Read Papantla Totonac Revelashonnan 5 Bible Online

Revelashonnan 5 - Papantla Totonac bible

Revelashonnan 5

¹I mi a mira den e man drechi di Esun ku tabata sinta riba e trono un buki skirbi paden i pafo, seya ku shete seyo.

²I mi a mira un angel fuerte ku tabata proklama na bos haltu: "Ta ken ta digno pa habri e buki i pa kibra su seyonan?"

³I ningun den shelu, ni riba tera, ni bou di tera no tabata por a habri e buki, ni pa wak den dje.

⁴I mi a kuminsa yora duru, pasobra ningun no a wordu hana digno pa habri e buki, ni pa wak den dje;

⁵i un di e ansianonan a bisami: "Stop di yora; mira, e Leon ku ta di e tribu di Juda, e Rais di David, a vense pa habri e buki i su shete seyonan."

⁶I mi a mira meimei di e trono (huntu ku e kuater kriaturanan bibu) i e ansianonan un Lamchi para, manera mata, Kende tabatin shete kachu i shete wowo, kualnan ta e shete Spiritunan di Dios, manda den henter mundu.

⁷I El a bin, i El a tum'e for di man drechi di Esun ku tabata sinta riba e trono.

⁸I ora ku El a tuma e buki, e kuater kriaturanan bibu i e bint'i kuater ansianonan a tira nan kurpa abou dilanti di e Lamchi, i kada un tabatin un arpa, i komchinan di oro yen di sensia, kualnan ta e orashonnan di e santunan.

⁹I nan a kanta un kantika nobo, bisando: "Abo ta digno pa tuma e buki i pa kibra su seyonan; pasobra Abo a wordu mata, i ku Bo sanger Bo a kumpra pa Dios hende for di tur tribu i lenga i pueblo i nashon.

¹⁰I Bo a hasi nan bira un reino i saserdotenan pa nos Dios; i nan lo reina riba tera."

¹¹I mi a wak, i mi a tende bos di hopi angel ront di e trono i e kriaturanan bibu i e ansianonan; i nan kantidat tabata dies mil biaha dies mil i miles i miles,

¹²bisando na bos haltu: "Digno ta e Lamchi ku a wordu mata pa risibi poder i rikesa i sabiduria i fortalesa i onor i gloria i bendishon."

¹³I tur kos krea ku tin den shelu i riba tera i bou di tera i riba laman, i tur kos ku tin den nan, mi a tende ta bisa: "Na Esun ku ta sinta riba trono, i na e Lamchi, sea bendishon i onor i gloria i dominio pa semper i semper."

¹⁴I e kuater kriaturanan bibu a sigui bisa: "Amen." I e ansianonan a tira nan kurpa abou i a adora.