Read Papantla Totonac Revelashonnan 18 Bible Online

Revelashonnan 18 - Papantla Totonac bible

Revelashonnan 18

¹Despues di e kosnan aki mi a mira un otro angel ta baha for di shelu, kende tabatin gran outoridat, i tera a keda ilumina ku su gloria.

²I el a grita ku un bos poderoso, bisando: "At'el a kai! At'e gran Babilonia a kai! I el a bira un luga di biba pa demononan i un prizon pa tur spiritu impuru, i un prizon pa tur parha impuru i abominabel.

³Pasobra tur e nashonnan a bebe di e bina di e pashon di su inmoralidat, i e reinan di tera a komete aktonan di inmoralidat kune, i e komersiantenan di tera a bira riku pa medio di e abundansia di su luho."

⁴I mi a tende un otro bos for di shelu ta bisa: "Sali for di dje, mi pueblo, pa bo no partisipa den su pikanan i pa bo no risibi di su plaganan;

⁵pasobra su pikanan a montona yega te na shelu, i Dios a korda su inikidatnan.

⁶Pagu'e bek mes tantu ku el a paga, i debolbe na dje dobel segun su obranan; den e kopa ku el a meskla, meskla dos biaha mas tantu p'e.

⁷Mes tantu ku el a glorifika su mes i a biba den luho, dun'e mes tantu tormento i rou; pasobra e ta bisa den su kurason: 'Mi ta sinta manera reina i mi no ta biuda, i nunka lo mi no sa kiko ta rou.'

⁸Pa e motibu aki su plaganan lo bin den un dia: pest i rou i hamber, i e lo wordu kima kompletamente ku kandela; pasobra Senor Dios, Kende ta huzgu'e, ta fuerte.

⁹"I e reinan di tera ku a komete aktonan di inmoralidat i a biba den luho huntu kune, lo yora i lamenta pa su motibu, ora nan mira e huma di su kimamentu.

¹⁰Nan lo keda para na un distansia pa motibu di e temor di su tormento i bisa: 'Ai, ai, e gran stat, Babilonia, e stat fuerte! Pasobra den un solo ora bo huisio a yega.'

¹¹"I e komersiantenan di tera ta yora i ta tene rou p'e, pasobra ningun hende no ta kumpra nan karganan mas:

¹²karganan di oro, plata, piedra presioso i perla; lino fini, purpura, seda i skarlata; tur sorto di palu ku ta hole dushi, i tur artikulo di ivor, i tur artikulo traha di palu masha kostoso mes, di brons, heru i alabaster;

¹³karganan di kane i speserei, di sensia, perfume i mirra, di bina i zeta di oleifi, di harina fini i trigo; baka i karne; kabai i garoshi; i esklabu i alma di hende.

¹⁴"I e fruta ku bo alma ta anhela na dje a bai for di bo, i tur loke tabata luhoso i esplendido a pasa bai lagabo i nan lo no wordu hana mas.

¹⁵E komersiantenan di e kosnan aki, kendenan a bira riku pa medio di dje, lo para na un distansia pa motibu di e miedu di su tormento, yoramentu i tenementu di rou,

¹⁶bisando: 'Ai, ai, e gran stat, esun ku tabata bisti na lino fini i purpura i skarlata, i dorna ku oro i piedra presioso i perla;

¹⁷pasobra den un solo ora un rikesa asina grandi a kaba na nada!' "I tur kapitan i tur pasahero i matros, i tur ku ta gana nan pan riba laman, a keda para na un distansia,

¹⁸i nan tabata yora ora nan a mira e huma di e kimamentu di e stat, bisando: 'Kual stat ta manera e gran stat aki?'

¹⁹I nan a tira stof riba nan kabes i tabata sklama, yora i lamenta, bisando: 'Ai, ai, e gran stat, den kual tur hende ku tabatin barku riba laman a bira riku pa medio di su rikesa, pasobra den un solo ora el a kaba na nada!'

²⁰Regosiha pa su motibu, O shelu, i boso, santunan i apostelnan i profetanan, pasobra Dios a pronunsia huisio pa boso kontra dje."

²¹I un angel fuerte a kohe un piedra manera un piedra-di-mulina grandi i a tir'e den laman, bisando: "Asin'aki Babilonia, e gran stat, lo wordu tira abou ku violensia, i lo no wordu hana nunka mas.

²²I e zonidu di tokadonan di arpa i musikonan i tokadonan di fluit i di trompet lo no wordu tend! mas den bo; i ningun trahado di ni un sorto di arte lo no wordu hana mas den bo; i e zonidu di mulina lo no wordu tend! mas den bo;

²³i lus di lampi lo no ilumina mas den bo; i e bos di bruidehom i di bruit lo no wordu tend! mas den bo; pasobra bo komersiantenan tabata e hombernan grandi di tera, pasobra tur e nashonnan a wordu gana dor di bo bruheria.

²⁴I den dje a wordu hana e sanger di profetanan i di santunan, i di tur esnan ku a wordu mata riba tera."