Read Papantla Totonac Revelashonnan 2 Bible Online

Revelashonnan 2 - Papantla Totonac bible

Revelashonnan 2

¹"Skirbi na e angel di e iglesia di Efeso: Esun ku ta tene e shete streanan den Su man drechi, Esun ku ta kana meimei di e shete kandelanan di oro, ta bisa esaki:

²'Mi konose bo obranan i bo trabou duru i perseveransia, i ku bo no por soporta hende malbado, i bo ta pone na prueba esnan ku ta yama nan mes apostel, ma ku no ta, i bo a hana sa ku nan ta falsu;

³i bo tin perseveransia i a soporta pa motibu di Mi nomber, i no a kansa.

⁴'Ma Mi tin esaki kontra bo, ku bo a bandona bo prome amor.

⁵Pesei, korda for di unda bo a kai, i repenti i hasi e obranan ku bo tabata hasi prome; sino Mi ta bin serka bo, i lo kita bo kandela for di su luga, a menos ku bo repenti.

⁶Sinembargo, esaki si bo tin, ku bo ta odia e obranan di e nikolaitanan, kualnan Ami tambe ta odia.

⁷'Esun ku tin orea, lagu'e tende loke e Spiritu ta bisa e iglesianan. Esun ku vense lo Mi laga kome di e palu di bida, ku ta den e Paraiso di Dios.'

⁸"I skirbi na e angel di e iglesia di Smirna: E Prome i e Ultimo, Kende tabata morto i ta biba atrobe, ta bisa esaki:

⁹'Mi konose bo tribulashon i bo pobresa (sinembargo, bo ta riku), i e blasfemia di esnan ku ta bisa ku nan ta hudiu i nan no ta, ma nan ta un snoa di Satanas.

¹⁰No tene miedu di loke bo ta bai sufri. Mira, diabel ta bai tira algun di boso den prizon, pa boso wordu poni na prueba, i boso lo sufri tribulashon dies dia largu. Sea fiel te na morto i lo Mi dunabo e korona di bida.

¹¹'Esun ku tin orea, lagu'e tende loke e Spiritu ta bisa e iglesianan. Esun ku vense lo no sufri dano dor di e di dos morto.'

¹²"I skirbi na e angel di e iglesia di Pergamo: Esun ku tin e spada skerpi di dos filo ta bisa esaki:

¹³'Mi sa unda bo ta biba, kaminda Satanas su trono ta; i bo ta tene firme na Mi nomber i no a nenga Mi fe, ni den e dianan di Antipas, Mi testigu, esun ku ta fiel na Mi, kende a wordu mata meimei di boso, kaminda Satanas ta biba.

¹⁴'Ma Mi tin algun kos kontra bo, pasobra bo tin einan algun ku ta tene na e sinansa di Balaam, kende a sina Balak pa pone un piedra di trompeka dilanti di e yunan di Israel, pa kome kosnan sakrifika na idolo i pa komete aktonan di inmoralidat.

¹⁵Asina bo tin algun tambe ku na mes manera ta tene na e sinansa di e nikolaitanan.

¹⁶Pesei, repenti; sino Mi ta bin pronto serka bo, i lo Mi hasi guera kontra nan ku e spada di Mi boka.

¹⁷'Esun ku tin orea, lagu'e tende loke e Spiritu ta bisa e iglesianan. Esun ku vense, na dje lo Mi duna di e mana skondi, i lo Mi dun'e un piedra blanku, i riba e piedra un nomber nobo skirbi ku ni un hende no konose, sino solamente esun ku risibie.'

¹⁸"I skirbi na e angel di e iglesia di Tiatira: E Yu di Dios, Kende tin wowo manera flam di kandela, i Su pianan ta manera brons lombra, ta bisa esaki:

¹⁹'Mi konose bo obranan, i bo amor i fe i sirbishi i perseveransia, i ku bo obranan di awor ta mas grandi ku esunnan di prome.

²⁰'Ma Mi tin esaki kontra bo, ku bo ta tolera e muhe Jezabel, kende ta yama su mes profeta, i e ta sina i ta hiba Mi sirbidonan riba mal kaminda, pa nan komete aktonan di inmoralidat i kome kosnan sakrifika na idolo.

²¹I Mi a dun'e tempu pa repenti; i e no kier repenti di su inmoralidat.

²²Mira, lo Mi tir'e riba kama di malesa, i esnan ku komete adulterio kune lo Mi tira den gran tribulashon, a menos ku nan repenti di su obranan.

²³I lo Mi mata su yunan ku pest; i tur e iglesianan lo sa ku Ami ta Esun ku ta samina mente i kurason; i lo Mi duna kada un di boso segun boso obranan.

²⁴Ma Mi ta bisa boso, e restu ku ta na Tiatira, kendenan no ta tene na e sinansa aki, kendenan no konose e kosnan profundo di Satanas, manera nan ta yama nan--Mi no ta pone ningun otro karga riba boso.

²⁵Sinembargo, loke boso tin, tene firme na dje te ora Mi bin.

²⁶'I esun ku vense, i esun ku hasi Mi boluntat te na fin, na dje lo Mi duna outoridat riba e nashonnan.

²⁷"I E lo goberna nan ku bara di heru, manera e pochinan di e alfarero ta wordu kibra na pida-pida," manera Ami tambe a risibi outoridat di Mi Tata;

²⁸i lo Mi dun'e e strea di marduga.

²⁹Esun ku tin orea, lagu'e tende loke e Spiritu ta bisa e iglesianan.'