Read Papantla Totonac Revelashonnan 16 Bible Online

Revelashonnan 16 - Papantla Totonac bible

Revelashonnan 16

¹I mi a tende un bos duru for di e tempel ta bisa e shete angelnan: "Bai i basha e shete komchinan di e furia di Dios riba tera."

²I e prome angel a bai i a basha su komchi riba tera; i esaki a bira un yaga askeroso i maligno riba e hendenan ku tabatin e marka di e bestia i ku tabata adora su imagen.

³I e di dos angel a basha su komchi den laman, i esaki a bira sanger manera sanger di un hende morto; i tur ser bibu den laman a muri.

⁴I e di tres angel a basha su komchi den e riunan i e fuentenan di awa; i esakinan a bira sanger.

⁵I mi a tende e angel di e awanan ta bisa: "Hustu bo ta, O Senor, Kende ta i Kende tabata, O Abo, Esun ku ta Santu, pasobra Bo a huzga e kosnan aki;

⁶pasobra nan a drama e sanger di e santunan i e profetanan, i Bo a duna nan sanger pa bebe. Nan ta merese esaki."

⁷I mi a tende e altar ta bisa: "Si, O Senor Dios Todopoderoso, berdadero i hustu ta Bo huisionan."

⁸I e di kuater angel a basha su komchi riba solo; i a wordu permiti na dje pa kima hende ku kandela.

⁹I hende a wordu kima ku kalor teribel; i nan a blasfema e nomber di Dios, Kende tin poder riba e plaganan aki; i nan no a repenti pa dun'E gloria.

¹⁰I e di sinku angel a basha su komchi riba trono di e bestia; i su reino a bira skur; i nan a morde nan lenga di dolo,

¹¹i nan a blasfema e Dios di shelu pa motibu di nan dolonan i nan yaganan; i nan no a repenti di nan obranan.

¹²I e di seis angel a basha su komchi riba e gran Riu, Eufrates; i su awa a seka, pa e kaminda wordu prepara pa e reinan di oriente.

¹³I mi a mira ta sali for di boka di e dragon i for di boka di e bestia i for di boka di e profeta falsu, tres spiritu impuru manera dori;

¹⁴pasobra nan ta spiritunan di demononan ku ta hasi milagernan, ku ta sali bai serka e reinan di henter mundu, pa reuni nan pa e guera di e gran dia di Dios Todopoderoso.

¹⁵("Mira, Mi ta bin manera ladron. Bendishona ta esun ku keda lanta i keda ku su pananan bisti, pa e no kana sunu i hende mira su berguensa.")

¹⁶I nan a reuni nan tur huntu na e luga ku na lenga hebreo yama Armagedon.

¹⁷I e di shete angel a basha su komchi den laira; i a sali un bos duru for di e tempel for di e trono, bisando: "Ta kumpli".

¹⁸I tabatin rayonan di lamper i zonidunan i tirunan duru di strena; i tabatin un temblor grandi, manera no tabatin nunka desde ku hende a bin na eksistensia riba tera, asina un temblor grandi i fuerte e tabata.

¹⁹I e gran stat a spleit den tres parti, i e statnan di e nashonnan a kai. I e gran Babilonia a wordu rekorda dilanti di Dios, pa dun'e e kopa di e bina di Su furia ardiente.

²⁰I tur isla a hui bai, i e serunan no a wordu hana mas.

²¹I piedranan di hagel masha grandi mes, di mas o menos shen liber kada un, a kai for di shelu riba hende; i nan a blasfema Dios pa motibu di e plaga di hagel, pasobra e plaga aki tabata masha pisa mes.