Read Papantla Totonac Ruth 2 Bible Online

Ruth 2 - Papantla Totonac bible

Ruth 2

¹Awor Noemi tabatin un pariente di su esposo, un homber masha riku mes, di e famia di Elimelek, kende su nomber tabata Boaz.

²I Ruth e moabita a bisa Noemi: "Pa fabor, lagami bai den kunuku i piki tapushi tras di esun ku mi hana grasia den su bista." I el a bis'e: "Bai, mi yu."

³Asina el a sali i a bai piki tapushi den kunuku tras di e kosechadonan; i a sosode ku el a yega na e parti di kunuku ku tabata pertenese na Boaz, kende tabata di e famia di Elimelek.

⁴Awor mira, Boaz a bin di Betlehem i a bisa e kosechadonan: "SENOR sea ku boso." I nan a bis'e: "SENOR bendishonabo."

⁵E ora ei Boaz a bisa su sirbido ku tabata enkarga ku e kosechadonan: "Ta di ken e muhe hoben aki ta?"

⁶I e sirbido ku tabata enkarga ku e kosechadonan a kontesta i a bisa: "Ta e muhe moabita hoben ku a bolbe ku Noemi for di tera di Moab.

⁷I el a bisa: 'Pa fabor, lagami piki tapushi tras di e kosechadonan meimei di e bohinan.' Asina el a bin i a keda for di mainta te awor; djis un ratu so el a sinta den kas."

⁸E ora ei Boaz a bisa Ruth: "Skucha ku atenshon, mi yu. No bai piki tapushi den otro kunuku; ademas, no bai for di akinan, ma ked'aki serka mi sirbientenan.

⁹Laga bo wowonan ta riba e kunuku ku nan ta kosecha, i bai nan tras. Pues, mi a ordena e sirbidonan pa no molestiabo. Ora bo tin set, bai na e purunnan di awa i bebe di e awa ku e sirbidonan ta saka."

¹⁰E ora ei Ruth a tira su kurpa abou i a buig ku su kara te na suela, i a bis'e: "Pakiko mi a hana grasia den bo bista ku bo a paga atenshon na mi, siendo ku mi ta un stranhero?"

¹¹I Boaz a kontesta i a bis'e: "Mi a tende di tur loke bo a hasi pa bo suegra despues di morto di bo esposo, i kon bo a bandona bo tata i bo mama i e tera kaminda bo a nase, i a bin serka un pueblo ku bo no tabata konose prome.

¹²Ku SENOR rekompensa bo obra, i ku bo pago sea kompleto for di SENOR, e Dios di Israel, bou di Kende Su halanan bo a bin buska refugio."

¹³E ora ei el a bisa: "Mi a hana grasia den bo bista, mi senor, pasobra bo a konsolami, i di berdat bo a papia ku karino ku bo sirbiente, apesar ku mi no ta manera un di bo sirbientenan."

¹⁴I na ora di kome Boaz a bis'e: "Bin aki, kome di e pan i dop bo pida pan den e binager." Asina el a sinta banda di e kosechadonan; i Boaz a sirbie mainshi tosta, i el a kome i a keda satisfecho, i a sobra un tiki.

¹⁵Ora ku el a lanta pa bai piki tapushi, Boaz a ordena su sirbidonan, bisando: "Lagu'e piki meimei di e bohinan tambe, i no ofend'e.

¹⁶I tambe, saka ekspres poko mainshi p'e for di e boshinan i laga esaki pa e piki, i no reprend'e."

¹⁷Asina el a piki tapushi den kunuku te atardi. Anto el a bati loke ku el a piki, i esaki tabata mas o menos un efa di puspas.

¹⁸I el a koh'e i a bai den stat, i su suegra a mira loke ku el a piki. Tambe el a kohe loke ku el a sobra despues di a kaba di kome i a duna Noemi.

¹⁹Anto su suegra a bis'e: "Unda bo a piki awe i unda bo a traha? Bendishona sea esun ku a paga atenshon na bo." Asina el a konta su suegra ta serka ken el a traha i a bisa: "Nomber di e homber serka ken mi a traha awe ta Boaz."

²⁰I Noemi a bisa su nuera: "Ku esun ku no a nenga su karino na e bibunan ni na e mortonan sea bendishona." I Noemi a bis'e: "E homber ta nos famia, e ta un di nos famianan mas yega."

²¹E ora ei Ruth e moabita a bisa: "Ademas, el a bisami: 'Keda serka mi sirbidonan te ora nan kaba ku henter mi kosecha.'"

²²I Noemi a bisa su nuera Ruth: "Mi yu, ta bon pa bo sali ku su sirbientenan, pa otronan no atakabo den otro kunuku."

²³Asina el a keda serka e sirbientenan di Boaz pa piki tapushi te na fin di e kosecha di puspas i e kosecha di trigo. I e tabata biba serka su suegra.