Read Papantla Totonac Revelashonnan 4 Bible Online

Revelashonnan 4 - Papantla Totonac bible

Revelashonnan 4

¹Despues di e kosnan aki mi a mira, i ata, un porta habri den shelu i e prome bos ku mi a tende manera zonidu di trompet ku ta papia ku mi, a bisa: "Bin aki riba, i lo Mi mustrabo loke mester tuma luga despues di e kosnan aki."

²Mesora mi tabata den Spiritu; i ata, tabatin un trono para den shelu, i Un sinta riba e trono.

³I Esun ku tabata sinta tabata manera un piedra di yaspe i un sardio den aparensia; i tabatin un regenbog ront di e trono ku tabata manera un esmeralda den aparensia.

⁴I ront di e trono tabatin bint'i kuater trono; i riba e trononan mi a mira bint'i kuater ansiano sinta, bisti na pana blanku i ku korona di oro riba nan kabes.

⁵I for di e trono tabata sali rayonan di lamper i zonidunan i tirunan duru di strena. I tabatin shete lampi di kandela sendi dilanti di e trono, kualnan ta e shete Spiritunan di Dios;

⁶i dilanti di e trono tabatin loke tabata parse un laman di glas, manera kristal. Meimei i tur ront di e trono tabatin kuater kriatura bibu, yen di wowo padilanti i patras.

⁷I e prome kriatura tabata manera leon, i e di dos kriatura manera bishe, i e di tres kriatura tabatin kara manera di hende, i e di kuater kriatura tabata manera aguila ku ta bula.

⁸I e kuater kriaturanan bibu, kada un di nan ku seis hala, ta yen di wowo tur ront i paden; i di dia i anochi nan no ta stop di bisa: "Santu, santu, santu ta Senor Dios, e Todopoderoso, Esun ku tabata i Esun ku ta i Esun ku ta bin."

⁹I ora ku e kriaturanan bibu ta duna gloria i onor i gradisimentu na Esun ku ta sinta riba e trono, na Esun ku ta biba pa semper i semper,

¹⁰e bint'i kuater ansianonan lo tira nan kurpa abou dilanti di Esun ku ta sinta riba e trono, i lo adora Esun ku ta biba pa semper i semper, i lo tira nan korona dilanti di e trono, bisando:

¹¹"Digno Bo ta, nos Senor i nos Dios, pa risibi gloria i onor i poder; pasobra Abo a krea tur kos, i pa motibu di Bo boluntat nan tabata eksisti, i a wordu krea."