Read Papantla Totonac Ruth 4 Bible Online

Ruth 4 - Papantla Totonac bible

Ruth 4

¹Awor Boaz a subi bai na porta di e stat i a sinta ayanan, i mira, e famia yega ku Boaz a papia di dje tabata pasa; pesei el a bisa: "Amigu, bira bin sinta akinan." I el a bira bai sinta.

²E ora ei el a tuma dies homber for di e ansianonan di e stat i a bisa: "Bin sinta akinan." Asina nan a bai sinta.

³Anto el a bisa e famia mas yega: "Noemi, kende a bolbe for di tera di Moab, mester bende e pida tera ku tabata pertenese na nos ruman Elimelek.

⁴Pesei mi a pensa di informabo, bisando: 'Kumpr'e dilanti di esnan ku ta sinta akinan, i dilanti di e ansianonan di mi pueblo. Si bo kier redimie, redimie, ma si no, bisami pa mi sa; pasobra no tin ningun otro hende sino abo pa redimie, i ami ta despues di bo.'" I e famia mas yega a bisa: "Ami ta redimie."

⁵E ora ei Boaz a bisa: "Riba e dia ku bo kumpra e kunuku for di man di Noemi, bo mester tuma Ruth e moabita, biuda di e defunto, tambe, pa asina lanta e nomber di e defunto riba su erensia."

⁶I e famia mas yega a bisa: "Mi no por redimie pa mi, pa mi no pone mi mes erensia na peliger. Redimie pa bo; bo por hana mi derecho di redenshon, pasobra ami no por redimie."

⁷Awor esaki tabata e kustumber prome aya na Israel enkuanto redenshon i traspaso di tera, pa konfirma kualke asunto: esun homber tabata kita su sandalia i duna esaki na e otro; i esaki tabata e manera di konfirma kombenio na Israel.

⁸Asina e famia mas yega a bisa Boaz: "Kumpr'e pa bo." I el a kita su sandalia.

⁹E ora ei Boaz a bisa e ansianonan i tur e hendenan: "Boso ta testigu awe ku mi a kumpra for di man di Noemi tur loke tabata pertenese na Elimelek i tur loke tabata pertenese na Kelion i Mahlon.

¹⁰Ademas, mi a hana Ruth e moabita, biuda di Mahlon, pa ta mi esposa pa lanta nomber di e defunto riba su erensia, pa nomber di e defunto no wordu korta kita for di su rumannan i for di e porta di su luga di nasementu; boso ta testigu awe."

¹¹I tur e hendenan ku tabata na porta di e stat, i e ansianonan, a bisa: "Nos ta testigu. Ku SENOR hasi e muhe ku ta bin den bo kas manera Raquel i Lea, kendenan tur dos a edifika e kas di Israel; i ku bo hana prosperidat na Efrata i bira famoso na Betlehem.

¹²Ademas, ku bo kas ta manera e kas di Fares, kende Tamar a hana pa Juda, pa medio di e desendensia ku SENOR lo dunabo dor di e muhe hoben aki."

¹³Asina Boaz a tuma Ruth, i el a bira su esposa, i el a drumi kune. I SENOR a hasi ku el a konsebi, i el a duna lus na un yu homber.

¹⁴E ora ei e muhenan a bisa Noemi: "Bendishona sea SENOR, Kende no a lagabo sin un redentor awe; i ku su nomber bira famoso na Israel.

¹⁵Ku e lo ta pa bo tambe un restorado di bida i un sostenedo di bo biehes; pasobra bo nuera, kende ta stimabo i ta miho pa bo ku shete yu homber, a duna lus na dje."

¹⁶Anto Noemi a tuma e yu i a pon'e riba su skochi, i a bira su yaya.

¹⁷I e muhenan bisina a dun'e nomber, bisando: "Noemi a hana un yu homber." Asina nan a yam'e Obed. E ta tata di Isai, tata di David.

¹⁸Awor esakinan ta e generashonnan di Fares: Fares a engendra Hezron,

¹⁹i Hezron a engendra Ram, i Ram, Aminadab,

²⁰i Aminadab a engendra Nason, i Nason, Salmon,

²¹i Salmon a engendra Boaz, i Boaz, Obed,

²²i Obed a engendra Isai, i Isai, David.