Read Papantla Totonac Revelashonnan 8 Bible Online

Revelashonnan 8 - Papantla Totonac bible

Revelashonnan 8

¹I ora ku El a kibra e di shete seyo, tabatin un silensio den shelu pa mas o menos mei ora.

²I mi a mira e shete angelnan ku ta para dilanti di Dios, i na nan a wordu duna shete trompet.

³I un otro angel a bin para na e altar ku un wea-pa-sensia di oro den su man; i hopi sensia a wordu duna na dje, pa e ofrese esaki huntu ku e orashonnan di tur e santunan riba e altar di oro ku tabata dilanti di e trono.

⁴I e huma di e sensia, huntu ku e orashonnan di e santunan, a subi bai dilanti di Dios for di e angel su man.

⁵I e angel a kohe e wea-pa-sensia, i el a yen'e ku e kandela di e altar i a tira esaki riba tera; i a sigui tirunan duru di strena i zonidunan i rayonan di lamper i un temblor.

⁶I e shete angelnan ku tabatin e shete trompetnan a prepara nan mes pa toka nan.

⁷I e prome angel a toka, i a bin hagel i kandela meskla ku sanger, i nan a wordu tira riba tera; i un di tres parti di e tera a kima, i un di tres parti di e palunan a kima, i tur e yerba berde a kima.

⁸I e di dos angel a toka, i algu manera un seru grandi tur na kandela a wordu tira den laman; i un di tres parti di laman a bira sanger;

⁹i un di tres parti di e kriaturanan, ku tabata den laman i ku tabatin bida, a muri; i un di tres parti di e barkunan a wordu destrui.

¹⁰I e di tres angel a toka, i un strea grandi a kai for di shelu, tur na kandela manera un flambeu, i el a kai riba un di tres parti di e riunan i riba e fuentenan di awa;

¹¹i nomber di e strea aki ta Apsintus; i un di tres parti di e awanan a bira apsintus; i hopi hende a muri di e awa, pasobra el a bira marga.

¹²I e di kuater angel a toka, i un di tres parti di solo i un di tres parti di luna i un di tres parti di e streanan a wordu destrui, asina ku un di tres parti di nan a bira skur i un di tres parti di e dia no a duna klaridat, ni e anochi tampoko.

¹³I mi a wak, i mi a tende un aguila ta bula meimei di shelu, bisando na bos haltu: "Ai, ai, ai di esnan ku ta biba riba tera, pa motibu di e suplanan di trompet ku falta ainda, e suplanan di e tres angelnan ku ta bai toka djis aki!"