Read Papantla Totonac Revelashonnan 3 Bible Online

Revelashonnan 3 - Papantla Totonac bible

Revelashonnan 3

¹"I skirbi na e angel di e iglesia di Sardis: "Esun ku tin e shete Spiritunan di Dios i e shete streanan ta bisa esaki: 'Mi konose bo obranan, ku bo tin e nomber di ta bibu, ma bo ta morto.

²Spierta, i fortalese e kosnan ku a keda, ku kasi a muri; pasobra Mi no a hana ku bo obranan ta perfekto den bista di Mi Dios.

³Pesei, korda loke bo a risibi i a tende; i ten'e i repenti. Pesei, si bo no spierta, lo Mi bin manera un ladron, i lo bo no sa ki ora Mi ta bin riba bo.

⁴'Ma bo tin algun hende na Sardis ku no a mancha nan pana; i nan lo kana ku Mi na blanku bisti, pasobra nan ta digno.

⁵Esun ku vense lo wordu bisti na pana blanku; i lo Mi no kita su nomber for di e buki di bida, i lo Mi konfesa su nomber dilanti di Mi Tata i dilanti di Su angelnan.

⁶Esun ku tin orea, lagu'e tende loke e Spiritu ta bisa e iglesianan.'

⁷"I skirbi na e angel di e iglesia di Filadelfia: "Esun santu, Kende ta berdadero, Kende tin e yabi di David, Kende ta habri i ningun hende no ta sera, i Kende ta sera i ningun hende no ta habri, ta bisa esaki:

⁸'Mi konose bo obranan. Mira, Mi a ponebo dilanti un porta habri ku ningun hende no por sera, pasobra bo tin poko poder i a warda Mi palabra, i no a nenga Mi nomber.

⁹Mira, lo Mi laga esnan ku ta di e snoa di Satanas, kendenan ta bisa ku nan ta hudiu, i no ta, ma ta gana--mira, lo Mi hasi nan bin i postra nan mes na bo pia, i laga nan sa ku Mi a stimabo.

¹⁰Pasobra bo a warda Mi mandamentu pa persevera, Ami tambe lo wardabo di e ora di prueba ku lo bin riba henter mundu, pa pone esnan ku ta biba riba tera na prueba.

¹¹'Mi ta bin pronto; tene firme na loke bo tin, pa ni un hende no kita bo korona.

¹²Esun ku vense, lo Mi hasie un pilar den e tempel di Mi Dios, i e lo no sali for di dje nunka mas; i lo Mi skirbi riba dje e nomber di Mi Dios, i e nomber di e stat di Mi Dios, e Jerusalem nobo, ku ta baha for di shelu for di Mi Dios, i Mi nomber nobo.

¹³Esun ku tin orea, lagu'e tende loke e Spiritu ta bisa e iglesianan.'

¹⁴"I skirbi na e angel di e iglesia di Laodisea: "E Amen, e Testigu fiel i berdadero, e Prinsipio di e kreashon di Dios, ta bisa esaki:

¹⁵'Mi konose bo obranan, ku bo no ta ni friu ni kayente; mara bo tabata friu of kayente.

¹⁶Asina anto, pasobra bo ta lou, i ni kayente ni friu, lo Mi skupibo for di Mi boka.

¹⁷Pasobra bo ta bisa: "Mi ta riku, mi ta bon para i no tin mester di nada," i bo no sa ku bo ta deplorabel i miserabel, pober, siegu i sunu.

¹⁸Mi ta konsehabo pa bo kumpra serka Mi oro refina den kandela, pa bo bira riku; i pana blanku, pa bo bisti i pa e berguensa di bo sunu no sali na kla; i unguente pa hunta bo wowonan kune, pa bo mira.

¹⁹'Esnan ku Mi ta stima, Mi ta reprende i disiplina; pesei, sea ferviente i repenti.

²⁰Ata, Mi ta para na porta i ta bati; si un hende tende Mi bos i habri porta, lo Mi drenta serka dje, i lo sena kune i e ku Mi.

²¹'Esun ku vense, lo Mi permitie sinta huntu ku Mi riba Mi trono, meskos ku Ami tambe a vense i a sinta huntu ku Mi Tata riba Su trono.

²²Esun ku tin orea, lagu'e tende loke e Spiritu ta bisa e iglesianan.'"