Read Papantla Totonac Revelashonnan 12 Bible Online

Revelashonnan 12 - Papantla Totonac bible

Revelashonnan 12

¹I un senal grandi a parese na shelu: un muhe bisti ku solo, i ku luna bou di su pianan, i riba su kabes un korona di diesdos strea;

²i e tabata na estado; i el a grita, siendo den dolo di parto i ansha di duna lus.

³I un otro senal a parese na shelu: i mira, un dragon grandi, kora, ku shete kabes i dies kachu, i riba su kabesnan shete diadema.

⁴I su rabu a lastra un di tres parti di e streanan di shelu bai kune, i a tira nan riba tera. I e dragon a bai para dilanti di e muhe ku tabata serka di duna lus, pa asina ku el a duna lus, e devora su yu.

⁵I el a duna lus na un yu, un yu homber, ku lo goberna tur nashon ku bara di heru; i su yu a wordu kohl hiba na Dios i na Su trono.

⁶I e muhe a hui bai den desierto, kaminda e tabatin un luga ku Dios a prepara, asina ku ayanan e por a wordu alimenta pa 1.260 dia.

⁷I tabatin guera den shelu, Miguel i su angelnan tabata hasi guera kontra e dragon. I e dragon i su angelnan tabata hasi guera,

⁸i nan no a prevalese, i no tabatin luga mas pa nan den shelu.

⁹I e gran dragon a wordu tira abou, e kolebra di antiguedat, kende ta wordu yama diabel i Satanas, kende ta gana henter mundu; el a wordu tira abou riba tera, i su angelnan a wordu tira abou huntu kune.

¹⁰I mi a tende un bos duru den shelu, bisando: "Awor e salbashon i e poder i e reino di nos Dios i e outoridat di Su Cristo a yega, pasobra e akusado di nos rumannan, ku ta akusa nan di dia i anochi dilanti di nos Dios, a wordu tira abou.

¹¹I nan a vens'e pa motibu di e sanger di e Lamchi i pa motibu di e palabra di nan testimonio, i nan no a stima nan bida te na morto.

¹²Pa e motibu aki, regosiha, O shelunan i boso ku ta biba den nan. Ai di tera i laman, pasobra diabel a baha bin serka boso ku gran furia, sabiendo ku ta ked'e solamente un poko tempu mas."

¹³I ora ku e dragon a mira ku el a wordu tira abou riba tera, el a persigui e muhe ku a duna lus na e yu homber.

¹⁴I e dos halanan di e aguila grandi a wordu duna na e muhe, pa e bula bai den desierto na su luga, kaminda el a wordu alimenta pa un tempu i tempunan i mitar di un tempu, for di presensia di e kolebra.

¹⁵I for di su boka e kolebra a basha awa manera un riu tras di e muhe, pa hasi ku e diluvio ta lastr'e bai kune.

¹⁶I tera a yuda e muhe, i tera a habri su boka i a bebe e riu ku e dragon a basha for di su boka.

¹⁷I e dragon tabata furioso riba e muhe, i a bai pa hasi guera ku e restu di su desendientenan, kendenan ta warda e mandamentunan di Dios i tin e testimonio di Jesu-Cristo.