Read Papantla Totonac Revelashonnan 19 Bible Online

Revelashonnan 19 - Papantla Totonac bible

Revelashonnan 19

¹Despues di e kosnan aki mi a tende loke tabata parse un bos duru di un multitut grandi den shelu, bisando: "Aleluya! Salbashon, gloria i poder ta pertenese na nos Dios;

²pasobra Su huisionan ta berdadero i hustu; pasobra El a huzga e gran prostituta ku tabata korumpi tera ku su inmoralidat, i El a venga riba dje e sanger di Su sirbidonan."

³I pa di dos biaha nan a bisa: "Aleluya! Su huma ta subi bai ariba pa semper i semper."

⁴I e bint'i kuater ansianonan i e kuater kriaturanan bibu a tira nan kurpa abou ku nan kara te na suela i a adora Dios, Kende ta sinta riba trono, bisando: "Amen. Aleluya!"

⁵I un bos a sali for di e trono, bisando: "Duna alabansa na nos Dios, boso, tur Su sirbidonan, boso ku ta tem'E, chikitu i grandi."

⁶I mi a tende loke tabata parse bos di un multitut grandi, i manera e zonidu di hopi awanan i manera e zonidu di tirunan poderoso di strena, bisando: "Aleluya! Pasobra Senor nos Dios Todopoderoso ta reina.

⁷Laga nos regosiha i ta kontentu i dun'E gloria, pasobra e matrimonio di e Lamchi a yega i Su bruit a prepara su mes."

⁸I a wordu permit! na dje pa bisti su mes na lino fini, briyante i limpi; pasobra e lino fini ta e echonan hustu di e santunan.

⁹I el a bisami: "Skirbi: 'Bendishona ta esnan ku ta wordu invita na e sena matrimonial di e Lamchi.'" I el a bisami: "Esakinan ta palabranan berdadero di Dios."

¹⁰I mi a tira mi kurpa abou na su pia pa ador'e. I el a bisami: "No hasi esei; mi ta un ko-sirbido di bo i di bo rumannan, kendenan tin e testimonio di Jesus; adora Dios. Pasobra e testimonio di Jesus ta e spiritu di profesia."

¹¹I mi a mira shelu habri; i ata un kabai blanku, i Esun ku tabata sinta riba dje ta wordu yama Fiel i Berdadero; i den hustisia E ta huzga i ta hasi guera.

¹²I Su wowonan ta un flam di kandela, i riba Su kabes tin hopi diadema; i E tin un nomber skirbi riba djé ku ningun hende no konose sino E so.

¹³I E ta bisti ku un bisti tina ku sanger; i Su nomber ta wordu yama E Palabra di Dios.

¹⁴I e ehersitonan ku ta den shelu, bisti na lino fini, blanku i limpi, tabata siguié riba kabai blanku.

¹⁵I for di Su boka ta sali un spada skerpi pa E dal e nashonnan kune; i E lo goberna nan ku bara di heru; i E ta trapa e baki-di-pers-wendruif di e furia ardiente di Dios Todopoderoso.

¹⁶I riba Su pana i riba su bel di pia E tin un nomber skirbi: "REI DI REINAN I SENOR DI SENORNAN".

¹⁷I mi a mira un angel para den solo; i el a grita na bos haltu, i tabata bisa tur e parhanan ku ta bula meimei di shelu: "Bin, reuni pa e gran sena di Dios;

¹⁸pa boso kome e karni di reinan i e karni di komandantenan i e karni di hombernan poderoso i e karni di kabainan i di esnan ku ta sinta riba nan i e karni di tur hende, tantu liber komo esklabu, i chikitu i grandi."

¹⁹I mi a mira e bestia i e reinan di tera i nan ehersitonan, reuni tur huntu pa hasi guera kontra Esun ku tabata sinta riba e kabai, i kontra Su ehersito.

²⁰I e bestia a wordu gara, i huntu kune e profeta falsu ku a hasi e milagernan den su presensia, dor di kualnan el a gana esnan ku a risibi e marka di e bestia i esnan ku tabata adora su imagen; e dosnan aki a wordu tira bibu den e lago di kandela ku ta kima ku swafel.

²¹I e restu a wordu mata ku e spada ku a sali for di boka di Esun ku tabata sinta riba e kabai, i tur e parhanan a kome yena barika ku nan karni.