Read Papantla Totonac Revelashonnan 14 Bible Online

Revelashonnan 14 - Papantla Totonac bible

Revelashonnan 14

¹I mi a wak, i ata e Lamchi tabata para riba Seru Sion, i huntu kuné 144.000 ku tabatin Su nomber i e nomber di Su Tata skirbi na nan frenta.

²I mi a tende un bos for di shelu, manera e zonidu di hopi awanan i manera e zonidu di strena duru, i e bos ku mi a tende tabata manera e zonidu di tokadonan di arpa, tokando nan arpa.

³I nan tabata kanta un kantika nobo dilanti di e trono i dilanti di e kuater kriaturanan bibu i e ansianonan; i ningun hende no por a sina e kantika ei, sino solamente e 144.000 ku a wordu kumpra for di tera.

⁴Esakinan ta esnan ku no a wordu kontamina ku muhe, pasobra nan a tene nan mes birgen. Esakinan ta esnan ku ta sigui e Lamchi unda ku E bai. Esakinan a wordu kumpra for di entre hende komo e prome frutanan pa Dios i pa e Lamchi.

⁵I mentira no a wordu hana den nan boka; nan ta sin kulpa.

⁶I mi a mira un otro angel ta bula meimei di shelu, kende tabatin un evangelio eterno pa predika na esnan ku ta biba riba tera, i na tur nashon i tribu i lenga i pueblo;

⁷i el a bisa na bos haltu: "Teme Dios i dun'E gloria, pasobra e ora di Su huisio a yega; i adora Esun ku a traha shelu i tera i laman i fuentenan di awa."

⁸I un otro angel, un di dos, a sigui, bisando: "El a kai! Ata e gran Babilonia a kai, esun ku a hasi tur e nashonnan bebe di e bina di e pashon di su inmoralidat."

⁹I un otro angel, un di tres, a sigui nan, bisando na bos haltu: "Si un hende adora e bestia i su imagen, i risibi un marka na su frenta of na su man,

¹⁰e tambe lo bebe di e bina di e furia di Dios, ku ta wordu basha puru den e komchi di Su rabia; i e lo wordu tormenta ku kandela i swafel den presensia di e angelnan santu i den presensia di e Lamchi.

¹¹I e huma di nan tormento ta subi bai ariba pa semper i semper; i nan no tin sosiegu di dia ni anochi, esnan ku ta adora e bestia i su imagen, i tur ku ta risibi e marka di su nomber."

¹²At'aki e perseveransia di e santunan ku ta warda e mandamentunan di Dios i nan fe den Jesus.

¹³I mi a tende un bos for di shelu, bisando: "Skirbi: 'Bendishona ta e mortonan ku di awor padilanti ta muri den Senor! Si," e Spiritu ta bisa, "ku nan sosega di nan trabounan, pasobra nan obranan ta sigui huntu ku nan."

¹⁴I mi a wak, i ata un nubia blanku, i sinta riba e nubia tabatin Un manera e Yu di Hende, ku un korona di oro riba Su kabes i un sikkel skerpi den su man.

¹⁵I un otro angel a sali for di e tempel, gritando na bos haltu na Esun ku tabata sinta riba e nubia: "Zwai bo sikkel i kosecha, pasobra e ora di kosecha a yega, pasobra e kosecha di tera ta hechu."

¹⁶I Esun ku tabata sinta riba e nubia a zwai Su sikkel ofer di tera, i tera a wordu kosecha.

¹⁷I un otro angel a sali for di e tempel ku ta den shelu, i e tambe tabatin un sikkel skerpi.

¹⁸I un otro angel, esun ku tin poder riba kandela, a sali for di e altar; i na bos haltu el a yama esun ku tabatin e sikkel skerpi, bisando: "Hinka bo sikkel skerpi, i rekohe e troshinan for di e mata di wendruif di e tera, pasobra su wendruifnan ta hechu."

¹⁹I e angel a zwai su sikkel riba tera, i a rekohe e troshinan di e mata di wendruif di tera, i a tira nan den e gran baki-di-pers-wendruif di e furia di Dios.

²⁰I e baki-di-pers-wendruif a wordu trapa pafo di e stat, i sanger a sali for di e baki-di-pers-wendruif, i esaki a yega te na frena di e kabainan, pa un distansia di tres shen kilometer.