Read Papantla Totonac 1 Samuel 1 Bible Online

1 Samuel 1 - Papantla Totonac bible

1 Samuel 1

¹Awor tabatin un sierto homber di Ramataim-zofim di e serunan di Efrain, i su nomber tabata Elkana, yu homber di Jeroham, yu homber di Eliu, yu homber di Tohu, yu homber di Zuf, un efrateo.

²I e tabatin dos esposa: nomber di esun tabata Ana i nomber di e otro tabata Penina; i Penina tabatin yu, ma Ana no tabatin yu.

³Awor tur ana e homber aki tabata bai for di su stat pa adora i pa ofrese sakrifisio na e SENOR di ehersitonan na Silo. I e dos yu hombernan di Eli, Ofni i Finees, tabata saserdote di SENOR ayanan.

⁴I ora ku e dia pa Elkana ofrese sakrifisio a yega, e tabata duna su esposa Penina i tur su yu hombernan i su yu muhenan nan porshon,

⁵ma Ana e tabata duna un porshon dobel, pasobra e tabata stima Ana, ma SENOR a sera su matris.

⁶Su rival, sinembargo, tabata probok'e sin miserikordia pa hasie sinti su mes fastioso, pasobra SENOR a sera su matris.

⁷I a sosode ku ana tras ana, kada bes ku e tabata bai na e kas di SENOR, Penina tabata probok'e, asina ku e tabata yora i no tabata kome.

⁸Anto su esposo Elkana a bis'e: "Ana, pakiko bo ta yora i pakiko bo no ta kome i pakiko bo kurason ta tristu asina? Mi no ta nifika mas pa bo ku dies yu homber?"

⁹E ora ei Ana a lanta despues di a kome i bebe na Silo. Awor saserdote Eli tabata sinta riba e asiento banda di e kosein-di-porta di e tempel di SENOR.

¹⁰I Ana, ku amargura di alma, a hasi orashon na SENOR i a yora masha.

¹¹I el a hasi un huramentu i a bisa: "O SENOR di ehersitonan, si di berdat Bo mira e aflikshon di Bo sirbiente i korda riba mi i no lubida riba Bo sirbiente, ma duna Bo sirbiente un yu homber, e ora ei lo mi dun'e na SENOR tur e dianan di su bida, i nunka nabaha lo no pasa riba su kabes."

¹²Awor a sosode ku mientras e tabata sigui hasi orashon den e presensia di SENOR, Eli tabata opserva su boka.

¹³Ma Ana tabata papia den su kurason, solamente su lepnan tabata move, ma no por a tende su bos. Pesei Eli a pensa ku ta burachi e tabata.

¹⁴E ora ei Eli a bis'e: "Kuantu tempu mas lo bo sigui bebe burachi? Stop di bebe bina."

¹⁵Ma Ana a kontesta i a bisa: "No, mi senor, mi ta un muhe hopi tribula. Mi no a bebe bina ni bibida sterki, ma mi a drama mi alma dilanti di SENOR.

¹⁶No tuma bo sirbiente pa un muhe perverso, pasobra ta for di mi preokupashon grandi i for di mi aflikshon mi a papia te awor aki."

¹⁷Anto Eli a kontesta i a bisa: "Bai na pas; i ku e Dios di Israel dunabo bo petishon ku bo a hasi na djé."

¹⁸I Ana a bisa: "Laga bo sirbiente hana grasia den bo bista." Asina e muhe a kohe su kaminda bai i a kome, i su kara no tabata tristu mas.

¹⁹Anto nan a lanta mainta tempran i a adora dilanti di SENOR, i a bolbe bai nan kas bek na Rama. I Elkana tabatin relashon ku su esposa Ana, i SENOR a korda riba dje.

²⁰I a sosode ku na su debido tempu, despues ku Ana a konsebi, el a duna lus na un yu homber; i el a yam'e Samuel, bisando: "Pasobra mi a pidie na SENOR."

²¹Anto e homber Elkana a bai ku tur e hendenan di su kas pa ofrese na SENOR e sakrifisio di tur ana i pa kumpli ku su huramentu.

²²Ma Ana no a bai, pasobra el a bisa su esposo: "Lo mi no bai te ora ku mi kita e yu for di pechu; e ora ei lo mi hib'e, pa e parese dilanti di SENOR i keda ayanan pa semper."

²³I su esposo Elkana a bis'e: "Hasi loke ta parsebo miho. Keda te ora bo a kit'e for di pechu; solamente, ku SENOR konfirma Su palabra." Asina e muhe a keda i a kria su yu homber te ora ku el a kit'e for di pechu.

²⁴Awor ora ku el a kit'e for di pechu, el a hib'e kune, ku un toro di tres ana i un efa di harina i un butishi di bina, i a hib'e na e kas di SENOR na Silo, ounke ku e mucha tabata chikitu.

²⁵E ora ei nan a mata e toro i a hiba e mucha pa Eli.

²⁶I Ana a bisa: "O mi senor! Manera bo alma ta biba, mi senor, ta ami ta e muhe ku tabata para aki banda di bo ta hasi orashon na SENOR.

²⁷Pa e mucha aki mi a hasi orashon, i SENOR a dunami mi petishon ku mi a hasi na djé.

²⁸Pesei tambe mi a dedik'e na SENOR; tanten ku e ta na bida e ta dedika na SENOR." I el a adora SENOR ayanan.