Read Papantla Totonac Revelashonnan 7 Bible Online

Revelashonnan 7 - Papantla Totonac bible

Revelashonnan 7

¹Despues di esaki mi a mira kuater angel para na e kuater skinanan di tera, wantando e kuater bientunan di tera, pa bientu no supla ni riba tera ni riba laman ni riba ningun palu.

²I mi a mira un otro angel ta subi for di kaminda solo ta sali, i e tabatin e seyo di e Dios bibu; i el a grita na bos haltu na e kuater angelnan, na kendenan a wordu permiti pa hasi dano na e tera i na e laman,

³bisando: "No hasi dano na e tera ni na e laman ni na e palunan, te ora ku nos kaba di seya e sirbidonan di nos Dios na nan frenta."

⁴I mi a tende e kantidat di esnan ku a wordu seya, 144.000 seya for di tur e tribunan di e yunan di Israel:

⁵for di e tribu di Juda, 12.000 a wordu seya, for di e tribu di Ruben, 12.000, for di e tribu di Gad, 12.000,

⁶for di e tribu di Aser, 12.000, for di e tribu di Neftali, 12.000, for di e tribu di Manases, 12.000,

⁷for di e tribu di Simeon, 12.000, for di e tribu di Levi, 12.000, for di e tribu di Isakar, 12.000,

⁸for di e tribu di Zabulon, 12.000, for di e tribu di Jose, 12.000, for di e tribu di Benjamin, 12.000 a wordu seya.

⁹Despues di e kosnan aki mi a wak, i ata un multitut grandi ku ningun hende no por a konta, di tur nashon i tur tribu i pueblo i lenga, para dilanti di e trono i dilanti di e Lamchi, bisti na pana blanku i ku rama di palma den nan man;

¹⁰i nan tabata grita na bos haltu, bisando: "Salbashon ta di nos Dios, Kende ta sinta riba e trono, i di e Lamchi."

¹¹I tur e angelnan tabata para ront di e trono i ront di e ansianonan i e kuater kriaturanan bibu; i nan a tira nan kurpa abou ku nan kara te na suela dilanti di e trono i a adora Dios,

¹²bisando: "Amen, bendishon i gloria i sabiduria i gradisimentu i onor i poder i fortalesa sea na nos Dios pa semper i semper. Amen."

¹³I un di e ansianonan a kontesta i a bisami: "Esakinan ku ta bisti na pana blanku, ta ken nan ta, i for di unda nan a bin?"

¹⁴I mi a bis'e: "Mi senor, abo sa." I el a bisami: "Esakinan ta esnan ku a sali for di e gran tribulashon, i nan a laba nan pananan i a hasi nan blanku den e sanger di e Lamchi.

¹⁵Pa e motibu aki nan ta dilanti di e trono di Dios; i nan ta sirbié di dia i anochi den Su tempel; i Esun ku ta sinta riba e trono lo span Su tabernakel ofer di nan.

¹⁶Nan lo no pasa hamber mas, ni set tampoko; ni solo lo no kima nan mas, ni nada di kalor;

¹⁷pasobra e Lamchi meimei di e trono lo ta nan wardado, i lo guia nan hiba na fuentenan di e awa di bida; i Dios lo seka tur lagrima for di nan wowo."