Read Papantla Totonac Revelashonnan 21 Bible Online

Revelashonnan 21 - Papantla Totonac bible

Revelashonnan 21

¹I mi a mira un shelu nobo i un tera nobo; pasobra e prome shelu i e prome tera a pasa, i laman no tabata eksisti mas.

²I mi a mira e stat santu, Jerusalem nobo, ta baha for di shelu, for di Dios, prepara manera un bruit dorna pa su esposo.

³I mi a tende un bos duru for di e trono, bisando: "Mira, e tabernakel di Dios ta meimei di hende, i E lo biba meimei di nan, i nan lo ta Su pueblo, i Dios mes lo ta meimei di nan,

⁴i E lo seka tur lagrima kita for di nan wowo; i lo no tin morto mas; lo no tin lamento mas, ni yoramentu, ni dolo; e prome kosnan a pasa."

⁵I Esun ku ta sinta riba e trono a bisa: "Mira, Mi ta hasi tur kos nobo." I El a bisa: "Skirbi, pasobra e palabranan aki ta fiel i berdadero."

⁶I El a bisami: "Ta kumpli. Ami ta e Alfa i e Omega, e prinsipio i e fin. I esun ku tin set, pornada lo Mi dun'e di bebe for di e fuente di awa di bida.

⁷Esun ku vense lo ereda e kosnan aki, i Ami lo ta su Dios i e lo ta Mi yu.

⁸Ma e kobardenan, i e inkredulonan, i e abominabelnan, i e matadonan, i e fornikadonan i e hasidonan di bruha, i e adoradonan di dios falsu i tur ganado, nan parti lo ta den e lago ku ta kima ku kandela i swafel, kual ta e di dos morto."

⁹I un di e shete angelnan, kendenan tabatin e shete komchinan yen di e shete ultimo plaganan, a bin papia ku mi, bisando: "Bin aki, lo mi mustrabo e bruit, e esposa di e Lamchi."

¹⁰I el a hibami den Spiritu na un seru grandi i haltu, i a mustrami e stat santu, Jerusalem, ta baha di shelu for di Dios,

¹¹yen di e gloria di Dios. E tabata briya manera un piedra masha kostoso, manera un piedra di yaspe, transparente manera kristal.

¹²E tabatin un muraya grandi i haltu, ku diesdos porta, i na e portanan diesdos angel; i tabatin nombernan skirbi riba e portanan, kualnan ta e nombernan di e diesdos tribunan di e yu hombernan di Israel.

¹³Pariba tabatin tres porta i panort tres porta i pasuit tres porta i pabou tres porta.

¹⁴I muraya di e stat tabatin diesdos piedra di fundeshi, i riba nan tabatin e diesdos nombernan di e diesdos apostelnan di e Lamchi.

¹⁵I esun ku a papia ku mi tabatin un bara-di-midi di oro pa midi e stat, i su portanan i su muraya.

¹⁶I e stat tabata firkant, i su largura ta mes grandi ku su hanchura; i el a midi e stat ku e bara, 2.200 kilometer; su largura i hanchura i haltura ta igual.

¹⁷I el a midi su muraya, 65 meter, segun midinan di hende, lokualnan ta midinan di angel tambe.

¹⁸I e material di e muraya tabata yaspe; i e stat tabata di oro puru, manera glas transparente.

¹⁹E piedranan di fundeshi di e muraya di stat tabata dorna ku tur sorto di piedra presioso. E prome piedra di fundeshi tabata yaspe; e di dos, safiro; e di tres, kalsedonia; e di kuater, esmeralda;

²⁰e di sinku, sardoniks; e di seis, sardio; e di shete, krisolita; e di ocho, berilo; e di nuebe, topasio; e di dies, krisopras; e di diesun, yasinto; e di diesdos, amatista.

²¹I e diesdos portanan tabata diesdos perla; kada un di e portanan tabata un solo perla. I e kaya di e stat tabata oro puru, manera glas transparente.

²²I mi no a mira un tempel den dje, pasobra Senor Dios, e Todopoderoso, i e Lamchi, ta su tempel.

²³I e stat no tin mester di solo ni di luna pa briya riba dje, pasobra e gloria di Dios a ilumin'e, i su lampi ta e Lamchi.

²⁴I e nashonnan lo kana den su lus, i e reinan di tera lo trese nan gloria den dje.

²⁵I den dia (pasobra ayanan lo no tin anochi) su portanan lo no wordu sera nunka;

²⁶i nan lo trese e gloria i e onor di e nashonnan den dje;

²⁷i nada impuru i ningun hende ku ta hasi abominashon i ta gana, nunka lo no drenta den dje, sino solamente esnan ku nan nomber ta para skirbi den e buki di bida di e Lamchi.