.

⁹I pa tres dia i mei esnan di e pueblonan i tribunan i lenganan i nashonnan lo mira nan kurpanan morto, i lo no permit! pa nan kurpanan morto wordu dera.

¹⁰I esnan ku ta biba riba tera lo regosiha pa nan motibu i hasi fiesta; i nan lo manda regalo pa otro, pasobra e dos profetanan aki a tormenta esnan ku ta biba riba tera.

¹¹I despues di e tres dianan i mei e rosea di bida for di Dios a drenta den nan, i nan a lanta para riba nan pia; i gran temor a kai riba esnan ku tabata mira nan.

¹²I nan a tende un bos duru for di shelu ta bisa nan: "Subi bin aki riba." I nan a subi bai shelu den e nubia, i nan enemigunan a mira nan.

¹³I na e mesun ora ei tabatin un temblor grandi, i un desimo parti di e stat a kai; i shete mil hende a wordu mata den e temblor, i e restu a spanta masha i a duna gloria na e Dios di shelu.

¹⁴E di dos ai a pasa; at'e di tres ai ta serka di bin.

¹⁵I e di shete angel a toka; i a zona bosnan duru den shelu, bisando: "E reino di mundu a bira e reino di nos Senor, i di Su Cristo; i E lo reina pa semper i semper."

¹⁶I e bint'i kuater ansianonan, kendenan ta sinta dilanti di Dios riba nan trono, a tira nan kurpa abou ku nan kara te na suela i a adora Dios,

¹⁷bisando: "Nos ta gradisiBo, O Senor Dios, e Todopoderoso, Kende ta i Kende tabata, pasobra Bo a tuma Bo gran poder i a kuminsa reina.

¹⁸I e nashonnan a bira furioso, i Bo furia a bin, i a yega e tempu pa e mortonan wordu huzga, i e tempu pa duna na Bo sirbidonan, e profetanan, nan rekompensa, i na e santunan i na esnan ku ta teme Bo nomber, tantu e chikitunan komo e grandinan, i pa destrui esnan ku ta destrui e tera."

¹⁹I e tempel di Dios, ku ta den shelu, a wordu habri; i e arka di Su aliansa a parese den Su tempel, i tabatin rayonan di lamper i zonidunan i tirunan duru di strena i un temblor i un gran tempestat di hagel.