Read Papantla Totonac Ruth 1 Bible Online

Ruth 1 - Papantla Totonac bible

Ruth 1

¹Awor a sosode ku den e dianan ku e huesnan tabata goberna, tabatin hamber den e tera. I un homber di Betlehem na Juda a bai pa keda biba pa un tempu na tera di Moab ku su esposa i su dos yu hombernan.

²I nomber di e homber tabata Elimelek, i nomber di su esposa, Noemi, i nomber di su dos yu hombernan tabata Mahlon i Kelion, efrateonan di Betlehem na Juda. Awor nan a yega tera di Moab i a keda ayanan.

³Anto Elimelek, Noemi su esposo, a muri; i Noemi a ked'atras ku su dos yu hombernan.

⁴I nan a tuma muhenan moabita pa nan mes komo esposa; nomber di esun tabata Orfa, i nomber di e otro tabata Ruth. I nan a biba ayanan mas o menos dies ana.

⁵Anto Mahlon i Kelion tur dos tambe a muri; i e muhe a keda sin su dos yunan i sin su esposo.

⁶I ora ku el a tende na tera di Moab ku SENOR a bishita Su pueblo dor di duna nan kuminda, Noemi ku su dos nueranan a lanta pa bolbe for di tera di Moab.

⁷Asina el a sali ku su dos nueranan for di e luga kaminda e tabata; i nan a kuminsa kana pa bolbe na tera di Juda.

⁸I Noemi a bisa su dos nueranan: "Bai, bolbe kada un di boso na kas di su mama. Ku SENOR trata boso ku karino meskos ku boso a trata e defuntonan i ami.

⁹Ku SENOR duna ku boso por hana sosiegu, kada un den kas di su esposo." E ora ei el a sunchi nan, i nan a halsa nan bos i a yora.

¹⁰I nan a bis'e: "Siguramente nos lo bolbe ku bo serka bo pueblo."

¹¹Ma Noemi a bisa: "Bai bek, mi yunan. Pakiko boso lo bai ku mi? Mi tin mas yu homber den mi barika anto, ku por bira boso esposo?

¹²Bai bek, mi yunan! Bai, pasobra mi ta muchu bieu pa tin un esposo. Si mi a bisa ku mi tin speransa, asta si mi por tabatin un esposo awe nochi i hana yu hombernan tambe,

¹³boso lo a warda pesei te ora nan bira grandi? Boso lo a keda sin kasa pesei? No, mi yunan; pasobra pa mi ta mas duru ainda ku pa boso, pasobra e man di SENOR a sali kontra mi."

¹⁴I nan a halsa nan bos i a yora atrobe; i Orfa a sunchi su suegra, ma Ruth a keda ten'e duru.

¹⁵E ora ei Noemi a bisa: "Mira, bo kuna a bai bek serka su pueblo i su diosnan; bai bek tras di bo kuna."

¹⁶Ma Ruth a bisa: "No keda insisti pa mi bai lagabo, ni kitami di siguibo; pasobra unda ku bo bai, lo mi bai, i unda ku bo keda, lo mi keda. Bo pueblo lo ta mi pueblo, i bo Dios, mi Dios.

¹⁷Kaminda bo muri, lo mi muri, i einan lo mi wordu dera. Ku SENOR hasi asina ku mi, i pio ainda, si kualke kos otro ku morto trese separashon entre abo i ami."

¹⁸Ora Noemi a mira ku e tabata desidido pa bai kune, e no a bis'e nada mas.

¹⁹Asina nan dos a bai te ora nan a yega Betlehem. I a sosode ku ora nan a yega Betlehem, henter e stat a keda konmovi pa nan motibu, i e muhenan tabata bisa: "No ta Noemi esei?"

²⁰I el a bisa nan: "No yamami Noemi; yamami Mara, pasobra e Todopoderoso a tratami ku hopi amargura.

²¹Mi a bai yen, ma SENOR a tresemi bek bashi. Pakiko boso ta yamami Noemi, siendo ku SENOR a duna testimonio kontra mi i e Todopoderoso a afligimi?"

²²Asina Noemi a bolbe for di tera di Moab, i huntu kune su nuera Ruth e moabita; i nan a yega Betlehem na kuminsamentu di e kosecha di puspas.