Read Papantla Totonac Revelashonnan 13 Bible Online

Revelashonnan 13 - Papantla Totonac bible

Revelashonnan 13

¹I e tabata para riba e santu kantu di laman. I mi a mira un bestia ta subi sali for di den laman i e tabatin dies kachu i shete kabes, i riba su kachunan tabatin dies diadema, i riba su kabesnan tabatin nombernan di blasfemia.

²I e bestia ku mi a mira tabata manera un leopardo, i su pianan tabata manera pia di ber, i su boka manera boka di leon. I e dragon a dun'e su poder i su trono i gran outoridat.

³I mi a mira un di su kabesnan komo si fuera esaki a wordu herida pa muri, i su herida fatal a wordu kura. I henter tera a keda asombra i a sigui tras di e bestia;

⁴i nan a adora e dragon, pasobra el a duna su outoridat na e bestia; i nan a adora e bestia, bisando: "Ken ta manera e bestia, i ken ta kapas pa hasi guera kontra dje?"

⁵I a wordu duna na dje un boka ku tabata papia palabranan arogante i blasfemia; i outoridat pa aktua kuarent'i dos luna largu a wordu duna na dje.

⁶I el a habri su boka pa blasfema Dios, pa blasfema Su nomber i Su tabernakel, esta, esnan ku ta biba den shelu.

⁷I el a wordu permiti pa hasi guera ku e santunan i pa vense nan; i outoridat riba tur tribu i pueblo i lenga i nashon a wordu duna na dje.

⁸I tur ku ta biba riba tera lo ador'e, tur esnan ku nan nomber no a wordu skirbi desde e fundashon di mundu den e buki di bida di e Lamchi ku a wordu mata.

⁹Esun ku tin orea, lagu'e tende.

¹⁰Esun ku ta destina pa bai den koutiverio, den koutiverio e ta bai; esun ku mata ku spada, ku spada e mester wordu mata. At'aki e perseveransia i e fe di e santunan.

¹¹I mi a mira un otro bestia ta subi sali for di den tera; i e tabatin dos kachu manera lamchi, i e tabata papia manera dragon.

¹²I e ta eherse tur e outoridat di e prome bestia den su presensia. I e ta hasi tera, i esnan ku ta biba den dje, adora e prome bestia, kende su herida fatal a wordu kura.

¹³I e ta hasi senalnan grandi, asina ku asta e ta hasi kandela baha for di shelu bin riba tera den bista di hende.

¹⁴I e ta gana esnan ku ta biba riba tera pa medio di e milagernan ku a wordu permiti na dje pa hasi den presensia di e bestia, bisando esnan ku ta biba riba tera pa traha un imagen na onor di e bestia ku tabatin e herida di spada i ku a bolbe biba.

¹⁵I a wordu permiti na dje pa duna rosea na e imagen di e bestia, pa e imagen di e bestia por a papia tambe, i pa hasi ku tur esnan ku no ta adora e imagen di e bestia ta wordu mata.

¹⁶I e ta hasi ku na tur, chikitu i grandi, riku i pober, liber i esklabu, un marka ta wordu duna na nan man drechi of na nan frenta,

¹⁷i ku ningun hende no por kumpra ni bende, ku eksepshon di esun ku tin e marka: e nomber di e bestia of e number di su nomber.

¹⁸Ata sabiduria aki. Laga esun ku tin komprendementu kalkula e number di e bestia, pasobra e number ta number di un hende; i su number ta 666.