Read Papantla Totonac Revelashonnan 6 Bible Online

Revelashonnan 6 - Papantla Totonac bible

Revelashonnan 6

¹I mi a mira ora ku e Lamchi a kibra un di e shete seyonan, i mi a tende un di e kuater kriaturanan bibu ta bisa ku un bos manera di strena: "Bin."

²I mi a wak, i ata un kabai blanku, i esun ku tabata sinta riba dje tabatin un bog; i un korona a wordu duna na dje, i el a sali konkistando, i pa konkista.

³I ora ku El a kibra e di dos seyo, mi a tende e di dos kriatura bibu ta bisa: "Bin."

⁴I un otro kabai, un kabai kora, a sali; i na esun ku tabata sinta riba dje, a wordu permiti pa kita pas for di riba tera, i pa hasi hende mata otro; i un spada grandi a wordu duna na dje.

⁵I ora ku El a kibra e di tres seyo, mi a tende e di tres kriatura bibu ta bisa: "Bin." I mi a wak, i ata un kabai pretu; i esun ku tabata sinta riba dje tabatin un balansa den su man.

⁶I mi a tende manera un bos meimei di e kuater kriaturanan bibu ta bisa: "Un midi di trigo pa un denario, i tres midi di puspas pa un denario; i no hasi dano na e zeta ni e bina."

⁷I ora ku El a kibra e di kuater seyo, mi a tende e bos di e di kuater kriatura bibu ta bisa: "Bin."

⁸I mi a wak, i ata un kabai palido; i esun ku tabata sinta riba dje tabatin e nomber Morto; i Hades tabata sigui huntu kune. I outoridat a wordu duna na nan riba un kuartu parti di e tera, pa mata ku spada i ku hamber i ku pest, i pa medio di e bestianan salbahe di tera.

⁹I ora ku El a kibra e di sinku seyo, mi a mira bou di e altar e almanan di esnan ku a wordu mata pa motibu di e palabra di Dios, i pa motibu di e testimonio ku nan tabatin;

¹⁰i nan a sklama na bos haltu, bisando: "Kuantu tempu mas, O Senor, santu i berdadero, lo Bo keda sin huzga i sin venga nos sanger riba esnan ku ta biba riba tera?"

¹¹I a wordu duna na kada un di nan un bisti blanku; i a wordu bisa na nan ku nan mester sosega un poko tempu mas, te ora ku e kantidat di nan ko-sirbidonan i nan rumannan ku mester a wordu mata ainda meskos ku nan, lo a keda kompleta tambe.

¹²I mi a wak ora ku El a kibra e di seis seyo, i tabatin un temblor masha grandi; i solo a bira pretu manera pana-di-saku traha di lana di kabritu, i henter e luna a bira manera sanger;

¹³i e streanan di shelu a kai riba tera, manera un palu di figo ta laga su figonan berde kai ora ku un bientu duru sakudie.

¹⁴I e shelu a hala sera manera un rol ora ku e wordu lora; i tur seru i isla a wordu kita for di nan luga.

¹⁵I e reinan di tera i e hombernan grandi i e komandantenan i e rikunan i e poderosonan i tur esklabu i homber liber a bai skonde den e kuebanan i meimei di e barankanan di e serunan;

¹⁶i nan a bisa e serunan i e barankanan: "Kai riba nos i skonde nos pa e presensia di Esun ku ta sinta riba trono, i pa e furia di e Lamchi;

¹⁷pasobra e dia grandi di nan furia a yega, i ken lo por keda para?"