Read Papantla Totonac Ruth 3 Bible Online

Ruth 3 - Papantla Totonac bible

Ruth 3

¹Awor su suegra Noemi a bis'e: "Mi yu, lo mi no buska siguridat pa bo, pa bai bon ku bo?

²I awor Boaz, serka kende su sirbientenan bo tabata, no ta nos pariente e ta? Mira, awe nochi e ta bienta puspas na e plenchi-di-bati-mainshi.

³Pesei, bai bana i hunta bo kurpa ku zeta i bisti bo miho pana, i baha bai na e plenchi-di-bati-mainshi; ma no laga e homber sa ku bo t'ei te ora ku el a kaba di kome i bebe.

⁴I ora ku e kai drumi, tuma nota di e luga kaminda ku e ta drumi, i bai kita e pana for di su pianan i kai drumi; e ora ei e lo bisabo kiko bo mester hasi."

⁵I el a bis'e: "Tur loke bo bisa, lo mi hasi."

⁶Asina el a baha bai na e plenchi-di-bati-mainshi i a hasi konforme tur loke su suegra a orden'e.

⁷Ora Boaz a kaba di kome i bebe i su kurason tabata kontentu, el a kai drumi banda di e monton di trigo; i Ruth a bin ketu-ketu, a kita e pana for di su pianan i a kai drumi.

⁸I a sosode ku mei anochi e homber a spanta, i a bira wak; i mira, tabatin un muhe drumi na su pia.

⁹I el a bisa: "Ta ken bo ta?" I el a kontesta: "Ami ta Ruth, bo sirbiente. Pesei, habri bo klechi riba bo sirbiente, pasobra bo ta un famia yega."

¹⁰E ora ei Boaz a bisa: "Ku SENOR bendishonabo, mi yu. Bo a mustra ku bo ultimo karino ta miho ku esun prome, dor di no kore tras di homber hoben, sea pober of riku.

¹¹I awor, mi yu, no tene miedu. Lo mi hasi pa bo kiko ku bo pidi, pasobra tur e hendenan di e stat aki sa ku bo ta un muhe ekselente.

¹²I awor ta berdat ku mi ta un famia yega; sinembargo, tin un famia mas yega ku mi.

¹³Keda awe nochi, i ora dia habri, si e kier redimibo, ta bon; lagu'e redimibo. Ma si e no kier redimibo, e ora ei, manera SENOR ta biba, ami lo redimibo. Keda drumi te mainta."

¹⁴Asina Ruth a drumi na su pia te mainta i a lanta prome ku hende por a rekonose otro; i Boaz a bisa: "No laga ningun hende sa ku e muhe a bin na e plenchi-di-bati-mainshi."

¹⁵Ademas, el a bolbe bisa: "Dunami e kapa ku bo tin bisti i ten'e pa mi." Asina Ruth a ten'e p'e; i el a midi seis midi di puspas i a pone esaki riba dje. Anto el a bai den stat.

¹⁶I ora ku el a yega serka su suegra, esaki a bisa: "Kon a bai, mi yu?" I el a kont'e tur loke e homber a hasi p'e.

¹⁷I Ruth a bisa: "E seis midinan di puspas aki el a dunami, pasobra el a bisa: 'No bai serka bo suegra man bashi.'"

¹⁸Anto Noemi a bisa: "Mi yu, warda te ora bo sa kon e asunto ta resulta; pasobra e homber lo no sosega te ora ku e regla e asunto awe mes."